Last Update  :  2025-04-04 20:30:00 About Contact
Follow Us -
IMG-LOGO
නිවස්න පිටුව Football රියල් මැඩ්රීඩ් - ලිවර්පූල් අවසන් තරගයට
චැම්පියන්ස් ලීග් පාපන්දු

රියල් මැඩ්රීඩ් - ලිවර්පූල් අවසන් තරගයට

editorial - 2022 මැයි මස 05 {{hitsCtrl.values.hits}} Views 0 Comment
A A A

යුරෝපීය පාපන්දු ලීගවල පෙරමුණේ පසුවන කණ්ඩායම් අතර පැවැත්වෙන ශූරයන්ගේ ලීග පාපන්දු තරගාවලියේ අවසන් මහ තරගයට සුදුසුකම් ලබාගැනීමට රියල් මැඩ්රීඩ් සහ ලිවර්පූල් ක්‍රීඩා සමාජ සමත් වූහ. තරගාවලියේ අවසන් මහ තරගය මෙම මස 28 වැනිදා පැරීසියේ පිහිටි ප්‍රංශ ජාතික ක්‍රීඩාංගණයේදී පැවැත්වීමට නියමිතය.

මෙම තරගාවලියේ අවසන් පූර්ව වටය අදියර දෙකකින් සමන්විත වූ අතර එහිදී එක් කණ්ඩායමක් තවත් කණ්ඩායම් සමග තරග දෙකකට බැගින් සහභාගි විය. එම තරග දෙකේදී වැඩිම ගෝල සංඛ්‍යාවක් ලබාගන්නා කණ්ඩායම් දෙක අවසන් මහ තරගයට සුදුසුකම් ලබාගත්හ.

අප්‍රේල් මස 27 සහ 28 යන දිනවල පැවැති අවසන් පූර්ව වටයේ පළමු අදියරේ තරගවලදී විලාරියල් ක්‍රීඩා සමාජයට එරෙහිව ගෝල 2-0 ක ජයක් වාර්තා කිරීමට ලිවර්පූල් ක්‍රීඩා සමාජය සමත් වූ අතර රියල් මැඩ්රීඩ් ක්‍රීඩා සමාජයට එරෙහිව ගෝල 4-3 ක ජයක් වාර්තා කිරිමට මැන්චෙස්ටර් සිටි ක්‍රීඩා සමාජය සමත් විය.

මෙම මස 3 සහ 4 යන දිනවලදී පැවැති අවසන් පූර්ව වටයේ දෙවැනි අදියරේ තරගවලදී ගෝල 3-2 කින් විලාරියල් ක්‍රීඩා සමාජය පරාජය කිරීමට ලිවර්පූල් ක්‍රීඩා සමාජය සමත් වූ අතර ගෝල 3-1 කින් මැන්චෙස්ටර් සිටි ක්‍රීඩා සමාජය පරාජය කිරීමට රියල් මැඩ්රීඩ් ක්‍රීඩා සමාජය සමත් විය.

ඒ අනුව අවසන් පූර්ව දෙකෙදීම ලබාගත් ගෝලවල එකතුව අනුව ගෝල 5-2 කින් විලාරියල් ක්‍රීඩා සමාජය පරාජය කළ ලිවර්පූල් ක්‍රීඩා සමාජයද, ගෝල 6-5 කින් මැන්චෙස්ටර් සිටි ක්‍රීඩා සමාජය පරාජය කළ රියල් මැඩ්රීඩ් ක්‍රීඩා සමාජයද තරගාවලියේ අවසන් මහ තරගයට සුදුසුකම් ලබාගත්හ.  

ඉකුත් 3 වැනිදා විලාරියල් සහ ලිවර්පූල් ක්‍රීඩා සමාජ අතර පැවැති අවසන් පූර්ව තරගයේ පළමු අර්ධය නිමාවට පත්වන විට ගෝල 2-0 ක් ලෙස පෙරමුණ ගැනීමට විලාරියල් ක්‍රීඩකයෝ සමත් වූහ. කෙසේ වුවත් දෙවැනි අර්ධයේදී තරගයට අවතීර්ණ වූ ලිවර්පූල් ක්‍රීඩකයෝ පිට පිට ගෝල 3 ක් ලබාගනිමින් තරගයේ ජය තමන් සතු කරගත්හ.

මැන්චෙස්ටර් සිටි සහ රියල් මැඩ්රීඩ් ක්‍රීඩා සමාජ අතර ඉකුත් 4 වැනිදා පැවැති අවසන් පූර්ව තරගයේ පළමු අර්ධය නිමාවන විට දෙපිලම ගෝල ලබා නොසිටියහ. එහෙත් නියමිත වේලාව අවසන් වන විට ගෝල 2-1 ක් ලෙස තරගයේ පෙරමුණ ගෙන සිටින රියල් මැඩ්රීඩ් ක්‍රීඩකයෝ, අතිරේක කාලයේදී තවත් ගෝලයක් වාර්තා කරමින් අවසන් මහ තරගයට දොරටු විවර කරගත්හ.

යුරොපීය පාපන්දු සම්මේලනයේ සංවිධානයෙන් පැවැත්වෙන මෙම තරගාවලියේ ශූරතාව සඳහා යූරෝ මිලියන 20 ක (රුපියල් බිලියන 7.41 ක් පමණ) මුදලක් පිරිනැමෙන අතර අනු ශූරතාව සඳහා යුරෝ මිලියන 15.5 ක (රුපියල් බිලියන 5.74 ක් පමණ) මුදලක් පිරිනැමෙනු ඇත.

වසර 67 ක ඉතිහාසයකට හිමිකම් කියන මෙම තරගවලියේදී වැඩිම ශූරතා සංඛ්‍යාවක් දිනාගැනීමට රියල් මැඩ්රිඩ් ක්‍රීඩා සමාජය සමත්ව තිබේ. ඒ ශූරතා 13 කට හිමිකම් කියමිනි. අවසන් වරට පැවැති (2021) පැවැති තරගාවලියේ ශූරතාව දිනාගනු ලැබුවේ චෙල්සි ක්‍රීඩා සමාජය විසිනි.

-036

 


අදහස් (0)

රියල් මැඩ්රීඩ් - ලිවර්පූල් අවසන් තරගයට

ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.