(නාමල් පතිරගේ)
දකුණු කොරියාව බලා ගිය ශ්‍රී ලංකා ජාතික පාපන්දු කණ්ඩායමට ඇතුළත් ක්‍රීඩකයකු වන රිෆ්කාන් මොහොමඩ් දෙවැනි පී.සී.ආර්. පරීක්ෂණයෙන් සමත්වීම නිසා ඔහු ශ්‍රී ලංකා කණ්ඩායමට නැවත ඇතුළත් වී සිටින බව ශ්‍රී ලංකා පාපන්දු සම්මේලනයේ සභාපති අනුර ද සිල්වා මහතා පැවසීය.
සෝල් නුවරට පැමිණීමෙන් පසුව සංචාරක ශ්‍රී ලංකා පාපන්දු කණ්ඩායමේ ක්‍රීඩකයන්, පුහුණුකරුවන් හා නිලධාරීන් සියලුදෙනා පී.සී.ආර්. පරීක්ෂණයන්ට ලක්කිරීමට දකුණු කොරියානු සෞඛ්‍ය බලධාරීහු කටයුතු කළහ. එහිදී ක්‍රීඩක රිෆ්කාන් මොහොමඩ් පමණක් පී.සී.ආර්. පරීක්ෂණයෙන් අසමත් වීම නිසා ශ්‍රී ලංකා පාපන්දු කණ්ඩායම නවාතැන් ගන්නා හෝටලයට ඔහු ඇතුළත් කිරීමට පෙර නැවත පී.සී.ආර්. පරීක්ෂාවක් සිදුකරනු ලැබීය.
ශ්‍රී ලංකා කණ්ඩායමේ ක්‍රීඩකයන් 22දෙනෙකු සහ නිලධාරින් 11 දෙනෙකු සෝල් නුවර බලා පිටත්ව ගියේ ශ්‍රී ලංකාවේදීත් කළ පී.සී.ආර්. පරීක්ෂණවලින් සමත්වීමෙන් අනතුරුවය.
ලෝක කුසලාන (2022) පාපන්දු තරගාවලියේ ආසියානු කලාප දෙවැනි වටයේ තරග දෙකකට සහභාගි වීම සඳහා සෝල් නුවරට ළඟා වූ ශ්‍රී ලංකා පාපන්දු කණ්ඩායම හෙට (05) ලෙබනනයට එරෙහිව පලමු තරගයට සහභාගි වේ. මෙම තරගය ශ්‍රී ලංකා වේලාවෙන් පෙරවරු 11.30ට ආරම්භ වේ.
සෝල් නුවරට ළඟාවී සිටින ශ්‍රී ලංකා පාපන්දු කණ්ඩායම ජුනි 09 වැනිදා සත්කාරක දකුණු කොරියාවට එරෙහිව තවත් තරගයකට සහභාගි වේ.
සංචාරක ශ්‍රී ලංකා කණ්ඩායම ඊයේ හා අද (3-4) දිනයන්හිදී පුහුණු සැසිවාර කීපයකටද සහභාගි විය. කණ්ඩායමේ සියලු ක්‍රීඩකයින් සහ නිලධාරීන් හොඳ සුවයෙන් සිටින බවද අනුර ද සිල්වා මහතා වැඩිදුරටත් පැවසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
