‘ඩී’ කාණ්ඩ‍ය යටතේ ඊයේ (22 වැනිදා) පැවැති මූලික වටයේ තරගයකදී ස්කොට්ලන්තයට එරෙහිව ගෝල 3-1 ක ජයක් ලැබූ ක්‍රෙයේෂියාව යූරෝ 2020 පාපන්දු තරගාවලියේ අවසන් 16 දෙනාගේ වටයට සුදුසුකම් ලබාගත්තේය. යූරෝ පාපන්දු තරගයකදී ස්කොට්ලන්තය එරෙහිව ක්‍රොයේෂියාව තරග වැදුණ 6 වැනි අවස්ථාව මෙය වූ අතර එහිදී ඔවුන් ජය ලැබූ පළමු අවස්ථාවද මෙය විය.
මෙම තරගයට පෙර ‘ඩී’ කාණ්ඩයේ තෙවැනි ස්ථානයේ සිටි ක්‍රොයේෂියාව මෙම තරගයේදී ලැබූ ජයත් සමග එම කාණ්ඩයේ දෙවැනි ස්ථානය දක්වා ඉහළට පැමිණියේය. ඒ අනුව ‘ඩී කාණ්ඩයේ දෙවැනියා ලෙස අවසන් 16 දෙනාගේ වටයට සුදුසුකම් ලැබූ ක්‍රොයේෂියාව, ‘ඊ’ කාණ්ඩයේ දෙවැනි ස්ථානය ලබාගන්නා කණ්ඩායමට එරෙහිව මේ මස 28 වැනිදා තරග වැදීමට නියමිතය.
තරගයේ 17 වැනි විනාඩියේදී ක්‍රොඒෂියාව වෙනුවෙන් ගෝලයක් ලබාගත් නිකොලා ලැසික් සිය කණ්ඩායමට සාර්ථක ආරම්භයක් ලබාදුන්නේය. එම ගෝලය ලබාගැනීම සඳහා ලැසික් වෙත පන්දුව යොමුකරනු ලැබුවේ අයිවන් පෙරිසිච් විසිනි. එහෙත් 42 වැනි විනාඩියේදී ස්කොට්ලන්තය වෙනුවෙන් ගෝලයක් ලබාගත් කැලම් මැක්ග්‍රෙගර් පළමු අර්ධය නිමාවන විට ගෝල 1-1 ක් ලෙස තරගය සම තත්ත්වයට පත්කළේය.
කෙසේ වුවත් තරගයේ 62 වැනි විනාඩියේදී මාටියෝ කොවාචිස්ගේ සහයෝගයෙන් ගෝලයක් ලබාගත් ලූකා මොඩ්රික්, ඉන් නොනැවතී 77 වැනි විනාඩියේදී අයිවන් පෙරිසිච්ට ගෝලයක් ලබාගැනීම සඳහා සහය දැක්වූයේ ක්රොයේෂියාවට ගෝල 3-1 ක ජයක් අත්කර දෙමිනි. මෙම තරගාවලියේදී ක්‍රොයේෂියාව ලැබූ පළමු ජය මෙය වූ අතර මින් පෙර පැවැති තරගවලදී චෙක් ජනරජය හමුවේ ගෝල 1-1 ක් ලෙස සම වූ ක්‍රෙයේෂියාව, එංගලන්තය හමුවේ ගෝල 1-0 කින් පරාජයට පත් විය.
මෙම තරගයේදී ලැබූ පරාජයත් සමග ස්කොට්ලන්තයට අවසන් 16 දෙනාගේ වටයට සුදුසුකම් නොලබාම මෙවර තරගාවලියෙන් ඉවත් වීමට සිදුවිය. මින් පෙර පැවැති මූලික වටයේ තරගයකදී චෙක් ජනරජය හමුවේ ගෝල 2-0 කින් පරාජයට පත්වූ ස්කොට්ලන්තය, එංගලන්තයට එරෙහිව පැවැති තරගය ගෝල 0-0 ක් ලෙස ජය පැරදුමෙන් තොරව අවසන් ක‍රගත්තේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
