යූරෝ 2020 පාපන්දු තරගාවලියේ ‘ඒ’ කාණ්ඩය යටතේ ඊයේ (20 වැනිදා) පැවැති මූලික වටයේ තරගයකදී ගෝල 3-1 ක් ලෙස තුර්කිය පරාජය කළ ස්විට්සර්ලන්තය තවදුරටත් අවසන් 16 දෙනාගේ වටයට සුදුසුකම් ලබාගැනීමේ බලාපොරොත්තු රඳවාගැනීමට සමත් විය.
තරගය ආරම්භ වී විනාඩි 6 ක් ගතවන විට ගෝලයක් ලබාගත් හාරිස් සෙෆෙරොවිච් ස්විට්සර්ලන්තයට සාර්ථක ආරම්භයක් ලබාදුන්නේය. ඉන් අනතුරුව 26 වැනි විනාඩියේදී ස්විට්සර්ලන්තය වෙනුවෙන් දෙවැනි ගෝලය ලබාගත් හෙර්ඩාන් ෂකීරි, සිය කණ්ඩායමට පළමු අර්ධය අවසානයේ ගෝල 2-0 ක් ලෙස පෙරමුණ ගැනීමට අවස්ථාව උදාකර දුන්නේය.
තරගයේ 62 වැනි විනාඩියේදී හකෙන් චල්හෙනොග්ලුගේ සහයෝගයෙන් තුර්කිය වෙනුවෙන් ගෝලයක් ලබාගැනීමට නිහාත් කවේචි සමත් වූවද, එය ස්විට්සර්ලන්ත ජයග්‍රහණය වළක්වාලීමට තරම් ප්‍රමාණවත් නොවීය. එතැන් පටන් තවත් විනාඩි 6 ක් ගතවන විට (68 වැනි විනාඩියේදී) ස්විට්සර්ලන්තය වෙනුවෙන් තෙවැනි ගෝලයත් ලබාගත් හෙර්ඩාන් ෂකීරි, සිය කණ්ඩයමට ගෝල 3-1 ක ජයක් අත්කර දුන්නේය.
මූලික වටයේ තරග අවසනායේ කාණ්ඩ හයේ පළමු සහ දෙවැනි ස්ථාන හිමිකරගන්නා කණ්ඩායම් නිසැකවම අවසන් 16 දෙනාගේ වටයට සුදුසුකම් ලබාගන්නා අතර එම කාණ්ඩවල තෙවැනි ස්ථානවලට පත්වන කණ්ඩායම් 6 න් ඉහළම දස්කම් දක්වන කණ්ඩායම් 4 ටද අවසන් 16 දෙනාගේ වටයට පිවිසීමේ අවස්ථාව උදාවනු ඇත.
‘ඒ’ කාණ්ඩයේ පළමු සහ දෙවැනි ස්ථාන දිනාගත් ඉතාලිය (ලකුණු 9) සහ වේල්සය (ලකුණු 4) මේ වන විටත් එම කාණ්ඩයෙන් අවසන් 16 දෙනාගේ වටයට සුදුසුකම් ලබා සිටියි. ඊයේ තුර්කියට එරෙහිව පැවැති තරගයේදී ලැබූ ජයග්‍රහණයත් සමග ලකුණු 4 ක් ලබා සිටීම හේතුවෙන් ස්විට්සර්ලන්තයද අවසන් 16 දෙනාගේ වටයට සුදුසුකම් ලබාගැනීමට වැඩි ඉඩක් පවතී.
මූලික වටයේදී ක්‍රීඩා කළ තරග 3 න් තරගයක් ජයගෙන, තරගයක් පරාජය වී, සෙසු තරගය ජය පැරදුමෙන් තෙරව අවසන් කරගැනීමට ස්විට්සර්ලන්තය සමත්ව සිටියි. ඒ අනුව අවසන් 16 දෙනාගේ වටයට සුදුසුකම් ලබාගැනීමට ස්විට්සර්ලන්තයට හැකි වුවහොත් ‘ඒ’ කාණ්ඩයෙන් අවසන් වටයට පිවිසෙන තෙවැනි කණ්ඩායම බවට එය පත්වනු ඇත.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
