රියල් මැඩ්රිඩ් පිලේ ප්‍රංශ ජාතික පුහුණුකරු සි‍නෙඩින් සිඩෑන් මෙවර තරගවාරය නිමා වීමෙන් අනතුරුව එම තනතුරෙන් ඉවත්වන බව කණ්ඩායමේ ක්‍රීඩකයන්ට පවසා ඇතැයි ස්පාඤ්ඤ මාධ්‍ය වාර්තා කරයි. රියල් මැඩ්රිඩ් ක්‍රීඩා සමාජය මේ වන විට 34 වරක් ස්පාඤ්‍ඤයේ පළමු පෙළ පාපන්දු ශූරතාවලිය වන ලා ලීගා පාපන්දු ලීගයේ ශූරතාව දිනා ඇති අතර ඉන් 11 කටම ඔවුන් හිමිකම් කියා ඇත්තේ සිඩැන්ගේ පුහුණුකාරීත්වය යටතේය.
ප්‍රංශ ජාතික පාපන්දු කණ්ඩායමේ හිටපු නායකයකු වූ සිඩෑන්, 1998 වසරේදී පාපන්දු ලෝක කුසලාන දිනාගත් ප්‍රංශ කණ්ඩායමේ සාමාජිකයකු මෙන්ම එහි අවසන් මහ තර‍ගයේ වීරයාද විය. ඊට අමතරව ඔහු ලෝක පාපන්දු සම්මේලනය විසින් නම් කරන ලද වසරේ පාපන්දු ක්‍රීඩකයා ලෙසද අවස්ථා 3 කදී සම්මාන දිනා ඇත.
තමා කණ්ඩායමේ පුහුණුකාරීත්වයෙන් ඉවත්වන වන බව සිඩෑන් ක්‍රීඩකයන් සමග පවසා ඇත්තේ ඉකුත් සතියේ සෙවිලා ක්‍රීඩා සමාජයට එරෙහිව පැවැති තරගය 2-2 ක් ලෙස ජය පරාජයෙන් තොරව අවසන් වීමෙන් පසුවය. එම තරගය ජය ගැනීමට රියල් මැඩ්රිඩ් කණ්ඩායමට හැකි වූවා නම් ඔවුන්ට ලා ලීගා ලකුණු සටහනේ පෙරමුණ ගැනීමට‍ද අවස්ථාව තිබිණ.
මෙවර තරගාවලියේදී තරග 37 කට සහභාගි වෙමින් ජයග්‍රහණ 24 ක් ලබා සිටින රියල් මැඩ්රිඩ් කණ්ඩායම (ලකුණු 81) මේ වන විට ලා ලීගා ලකුණු සටහනේ දෙවැනි ස්ථානයේ පසුවෙයි. ඇට්ලෙටිකෝ මැඩ්රිඩ් (ලකුණු 83) කණ්ඩායම එහි පෙරමු‍ණේ රැදී සිටින්නේ සහභාගි වූ තරග 37 න් තරග 25 ක් ජයගනිමිනි.
ඉකුත් සතියේදී රියල් මැඩ්රිඩ් කණ්ඩායම සමග පැවැති තරගය ජය පරාජයෙන් තොරව අවසන් කළ සෙවිලා කණ්ඩායම (ලකුණු 74) තරග 37 කදී ජයග්‍රහණ 23 ක් ලබා ලකුණු සටහනේ සිව්වැනි ස්ථානයේ පසුවෙයි.
ඒ අනුව ඇට්ලෙටිකෝ මැඩ්රිඩ් කණ්ඩායමට වඩා රියල් මැඩ්රිඩ් කණ්ඩායම ලකුණු 2 ක් පසුපසින් සිටින අතර කණ්ඩායම් දෙකටම මෙවර තරග වාරයේ තවත් එක් තරගයක් බැගින් ඉතිරිව තිබේ.
මේ අතර ස්පාඤ්ඤ‍ෙයේ වාර්ෂික පාපන්දු තරගාවලියක් වන කෝපා ඩෙල් රේ තරගාවලියේ ජනවාරි මස පැවැති තරගයකදී රියල් මැඩ්රිඩ් කණ්ඩායම පරාජයට කිරීමට තෙවැනි පෙළ කණ්ඩායමක් වන ඇල්කොයානෝ කණ්ඩායම සමත් විය. ඉන් අනතුරුව ශූරයන්ගේ ලීග තරගාවලියේ අවසන් පූර්ව වටයේදීද රියල් මැඩ්රිඩ් කණ්ඩායම, චෙල්සි කණ්ඩායම හමුවේ පරාජයට පත් විය.
මෙවර තරග වාරයෙන් පසුවද තමා රියල් මැඩිරිඩ් කණ්ඩායම සමග රැඳෙනු ඇති දැයි මාධ්‍යවේදියකු නැගූ පැනයකට පිළිතුරු දීමේදී ඉදිරිය පිළිබඳව සහතිකයක් දීමට සිඩෑන් ඉක්මන් නොවීය.
“ඉදිරිය ගැන මට දැන්ම කියන්න බැහැ. දැනට මට කියන්න පුලුවන් අපි ලබන සතියෙදි තවත් තරගයක් ක්‍රීඩා කරනවා කියන එක විතරයි. නමුත් එම තරගයෙන් පසුව කුමක් සිදුවේවිද කියලා මම දන්නෙ නැහැ. මොකද මෙය රියල් මැඩ්රිඩ් කණ්ඩායමයි.” යැයි සිඩෑන් එම මාධ්‍ය හමුවේදී පැවැසීය.
මින් පෙර 2018 වසරේදීද සිඩෑන් රියල් මැඩ්රිඩ් කණ්ඩායමේ පුහුණුකාරීත්වයෙන් ඉවත්වූ අතර ඒ වන විට කණ්ඩායම පිට පිටම තෙවැනි වරටත් ලා ලිගා පාපන්දු ශූරතාව දිනා සිටියේය. කෙසේ වුවත් ඉන් මාස 10 කට පසුව ඔහු නැවත වරක් පුහුණුකරු ලෙස කණ්ඩායම සමග එක්විය.
2006 වසරේදී ජාත්‍යන්තර පාපන්දු පි‍ටියෙන් සමුගත් සිඩෑන්, ඒ සමගම රියල් මැඩ්රිඩ් කණ්ඩායමට ක්‍රීඩා කිරීමෙන්ද ඉවත් විය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
