ඇඩිලේඩ් නුවරදී දැන් පැවැත්වෙන අළු බඳුන තරගාවලියට සහභාගි නොවන හෙයින් ඕස්ටේ‍්‍රලියානු නායක පැට් කමින්ස්ට ආපසු ගෙදර යාමට ඕස්ටේ‍්‍රලියානු කි‍්‍රකට් ආයතනය අවසර දී තිබේ. ඇඩිලේඩ්හි ආපාන ශාලාවකදී, කොවිඞ් ආසාදිතයකු අසුන් ගත් මේසයකට යාබදව සිටිමින් ආහාර ගත් හෙයින් පැට් කමින්ස්ට දෙවැනි ටෙස්ට් තරගය අහිමි විය.
පැට් කමින්ස් වෙනුවට ස්ටීවන් ස්මත් ඕස්ටේ‍්‍රලියානු පිලේ තාවකාලික නායකයා වී සිටී.
බ‍්‍රහස්පතින්දා (16) පැවැති පී.සී.ආර්. පරීක්‍ෂණයකදී පැට් කමින්ස්ට කොරෝනා වයිරසය අසාදනය වී නැති බව තහවුරු වී තිබේ. ඒ අනුව වෙන්කරවාගත් ගුවන් යානයකින් ආපසු නිවෙස බලා යාමට දකුණු ඕස්ටේ‍්‍රලියානු සෞඛ්‍ය බලධාරීහු ජාතික කණ්ඩායමේ නායකයාට අවසර දුන්හ.
”අනුමත කර ඇති පිටව යාමේ කොන්දේසි අනුව ඔහු තමන්ගේ වාහනය පදවාගෙන ගුවන් තොටුපොළ වෙත යා යුතුය. එතැන් සිට වෙන්කරවාගත් ගුවන් යානයකින් තමන්ගේ ප‍්‍රාන්තය වෙත යා යුතුය” යයි ඕස්ටේ‍්‍රලියානු කි‍්‍රකට් ආයතනයේ නිවේදනයකින් කියැවේ.
නිව් සවුත් වේල්ස් ප‍්‍රාන්තයට ළඟාවීමෙන් පසුවද හුදෙකළාවීමේ සෞඛ්‍ය නීතිරීති අනුගමනය කිරීමට කමින්ස්ට සිදුවනු ඇත. කෙසේ වෙතත් බොක්සිං දිනයේදී (දෙසැම්බර් 26 වැනිදා) මෙල්බර්න් නුවරදී ඇරඹෙන ටෙස්ට් තරගය සඳහා කී‍්‍රඩා කිරීමට කමින්ස්ට අවසර තිබේ.
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
