රෝයල් චැලේන්ජර්ස් බැංගලෝර් කණ්ඩායමේ ප‍්‍රධාන පුහුණුකරු ලෙස සන්ජේ බංගාර් මහතා, ඉන්දීය ප‍්‍රිමියර් ලීග් තරගාවලියේ ඉදිරි වසර 2 සඳහා වැඩ භාර ගන්නා බව කණ්ඩායම් කළමණකාරීත්වය නිවේදනය කරයි. බැංගලෝර් පිලෙහි ප‍්‍රධාන පුහුණුකරු ලෙස හිටපු ඕස්ටේ‍්‍රලියානු ආරම්භක පිතිකරු සයිමන් කැටිච් මහතා වෙනුවට බංගාර් මහතා පත් කරනු ලැබ ඇත.
රවී ශාස්ත‍්‍රි මහතා සමඟින් ඉන්දීය කණ්ඩායමේ පිතිහරඹ පුහුණුකරුවා ලෙස කටයුතු කර ඇති සංජේ බංගාර් මහතා, මේ වසරේදී බැංගලෝර් පිලේ පිතිහරඹ උපදේශකවරයා ලෙස කටයුතු කර ඇත. මයික් හෙසන් බැංගලෝර් පිලේ ක්රිකට් අධ්‍යක්ෂවරයා ලෙස දිගටම කටයුතු කරනු ඇත.
බැංගලෝර් පිලේ ප‍්‍රධාන පුහුණුකරු ලෙස කටයුතු කළ හිටපු නවසීලන්ත පුහුණුකරු සයිමන් කැටිච් මහතා පුද්ගලික හේතූන් මත මෙවර ඉන්දිය ප‍්‍රිමියර් ලීග් තරගාවලියේ දෙවන භාගයෙන් ඉවත් වීමෙන් පසු ප‍්‍රධාන පුහුණුකාර ධුරයේ මයික් හෙසන් මහතා වැඩ බැලීය.
මෙවර ඉන්දීය ප‍්‍රීමියර් ලීග් තරඟාවලිය අවසන් වීමෙන් පසුව විරාට් කෝලි බැංගලෝර් පිලේ නායකත්වයෙන් ඉවත්ව ඇත. නායකත්වයෙන් ඉවත් වුවද පිතිකරුවකු ලෙස දිගටම ක්රීඩා කරන බව කෝලී පැවසීය.
”වෙන්දේසි ක‍්‍රමෝපාය අනුව අපගේ වැඩ දැනටමත් ආරම්භ කරලා තිබෙනවා. ශක්තිමත් සංචිතයක් ගොඩනැගීමට අපි කැපවී සිටින බවත් අයි.පී.එල්. කුසලානය දිනා ගැනීමේ දිගුකාලීන සිහිනය සැබෑ කර ගැනීමට අපි කැපවී සිටින බවත් බැංගලෝර් ක්රීඩා ලෝලීන්ට සහතික කිරීමට මම කැමැතියි,” යැයි නිවේදනයක් නිකුත් කරමින් බංගාර් මහතා කියා සිටියේය.
”ප‍්‍රධාන පුහුණුකරුගේ භූමිකාවෙන්, විශිෂ්ට කණ්ඩායමකට සේවය කිරීමට ලැබීම ගෞරවයක් වගේම අගනා අවස්ථාවක්. මම සංචිතයේ සුවිශේෂී සහ දක්ෂ සාමාජිකයින් කිහිප දෙනෙකු සමඟ වැඩ කර ඇති අතර මෙම කණ්ඩායම ඊළඟ මට්ටමට ගෙන යනතෙක් මට ඉවසීමක් නෑ” යයිද සංජ් බංගාර් මහතා කියයි.
- 2079
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
