මුවර්ස් ක්‍රීඩා සමාජයේ ඉදිරිපෙළ පිතිකරුවකු වන පසිඳු ශ්‍රී ලංකා ‘ඒ’ කණ්ඩායමේ නායකත්වයට තෝරාගනු ලැබ ඇත්තේ මූලික වශයෙන්ම පළමු පෙළ සහ එක්දින යන තරග ආකාර දෙකේදීම කණ්ඩායමේ ස්ථානය රඳවාගත හැකි පිතිකරුවකු වශයෙනි. ඔහු මීට පෙර ඇෆ්ඝනිස්තානු ‘ඒ කණ්ඩායමට එරෙහිව කොළඹ සරවනමුත්තු ක්‍රීඩාංගණයේදී පැවැති තරගයකදීත් ශ්‍රී ලංකා ‘ඒ’ පිල මෙහෙයවූයේය. 

 

පළමු පෙළ ශතක 8 කට හිමිකම් කියන පසිඳු පළමු පෙළ ඉනිමකදී රඳවාගෙන සිටින සාමාන්‍යය 54.88 කි. දේශීය එක්දින තරග 55 කදී ලකුණු 79.90 ක ප්‍රහාරාත්මක වේගයක් පවත්වාගෙන යන පසිඳු අර්ධ ශතක 12  ක් සමගින් ලබා සිටින ලකුණු සංඛ්‍යාව 1483 කි. එක්දින ඉනිමක සාමාන්‍යය 34.48 කි. 

 

ශ්‍රී ලංකා ‘ඒ’ එක්දින සංචිතය පළමුවෙන් දකුණු අප්‍රිකාව බලා පිටත්ව යන අතර ටෙස්ට් සංචිතයට ඇතුළත් ක්‍රීඩකයන් 6 දෙනා සැප්තැම්බර් මස මුලදි දකුණු අප්‍රිකාව බලා පිටත්ව යති. පළපුරුදු ටෙස්ට් පිතිකරුවකු වන ඕෂධ ප්‍රනාන්දු ද සමගින් තරුණ ක්‍රීඩකයන් වන අහන් වික්‍රමසිංහ, නිශාන් පීරිස්, ඉසිත විජේසුන්දර, විෂාද් රන්දික සහ ජනිත් ලියනගේ ටෙස්ට් සංචිතයට ඇතුළත්ව සිටිති.