නේපියර්හිදී පැවති පළමු එක්දින තරගය අතහැර දැමීමට පෙර හර්ෂිතා සමරවික්‍රම ශ්‍රී ලංකා කණ්ඩායමේ ගමන ස්ථාවර කිරීමට සූදානම් වෙමින් සිටියාය. හර්ෂිතා නොදැවී ලකුණු 66ක් රැස් කළ අතර ඕවර 36.4 ක් අවසානයේ ඇතිවූ වර්ෂාව හේතුවෙන් ශ්‍රී ලංකා කාන්තා කණ්ඩායම සහ නවසීලන්ත කාන්තා කණ්ඩායම අතර අද (04 වැනිදා) පැවැති පළමු එක්දින තරගය අතහැර දමන ලදි.
ඒ වන විට සංචාරක ශ්‍රී ලංකා කාන්තා කණ්ඩායම කඩුලු 5 කට ලකුණු 147ක් ලබා සිටියේය.
කාසියේ වාසිය දිනාගත් නවසීලන්ත නායිකා සුසී බේට්ස් පන්දුවට පහර දෙන ලෙස ශ්‍රී ලංකා කණ්ඩායමට ඇරයුම් කළාය. වරෙක ශ්‍රී ලංකා කණ්ඩායම කඩුලු 1 කට ලකුණු 70ක් ලබා සිටියද, ලකුණු 23 ක් ඇතුළත පිතිකාරිණියන් තිදෙනකු දැවී ගිය බැවින් 25 වැනි ඕවරයේදී ලකුණු පුවරුව දිස්වූයේ කඩුලු 4 ට ලකුණු 94 ක් ලෙසිනි.
සිය දෙවැනි එක්දින අර්ධ ශතකය සම්පූර්ණ කළ හර්ෂිතා සමරවික්‍රම ශ්‍රී ලංකා කණ්ඩායමේ ලකුණු සංඛ්‍යාව 147 ක් දක්වා ඉදිරියට ගෙන ගියේ සටනක් දිය හැකි ඉලක්කයක් නවසීලන්ත පිතිකාරිණයන් වෙත වීසි කිරීමේ අටියෙනි. එහෙත් වර්ෂාව හේතුවෙන් තවදුරටත් ක්‍රීඩා කිරීමට නොහැකි වූ අතර, පැය තුනක විවේකයකින් පසුව, විනිසුරුවරු තරගය අතහැර දැමූහ.
චමරි අතපත්තු මුලින්ම දැවී ගිය පිතිකාරිනිය වූවාය. පන්දු 21 කින් ලකුණු 9 ක් ලබා ගත් චමරි වේග පන්දු යවන්නී බී්‍ර ඊලිං හමුවේ දැවී ගියාය. එහෙත් සමරවික්‍රම සහ විශ්මි ගුණරත්න (30) එක්ව දෙවැනි කඩුල්ල වෙනුවෙන් ලකුණු 45 ක් එකතු කරමින් ලකුණු සංඛ්‍යාව 70 ක් දක්වා ඉදිරියට ගෙන ගියහ.
ජෙසී කර් විසින් දෙවැනි කඩුල්ලේ සම්බන්ධතාව බිඳ දමනු ලැබීමෙන් පසුව කවිෂා දිල්හාරි සහ කෝඩුකාරි මනුදි නානායක්කාර ද ඉක්මනින්ම දැවී ගියහ. එහෙත් සමරවික්‍රම නොසැලී තම කඩුල්ල ආරක්‍ෂා කරගත්තේ මුහුණ දුන් පන්දු 96 න් 7 ක්ම හතරේ සීමාවට යවමිනි.
තරඟාවලියේ ඊළඟ තරඟ දෙක සඳහා කණ්ඩායම් දැන් නෙල්සන් වෙත ගමන් කරයි. මෙම තරගය මේ මස 07 වැනිදා පැවැත්වේ.
ශ්‍රී ලංකා කාන්තාවෝ - ඕවර 36.4 කදී කඩුලු 5 ට 147 යි
(විශ්මි ගුණරත්න 30, හර්ෂිතා සමරවික්‍රම නොදැවී 66, නිලක්‍ෂිකා ද සිල්වා 17, බී්‍ර ඊලිං 42/2)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
