(අජිත්ලාල් ශාන්තඋදය)
කාම්බෝජයේ පැවැති පළමු වැනි පැරා ත්‍රෝ බෝල් තරගාවලියේ අනු ශූරතාව හිමිකර ගැනීමට ශ්‍රී ලංකා පැරා ත්‍රෝ බෝල් කණ්ඩායම සමත් විය. ශ්‍රී ලංකා පැරා ජාතික ත්‍රෝ බෝල් කණ්ඩායම සැදුම්ලත් වන්නේ යුද්ධයේ දී පා - දෙපා අහිමි වූ රණවිරුවන්ගෙනි.
මෙම තරගාවලිය කාම්බෝජයේ පොපේන් නගරයේ කාම්බොජියානු පැරා ඔලිම්පික් පුහුණු මධ්‍යස්ථාන ගෘහස්ථ ක්‍රීඩාංගණයේදී පසුගිය 28 වැනිදා ආරම්භ වූ අතර ඊට සහභාගි වීම සඳහා යුද්ධයේදී පා - දෙපා අහිමි වූ ක්‍රීඩකයන් නව දෙනෙකුගෙන් යුත් ශ්‍රී ලංකා ජාතික පැරා ත්‍රෝ බොල් කණ්ඩායම කාම්බෝජය බලා 27 දා දිවයිනෙන් පිටත්ව ගියේය.
මැලේසියානු සහ ඉන්දියානු කණ්ඩායම් දෙක සමග මූලික වටයේ තරගවලට සහභාගිවු ශ්‍රී ලංකා කණ්ඩායම එහිදී ජයග්‍රහණ ලබා අවසන් වටයට සුදුසුකම් ලැබීය. අවසන් තරග පැවැතියේ කාමිබෝජිනු කණ්ඩායම සහ ශ්‍රී ලංකා කණ්ඩායම අතරය.
එහිදී වට 5-3 ක් ලෙස තරගය ජය ගැනිමට කාම්බොජියානු කණඩායම සමත් විය. ඒ අනුව පළමු වැනි ආසියානු පැරා ත්‍රෝ බෝල් තරගාවලියෙ ශූරතාව කාම්බෝජයට හිමි වූ අතර අනු ශූරතාව ශ්‍රී ලංකා කණඩායමට හිමිවිය.
යුද්ධයේදී පා - දෙපා අහිමි රණවිරුවන් වු එම්. සුරංග විජේරත්න, ජේ.ඒ. ජයතිලක, ඩී.පී.කේ. සෝමසේකර, එම්.ජී. වික්‍රමරත්න, ඩබ්.එම්.එල්.ඩී.වී රසේකර, එම්.ජී.ජී.ඒ. බණ්ඩාර, ජී.ඒ.අයි.එම්. ගුණසේකර, එම්.ඩී.ජී.සුමිත් කරුණාරත්න, ඩබ්.එම්. ජයතිලක බණ්ඩා යන ක්‍රීඩකයින් පැරා ත්‍රෝ බෝල් ජාතික කණ්ඩායම නියෝජනය කළහ.
ඉන්දියාව, නේපාලය, බංගලාදේශය, මැලේසියාව, තායිලන්ත, කාම්බෝජය ආදි ආසියාතික රටවල පැරා ත්‍රෝ බොල් කණ්ඩායම් මෙහිදි තරග වැදුණි. ශ්‍රී ලංකා කණ්ඩායමේ කළමනාකරු, ජාතික ත්‍රෝ බොල් සම්මේලනයේ අනුශාසක, රත්නපුර කුමර විද්‍යාලයේ විදුහල්පති පියසිරි පතිරගේ මහතා කාම්බෝජයේ සිට දුරකතනයෙන් පැවසුවේ ආසියාවේ බලවත් රටවල් පරාජයට පත් කිරිමට ශ්‍රී ලංකා ක්‍රීකඩයින්ගේ දක්ෂතාව සහ ආත්ම විශ්වාසය මෙම ජයග්‍රහණයට හේතු වුණ බවය.
අයි.එන්කේ. රත්නායක සහ එම්.එල්.එන්. රිල්වාන් යන පුහුණුකරුවන් දෙදෙනාද, ත්‍රෝ බෝල් සංගමයේ සභාපති ටී.එච්.ඩී. චන්දන, ලේකම් එස්.එස්. වික්‍රමසිංහ සහ කමිටු සාමාජික මේජර්ඒ.එස්.එම්.සී.කේ. අත්තනායක යන මහත්ම මහත්මීහුද ජාතික ත්‍රෝබෝල් කණ්ඩායම සමග පිටත්ව ගියහ.
ආසියානු පැරා ත්‍රෝ බෝල් අනුශූරයෝ
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
