නිල් මහ සටනට අවසර ඉල්ලයි

(නාමල් පතිරගේ)

කොළඹ රාජකීය විදුහල හා ගල්කිස්ස ශාන්ත තෝමස් විදුහල අතර මෙම වසරේදී පැවැත්වීමට සූදානම් කර තිබෙන 142 වෙනි ‘නිල් මහ සටන’ වාර්ෂික මහා ක්‍රිකට් තරගය පැවැත්වීමට අවසර ඉල්ලා විදුහල් බලධාරීන් අධ්‍යාපන අමාත්‍යාංශය හා ක්‍රීඩා අමාත්‍යාංශයට ලිපි යොමු කර ඇතැයි වාර්තා වේ.

ඒ සඳහා අවසරය ලැබෙන්නේ නම්, කොවිඩ් නිවාරණ නීති රීති යටතේ, සැප්තැම්බර් මස 9, 10, 11 යන දිනවල සූරියවැව මහින්ද රාජපක්ෂ ජාත්‍යන්තර ක්‍රිකට් ක්‍රීඩාංගනයේදී 142 වෙනි ‘නිල් මහ සටන’ මහා තරගය පැවැත්වීමට මේ වනවිට සැලසුම් කර තිබේ. එම තරගය පසුගිය මැයි 6, 7, 8 යන දිනවල නරඹන්නන්ගෙන් තොරව සූරියවැව ක්‍රීඩාංගණයේදී පැවැත්වීමට සූදානම් කර තිබුණද කොවිඩ් වසංගතය පැතිරීම වේගවත් වීම හේතුවෙන් එය අත්හිටුවීමට තරග සංවිධායකයන්ට සිදු විය.

වර්ෂ 1880 දී ආරම්භ වූ ‘නිල් මහ සටන’ වාර්ෂික ක්‍රිකට් තරගය ලෝකයේ පැරණිම පාසල් ක්‍රිකට් තරගය ලෙස ලෝක ක්‍රිකට් වාර්තා පොතට එක්ව තිබේ.  කෙසේ වුවත් වසර 2020 මාර්තු මාසයේදී දේශීය වශයෙන් වසංගතයක් ලෙස කොවිඩ් රෝගය ඉස්මතුවීමට පෙර එම වසරට නියමිතව තිබූ 141 වෙනි ‘නිල් මහ සටන’ පවත්වා අවසන් කිරීමට තරග සංවිධායකයෝ සමත් වූහ.

මෙම වසරට නියමිත තරගයේ පූර්ව සංවිධාන කටයුතු පිළිබඳව විශේෂ සාකච්ඡාවක් දෙවිදුහලේ විදුහල්පතිවරුන්ගේ ප්‍රධානත්වයෙන් ‘සූම්’ තාක්ෂණය ඔස්සේ පසුගියදා පැවැත්විණි.