(නාමල් පතිරගේ)
වසර දෙකකට පසුව ශ්‍රී ලංකා වොලිබෝල් කණ්ඩායමේ විදේශ සංචාර අරඹමින් තායිලන්තයේ ‘පුකෙට්’ නුවරදී අඟහරුවාදා (23 වැනිදා) ආරම්භ වන ආසියානු වෙරළ වොලිබෝල් ශූරතා තරගාවලියට කාන්තා හා පිරිමි කණ්ඩායම් 4 ක් සහභාගි වී සිටිති. මෙම තරග මාලාව ලබන සෙනසුරාදා (27 වැනිදා) දක්වා රටවල් නවයක කාන්තා හා පිරිමි කණ්ඩායම් 36කගේ සහභාගිත්වයෙන් ‘පුකෙට්’ නුවරදී පැවැත්වීමට කටයුතු යොදා තිබේ.
ඒ සඳහා තෝරාගන්නා ලද ශ්‍රී ලංකා ජාතික වෙරළ (කාන්තා හා පිරිමි) වොලිබෝල් කණ්ඩායම් පසුගිය සිකුරාදා (19 වැනිදා) දිවයිනෙන් පිටත්ව ගියේය. මෙම තරගාවලියේ තරග සැලැස්ම ප්‍රකාශයට පත් කිරීම සිදුවන්නේ අඟහරුවාදා ඊට සහභාගි වන කණ්ඩායම් නායක නායිකාවන්ගේ සහභාගිත්වයෙන් සිදු කෙරෙන කුසපත් ඇදීමෙන් පසුවය.
ආසියානු වෙරළ වොලිබෝල් ශූරතා තරගාවලියේ වැදගත්කම වන්නේ, ඉරානය, ඕස්ට්‍රේලියාව හා කටාරය යන ඔලිම්පික් වෙරළ වොලිබෝල් තරගාවලියේ ක්‍රීඩා කළ ප්‍රබල රටවල් කිහිපයක් ද ඊට එක්ව සිටීමය. මෙවර තරගාවලියට සහභාගි වී සිටින ශ්‍රී ලංකාවේ කාන්තා හා පිරිමි කාණ්ඩ දෙකම ශ්‍රේණිගතකිරීම් අනුව 11 වැනි ස්ථානයේ පසු වෙති.
හෙයියන්තුඩුවේ තරුණ සේවා වොලිබෝල් පුහුණු මධ්‍යස්ථානයේදී ජෛව බුබුළක් යටතේ නේවාසික පුහුණුවීම් කළ ක්‍රීඩක ක්‍රීඩිකාවෝ 24 දෙනකුගෙන් යුත් සංචිතයකින් සංචාරක ශ්‍රී ලංකා කණ්ඩායම් තෝරාගෙන තිබේ.
ශ්‍රී ලංකාවේ වොලිබෝල් කණ්ඩායම් වසර 2019 පැවැති ආසියානු ශූරතා තරගාවලිය සහ13 වැනි සාග් ක්‍රීඩා උළෙලට සහභාගි වීමෙන් පසුව අන්තර්ජාතික තරග මාලාවකට සහභාගි වන පළමු අවස්ථාව මෙයයි. සාග් ක්‍රීඩා උළෙලේදී වාර්තාවක් පිහිටුවමින් ශ්‍රී ලංකාව කාන්තා හා පිරිමි කණ්ඩායම් රන් පදක්කම් දෙකත්, රිදී පදක්කම් දෙකත් දිනා ගත්හ.
අවසන් වරට පැවැති ආසියානු ශූරතා වෙරළ වොලිබෝල් තරග මාලාවේදී ශ්‍රී ලංකාවේ කාන්තා හා පිරිමි කණ්ඩායම් දෙකම 11 වැනි ස්ථාන හිමිකරගත්හ.
ආසියානු ශූරතා වෙරළ වොලිබෝල් තරග මාලාවට සහභාගි වන ශ්‍රී ලංකා කණ්ඩායම්
පිරිමි කණ්ඩායම්
සඳුන් මධුශංඛ සහ මලින්ත යාපා
ඉන්දික ටිරෝන් සහ අසේන් රස්මික
කාන්තා කණ්ඩායම්
දිනේෂා ප්‍රසාදි සහ දීපිකා බණ්ඩාර,
හසිනි මල්ෂා සහ නිර්මාණි ජයවර්ධන
කාර්ය මණ්ඩලය
ප්‍රධාන පුහුණුකරුවෝ - අසංක ප්‍රදීප් කුමාර (පිරිමි) සහ පුබුදු ඒකනායක (කාන්තා) යන මහත්වරු
කළමනාකරු - තුෂාර පෙරේරා මහතා
සහාය පුහුණුකාරිනි - තක්ෂිලා නිරංජලී මහත්මිය
ශ්‍රී ලංකා වෙරළ වොලිබෝල් කණ්ඩායම් ශ්‍රී ලංකා වොලිබෝල් සම්මේලනයේ සභාපති
කංචන ජයරත්න හා එහි ප්‍රධාන ලේකම් ඒ.එස්. නාලක යන මහත්වරු සමග.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
