අබුඩාබි දහයයි-10 තරගාවලියේ දසුන් ශානක නායකත්වය දරන චෙන්නායි බ්‍රේව්ස් කණ්ඩායමට එරෙහිව ඊයේ (20 වැනිදා) පැවැති තරගයෙන් ලකුණු 24 ක ජයක් අත්කර ගැනීමට ඩෙකෑන් ග්ලැඩියේටර්ස් කණ්ඩායම සමත් විය. එහිදී බ්‍රේව්ස් පිල වෙනුවෙන් වේගවත් පිතිහරඹයක නිරත වූ ඇන්ජලෝ පෙරේරා පන්දු 29 කදී හයේ පහර 2 ක් සහ හතරේ පහර 7 ක් සමග ලකුණු 60 ක් රැස්කළද ඔහුට සිය කණ්ඩායම ජයග්‍රහණය කරා ගෙන යෑමට නොහැකි විය.
ජයග්‍රහණය සඳහා ලකුණු 147 ක ඉලක්කයක් හඹාගිය බ්‍රේව්ස් කණ්ඩායමට ඕවර 10 අවසානයේ කඩුලු 4 ක් දැවී ලබාගත හැකි වූ‍යේ ලකුණු 122 ක් පමණි. ලකුණු 5 කට කඩුලු 2 ක් බිඳවැටී තිබියදී රවී බොපාරා (51) සමග එක්වූ ඇන්ජලෝ පෙරේරා තෙවැනි කඩුල්ල වෙනුවෙන් පන්දු 51 කදී ලකුණු 109 ක වේගවත් සම්බන්ධතාවක ගොඩනැගුවද බ්‍රේව්ස් කණ්ඩායම දිනවීමට තරම් එම සම්බන්ධතාව ප්‍රමාණවත් නොවීය.
ඇන්ජලෝ මෙන්ම බොපාරාද බ්‍රෙව්ස් ඉනිමේ අවසන් ඕවරයේදී පිටියෙන් ඉවත් කිරීමට ඔඩේන් ස්මිත් සමත් විය. පළමු ඕවරයේදී කඩුලු 2 ක් දවාගත් නායක වහබ් රියාස් ඩෙනකෑන් ග්ලැඩියේටර්ස් කණ්ඩායමට සාර්ථක ආරම්භයක් ලබාදුන්නේය. ආරම්භක පිතිකරු භානුක රාජපක්ෂ ලකුණු නොළබා දැවීගිය අතර එක් පන්දුවකට පමණක් මුහුණදුන් දසුන් ශානක හතරේ පහරක් සමග නොදැවී ලකුණු 4 ක් ලබා ඉනිම නිමාවන විට කඩුල්ලලේ රැදී සිටියේය.
පළමුවෙන් පන්දුවට පහරදුන් ඩෙකෑන් ග්ලැඩියේටර්ස් කණ්ඩායම ඕවර 10 අවසානයේ කඩුලු 3 ක් පමණක් දැවී ලකුණු 146 ක් ලබාගත්තේය. සිවුවැනි කඩුල්ල වෙනුවනේ පන්දු 32 කදී ලකුණු 94 ක නොබිඳුණ සම්බන්ධතාවක් ගොඩනැගූ ටොම් මූරස් (නොදැවී 47) සහ ඔන්ඩ්‍රි රසල් (නොදැවී 43) සිය කණ්ඩායමේ ලකුණු සංඛ්‍යාව 150 සීමාව සමීපයට රැගෙන ගියහ.
එහිදී පන්දු 17 කට මුහුණදුන් මූරස් හයේ පහර 5 කින් සහ හතරේ පහර 2 කින් සිය ඉනිම සැරසූ අතර පන්දු 17 කදී වාර්තා වූ රසල්ගේ ඉනිම හයේ පහර 4 කින් සහ හතරේ පහර 3 කින් සමන්විත විය. ආරම්භක පිතිකරු ටොම් බැන්ටන් පන්දු 11 කින් ලකුණු 24 ක් රැස්කළේ හයේ පහරක් සහ හතරේ පහර 3 ක් සමගිනි. ධනංජය ලක්ෂාන්ගේ ඕවර 2 දී ලකුණු 38 ක්ද, දසුන් ශානකගේ ඕවර 2 දී ලකුණු 21 ක්ද උදුරා ගැනීමට ඩෙකෑන් පිතිකරුවෝ සමත් වූහ.
ඩෙකෑන් ග්ලැඩියේටර්ස් පිල - ඕවර 10 කදී කඩුලු 3 කට 146
(ටොම් බැන්ටන් 24, අන්වර් අලී 14, ටොම් මූරස් නොදැවී 47, ඔන්ඩ්‍රි රසල් නොදැවී 43)
චෙන්නායි බ්‍රේව්ස් පිල - ඕවර 10 කදී කඩුලු 4 කට 122
(ඇන්ජලෝ පෙරේරා 60, රවී බොපාරා 51, වහබ් රියාස් 16/2, ඔඩේන් ස්මිත් 36/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
