සංචාරක නවසීලන්ත කණ්ඩායමට එරෙහිව කොල්කටාහිදී පැවැති තෙවැනි විස්සයි-20 තරගයෙන් ලකුණු 73 ක ජයක් ලැබූ ඉන්දීය කණ්ඩායම, දෙරට අතර පැවැති තරග 3 කින් සමන්විත විස්සයි-20 තරගාවලිය 3-0 ක් ලෙස ජයගැනීමට සමත් විය. තරගාවලිය පුරා ලකුණු අතර රැදෙමින් අර්ධ ශතක 2 ක් සමග ලකුණු 159 ක් රැස්කළ ඉන්දීය කණ්ඩායමේ නව නායක රෝහිත් ශර්මා තරගාවලියේ වීරයා ලෙස සම්මාන ලැබීය.
ජයග්‍රහණය සඳහා ලකුණු 185 ක ඉලක්කයක් හඹාගිය නවසීලන්ත කණ්ඩායම ඕවර 17.2 ක් අවසානයේ ලකුණු 111 කට සීමා කිරීමට අක්සර් පටේල් ප්‍රමුඛ ඉන්දීය පන්දු යවන්නෝ සමත් වූහ. ඕවර 3 ක් යවමින් ලකුණු 9 කට නවසීලන්ත කණ්ඩායමේ මුල් පෙළ කඩුලු 3 ක් බිඳහෙළු අක්සර් පටේල් තරගයේ වීරයා ලෙසද සම්මාන ලැබීය. එහිදී ඔහුට අනගි සහායක් දුන් හර්ෂාල් පටේල් ලකුණු 26 කට කඩුලු 2 ක් දවාගත්තේය.
පිතිකරුවන් 7 දෙනෙක්ම ලකුණු 10 සීමාව පසුකර යෑමටත් පෙර දැවී යද්දී වේගවත් පිතිහරඹයක නිරත වූ ආරම්භක පිතිකරු මාටින් ගප්ටිල් පන්දු 36 කදී හයේ පහර 4 ක් සහ හතරේ පහර 4 ක් සමග ලකුණු 51 ක් රැස්කළේය. ඔහු හැරුණුකොට ලකුණු 10 සීමාව පසුකර ගිය සෙසු නවසීලන්ත පිතිකරුවන් දෙදෙනා වූයේ ටිම් සෙයිෆර්ට් (17) සහ ලොකී ෆර්ගසන් (14) පමණි.
කාසියේ වාසිය දිනා පළමුවෙන් පන්දුවට පහරදුන් ඉන්දීය කණ්ඩායම ඕවර 20 අවසානයේ කඩුලු 7 ක් දැවී ලකුණු 184 ක් ලබාගත්තේය. පිට පිටම දෙවැනි අර්ධ ශතකය ලබාගත් නායක රෝහිත් ශර්මා එහිදී පන්දු 31 කින් ලකුණු 56 ක් රැස්කළේ හයේ පහර 3 ක් සහ හතරේ පහර 5 ක් සමගිනි. ඉෂාන් කිෂන් (29) සමග එක්ව ආරම්භක කඩුල්ල වෙනුවෙන් පන්දු 38 කදී ලකුණු 69 ක සම්බන්ධතාවක් ගොඩනැගීමටද ශර්මා සමත් විය.
පන්දු 21 කට මුහුදුන් කිෂන් හතරේ පහර 6 කින් සිය ඉනිම සැරසීය. ශ්‍රෙයාස් අයියර් පන්දු 20 කදී හතරේ පහර 2 ක් සමග ලකුණු 25 ක්ද, වෙන්කටේෂ් අයියර් පන්දු 15 කදී හයේ පහරක් සහ හතරේ පහරක් සමග ලකුණු 20 ක්ද, දීපක් චාහර් පන්දු 8 කදී හයේ පහරක් සහ හතරේ පහර 2 ක් සමග නොදැවී ලකුණු 21 ක්ද රැස්කරමින් ඉන්දීය ඉනිමේ ලකුණු සංඛ්‍යාව ඉහළ දැමූහ.
ඉන්දියාව - ඕවර 20 කදී කඩුලු 7 කට 184
(රෝහිත් ශර්මා 56, ඉෂාන් කිෂන් 29, ශ්‍රෙයාස් අයියර් 25, වෙන්කටේෂ් අයියර් 20, හර්ෂාල් පටේල් 18, දීපක් චාහර් නොදැවී 21, මිචෙල් සෑන්ට්නර් 27/3)
නවසීලන්තය - ඕවර 17.2 කදී කඩුලු 7 කට 111
(මාටින් ගප්ටිල් 51, ටිම් සෙයිෆර්ට් 17, ලොකී ෆර්ගියුසන් 14, අක්සර් පටේල් 09/3, හර්ෂාල් පටේල් 26/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
