(රොෂාන් ගුණරත්න)
අද පැවැත්වීමට නියමිතව තිබූ අන්තර් සමාජ සීමිත ඕවර තරගාවලියේ ඒස් කැපිටල්ස් පිල සහ කෝල්ට්ස් අතර තරගය ආරම්භ කිරීමටත් පෙරම නතර කළද එම තරගයත් ඇතුළුව තරග 4 ක් ක්රීඩා කිරීමේ අවස්ථාව ඒස් කැපිටල් පිලට හිමිවනු ඇත. ඒස් කැපිටල් ක්රීඩා සමාජයේ ක‍්‍රීඩකයන් දෙදෙනෙකුට කොරෝනා වයිරසය වැළඳීම හේතුවෙන් කෝල්ට්ස් ක්රීඩා සමාජය සමගින් පැවැත්වීමට නියමිතව තිබූ තරගය නතර කරන ලෙස ශ්‍රී ලංකා ක්රිකට් ආයතනය අද උදෑසන දැනුම් දුන්නේය.
ඒස් කැපිටල් පිලට ඉදිරි දින 3 තුලදී පානදුර, බ්ලූම්ෆීල්ඞ්, එස්.එස්.සී යන කණ්ඩායම් සමගින් තරග කිරිම සඳහා මූලික වටයේ තවත් තරග 3 ක් ඉතිරිව තිබුණි.
තරගාවලියේ නීති සහ රෙගුලාසී වලට අනුව යම් කණ්ඩායමක ක‍්‍රීඩයකුට කොරෝනා වයිරසය ආසාදනය වුවහොත් ඔහුව ඉවත් කර අනෙක් ක‍්‍රීඩකයන් සමගින් තරගාවලියට එක්වීමේ අවස්ථාව එම කණ්ඩායමට ඇති බව දේශීය තරගාවලි ප‍්‍රධානී චින්තක එදිරිමාන්න මහතා ලංකාදීපයට පැවසීය.
එබැවින් ඒස් කැපිටල් ක්රීඩා සමාජයට දින 3 ක කාලයක් ලබාදෙන අතර එම දින 3 න් පසුව පී.සී.ආර්. පරීක්‍ෂණයක් සිදුකර ප‍්‍රතිඵලය ඍණාත්මක වුවහොත් තරගාවලියේ කාලසටහන වෙනස් කරමින් ඔවුන්ගේ ඉතිරි තරග පැවැත්වීමට අවස්ථාව ලබාදෙන බවද එදිරිමාන්න මහතා වැඩිදුරටත් කීවේය.
”මේ වනවිට ඔවුන් තරගාවලියේ 80% ක් පමණ තරග ක්රීඩා කරලා තියෙනවා. ඔවුන්ට අවස්ථාවක් ලබාදෙන එක සාධාරණයි”
”අපි තවමත් ඉන්නේ ඔවුන්ට තරගාවලියට එක්වෙන්න පුලූවන් කියන මතයේ. එසේ නොවුන හොත් දෙවැනි සැලැස්ම විදියට ඔවුන්ව ඉවත් කරලා පැවැත්වීමට නියමිතව ඇති ඉදිරි තරගවල ප‍්‍රසාද ලකුණු ප‍්‍රතිවාදීන්ට පිරිනමනවා. පැවැත්වුන තරගවල ලකුණු අයින් කළොත් ජයග‍්‍රහණය කළ කණ්ඩායම් වලට අසාධාරණයක් වෙනවා. තරගාවලි කමිටුව ඉදිරියේදී ඒ ගැන තීරණයක් ගනීවි” යයිද චින්තක එදිරිමාන්න මහතා පැවසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
