‘සී’ කාණ්ඩය යටතේ ඊයේ (21 වැනිදා) පැවැති මූලික වටයේ තරගයකදී ගෝල 1-0 ක් ලෙස යුක්රේනය පරාජය කළ ඔස්ට්‍රියාව, යූරෝ පාපන්දු ඉතිහාසයේ පළමු වරට අවසන් 16 දෙනාගේ වටයට සුදුසුකම් ලබාගැනීමට සමත් විය. ඩේවිඩ් ආලබාගේ සහයෝගයෙන් 21 වැනි විනාඩියේදී ක්‍රිස්ටෝෆ් බාම්ගාට්නර් ඔස්ට්‍රියාව වෙනුවෙන් ජයග්‍රාහී ගෝලය වාර්තා කළේය.
මෙම තරගයට පෙර ‘සී’ කාණ්ඩයේ තෙවැනි ස්ථානයේ පසුවූ ඔස්ට්‍රියාව මෙම තරගයේදී ලැබූ ජයත් සමගින් එම කාණ්යේ දෙවැනි ස්ථානය හිමිකරගනිමින් අවසන් 16 දෙනාගේ වටයට පිවිසියේය. මූලික වටයේ සෙසු තරගවලදී නෙදර්ලන්තය හමුවේ ගෝල 2-0 ක් ලෙස පරාජයට පත්වූවත්, උතුරු මෙසිඩෝනියාවට එරෙහිව ගෝල 3-1 ක ජයක් වාර්තා කළ ඔස්ට්‍රියාව, මේ මස 26 වැනිදා අපරාජිත ඉතාලියට එරෙහිව අවසන් 16 දෙනාගේ වටයේදී තරග බිමට පිවිසීමට නියමිතය.
මෙම තරගයට පෙර ‘සී’ කාණ්ඩයේ දෙවැනි ස්ථානයේ පසු වූ යුක්රේනය, මෙම තරගයේදී ලැබූ පරාජයත් සමග එම කාණ්ඩයේ තෙවැනි ස්ථානය දක්වා ඇද වැටිණ. කෙසේ වුවත් යුක්රේනයට තවමත් අවසන් 16 දෙනාගේ වටයට සුදුසුකම් ලබාගැනීමේ අවස්ථාව පවතින අතර ඒ සඳහා ඔවුන්ට මූලික වටයේ සෙසු තරග අවසන් වන තෙක් බලා සිටීමට සිදුවනු ඇත. මූලික වටයේ සෙසු තරගවලදී නෙදර්ලන්තය හමුවේ ගෝල 3-2 ක් ලෙස පරාජයට පත්වූ යුක්රේනය, උතුරු මෙසිඩෝනියාවට එරෙහිව ගෝල 2-1 ක ජයක් වාර්තා කළේය.
මූලික වටයේ තරග අවසානයේ කාණ්ඩ හයේ පළමු සහ දෙවැනි ස්ථාන හිමිකරගන්නා කණ්ඩායම් නිසැකවම අවසන් 16 දෙනාගේ වටයට සුදුසුකම් ලබාගන්නා අතර එම කාණ්ඩවල තෙවැනි ස්ථානවලට පත්වන කණ්ඩායම් 6 න් ඉහළම දස්කම් දක්වන කණ්ඩායම් 4 ටද අවසන් 16 දෙනාගේ වටයට පිවිසීමේ අවස්ථාව උදාවනු ඇත.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
