(නාමල් පතිරගේ)
ජාතික ක්‍රීඩා සංගම් හයක් අහෝසි කිරීම සඳහා වන අති විශේෂ ගැසට් නිවේදනයට ක්‍රීඩා ඇමැති නාමල් රාජපක්‍ෂ මහතා අත්සන් කර තිබේ. පසුගිය වසර කීපයක් තුළ කිසිදු ක්‍රියාකාරිත්වයක් නොපෙන්වූ බව කියන එමෙන්ම ස්ථිර ලිපිනයක් තහවුරු කර ගැනීමට නොහැකිව තිබෙන බව පැවසෙන ජාතික ක්‍රීඩා සංගම් හයක ලියාපදිංචිය අහෝසි කිරීමට ක්‍රීඩා අමාත්‍යාංශය කටයුතු කර තිබේ.
ශ්‍රී ලංකා ‘පවර්බෝට්’ සංගමය, ශ්‍රී ලංකා යුනිෆයිට් සම්මේලනය, ශ්‍රී ලංකා සැම්බෝ සම්මේලනය, ශ්‍රී ලංකා ජු-ජිට්සු සම්මේලනය, ශ්‍රී ලංකා ස්ක්‍රැබල් සම්මේලනය හා ශ්‍රී ලංකා බ්‍රිජ් සම්මේලනය අහෝසි කළ ජාතික ක්‍රීඩා සංගම් වෙති.
ජාතික ක්‍රීඩා සංගම් 6 ක් අහෝසි කිරීම හේතුවෙන් ක්‍රීඩා අමත්‍යාංශයේ ලියාපදිංචි ජාතික ක්‍රීඩා සංගම් නාමලේඛනය 71 සිටි 65 ක් දක්වා අඩුවී තිබේ. ශ්‍රී ලංකා බාල් නැටුම් (බෝල්රූම්) සම්මේලනය මීට ප්‍රථම අහෝසි කර දැමීමට ක්‍රීඩා අමාත්‍යාංශය කටයුතු කළේය.
කිසිදු ක්‍රියාකාරිත්වයක් නොපෙන්වන සංගම් තබා ගැනීම ක්‍රීඩා අමාත්‍යාංශයට අනවශ්‍ය ප්‍රශ්නයක් වී ඇතැයි ඒ පිළිබඳව ලංකාදීපයට අදහස් දැක්වූ එහි ප්‍රකාශකයෙක් පැවසීය.
මේ අතර ශ්‍රී ලංකා සුළංඔරු (සර්ෆින්) සම්මේලනය යළි ක්‍රියාකාරි කෙරෙන තෙක් එහි පරිපාලන කටයුතු පවත්වාගෙන යාම සඳහා අතුරු කමිටුවක් පත් කිරීමට ද ක්‍රීඩා අමාත්‍යාංශය කටයුතු කර තිබේ. ශංඛ මතීෂ කරුණාරත්න, නලින් හේමකුමාර, සන්දීප තුෂාර, ලාලක සංජීව පල්ලියගුරු යන මහත්වරු හා එච්.පී.ජී. සමන්තා මහත්මිය එම කමිටුවේ සමාජික සමාජිකාවෝ වෙති. කෙසේ වුවත් ඒ සඳහා ප්‍රධානියකු නිර්දේශ වී නැත.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
