(නාමල් පතිරගේ)
දෙසැම්බර් 28 වැනිදා පැවැත්වීමට නියමිත ජාතික ඔලිම්පික් කමිටුවේ නිලවරණයේදී (2022 – 26) ජාතික ක්‍රීඩා සංගම් තුනක ක්‍රීඩා අමාත්‍යාංශය පිළිගත් විධායක සභා ප්‍රධානීන්ගේ ඡන්ද බලය අහෝසිකර තිබේ. ඒ වෙනුවට එකී ජාතික ක්‍රීඩා සංගම්හි හිටපු ප්‍රධානීන්ට ජාතික ඔලිම්පික් කමිටුවේ මීළඟ නිලවරණයේදී ඡන්දය ප්‍රකාශ කිරීමේ අවස්ථාව සලසාදී තිබේ.
ජාතික ඔලිම්පික් කමිටුව ඒ පිළිබඳව අවධාරණය කර ඇත්තේ අන්තර් ජාතික ක්‍රීඩා සම්මේලන තවදුරටත් එකී ජාතික ක්‍රීඩා සංගම්හි හිටපු ප්‍රධානීන්ට ශ්‍රී ලංකාව වෙනුවෙන් නීත්‍යානුකූලව පිළිගැනීම ලබාදී තිබීම නිසා තමන්ට ද ඒ අනුව කටයුතු කිරීමට සිදුව ඇති බව පවසමිනි.
ජාතික ඔලිම්පික් කමිටුවේ 2021 වාර්ෂික මහ සභා රැස්වීම පෙරේදා (27) පස්වරුවේ එම කමිටු ශ්‍රවණාගාරයේදී පැවැත්විණි. ප්‍රධාන වශයෙන් ගිණුම් වාර්තාව අනුමත කර ගැනීම සඳහා මෙම මහා සභා රැස්වීම කැඳවා තිබුණත් එහිදී කමිටුවේ මීළඟ නිලවරණය (2022 – 26) ලබන දෙසැම්බර් 28 වැනිදා පැවැත්වෙන බව මූලාසනයෙන් ප්‍රකාශයට පත්විය.
ජාතික ඔලිම්පික් කමිටුවේ සභාපති සුරේෂ් සුබ්‍රමනියම් හා එහි මහ ලේකම් මැක්ස්වල් ද සිල්වා යන මහත්වරුන්ගේ ප්‍රධානත්වයෙන් මෙම මහා සභා රැස්වීම පැවැත්වෙද්දී ජාතික ක්‍රීඩා සංගම් නියෝජිතයන්ගෙන් පිරිසක් ඊට සහභාගී වූයේ සූම් තාක්ෂණය ඔස්සේය.
ඒ අනුව ශ්‍රී ලංකා ජල ක්‍රීඩා සංගමය, ශ්‍රී ලංකා පාපැදි සම්මේලනය හා ශ්‍රී ලංකා අත්පන්දු (හෑන්ඩ් බෝල්) සම්මේලනය යන ජාතික ක්‍රීඩා සංගම්හි හිටපු පරිපාලන ප්‍රධානීන්ට නිලවරණයේදී ඡන්ද බලය හිමිවන බව ප්‍රකාශයට පත් විය.
කෙසේ වුවත් ශ්‍රී ලංකා ජල ක්‍රීඩා සංගමයේ වත්මන් සභාපති නේතෲ නානායක්කාර මහතා මහා සභා රැස්වීමේදී අවධාරණය කර සිටියේ ක්‍රීඩා අමාත්‍යාංශය පිළිගත් නිලවරණයකින් පත් වූ තමාට ජාතික ඔලිම්පික් කමිටුවේ නිලවරණය අහිමි කිරීම යුක්ති සහගත නොවන බැවින් ඒ පිළිබඳව ඔලිම්පික් කමිටුව තවදුරටත් පසුවිපරමක් සිදුකළ යුතු බවයි.
මේ අතර නේතෲ නානායක්කාර මහතා ‘‘ලංකාදීප’’යට පැවසුවේ ඉදිරියේදී තමා මේ සම්බන්ධයෙන් නීති උපදෙස් ලබා ගැනීමට කටයුතු කරමින් සුදුසු ක්‍රියාමාර්ගවලට පිවිසෙන බවයි. මෙම තත්ත්වය අනුව ජල ක්‍රීඩා සංගමය වෙනුවෙන් නිලවරණයේදී ඡන්ද බලය හිමිවන්නේ හිටපු සභාපති මහින්ද ලියනගේ මහතාටය.
ශ්‍රී ලංකා පාපැදි සම්මේලනයේ අප්‍රේල් 6 වැනිදා පැවැති නිලවරණයට පෙර සභාපති ධුරය දැරූ අන්තර්ජාතික පාපැදි විනිසුරු එන්. කරුණාරත්න මහතා තවදුරටත් එම ධුරයේ කටයුතු කරන බවට තමන් පිළිගන්නා බව අන්තර්ජාතික පාපැදි සම්මේලනය ජාතික ඔලිම්පික් කමිටුවට දැනුම් දී තිබේ. එබැවින් දෙසැම්බර් 28 වැනිදා පැවැත්වෙන නිලවරණයේදී පාපැදි සම්මේලනය වෙනුවෙන් ඡන්දය ප්‍රකාශ කිරීමේ අයිතිය ඔහුට හිමිවන බව පෙරේදා රැස්වීමේදී ප්‍රකාශ වී තිබේ.
මෙම තත්ත්වයම ශ්‍රී ලංකා හෑන්ඩ්බෝල් සම්මේලනයේද උද්ගතව තිබෙන බැවින් ඔලිම්පික් කමිටු ප්‍රධානීන් අවධාරණය කර ඇත්තේ එහිදී හිටපු ප්‍රධානීන්ට සිය නිලවරණයේදී ඡන්දය ප්‍රකාශය කිරීමේ හිමිකම ලැබෙන බවයි.
මේ අතර ගිණුම් වාර්තාව ඒකමතිකව මහා සභාවේදී අනුමත වී තිබේ. දෙසැම්බර් 28 වැනිදා පැවැත්වෙන නිලවරණය මෙහෙයවීම සඳහා ක්‍රීඩා අමාත්‍යාංශයේ හිටපු ලේකම්වරුන් තිදෙනකුගෙන් සමන්විත කමිටුවක් ද පෙරේදා නිර්දේශ කරගැණුනි.
ආචාර්ය ආර්.එම්.කේ. රත්නායක මහතා ප්‍රධානත්වය දරන එහි සෙසු සාමාජිකයන් වන්නේ එස්. රනුග්ගේ හා අනුර ජයවික්‍රම යන මහත්වරුන්ය.
කෙසේ වුවත් නිලවරණ කමිටුවේ සභාපති ධුරය සඳහා ජනාධිපති නීතිඥ පාලිත කුමාරසිංහ මහතාගේ නාමයෝජනාවද ජාතික ක්‍රීඩා සංගම් කීපයක් විසින් යෝජනා කර තිබේ.
එහිදී ඡන්ද විමසුමක් සිදු කෙරුණු අතර ඡන්ද 22 – 13 ට ආර්.එම්.කේ. රත්නායක මහතාගේ නාමයෝජනාව සභාපති ධුරයට අනුමත විය.
වසර 2018 පෙබරවාරි 23 වැනිදා අවසන් වරට පැවැති නිලවරණයේදී සභාපති ධුරයට පත් වත්මන් සභාපති සුරේෂ් සුබ්‍රමනියම් මහතා මෙවරත් සභාපති ධුරයට නාමයෝජනා බාරදීමට සූදානම්ව සිටියි.
ඒ අතර ශ්‍රී ලංකා රුවල් ඔරු සංගමයේ හිටපු සභාපති හා එහි වත්වමන් විධායක සභික රොහාන් ප්‍රනාන්දු මහතාද සභාපති ධුරයට තරග වැදීමට අපේක්‍ෂාවෙන් පසුවේ.
ශ්‍රී ලංකා ජූඩෝ සම්මේලනයේ උප භාණ්ඩාගාරිකවරයා ලෙස වත්මන් මහ ලේකම් මැක්ස්වල් ද සිල්වා මහතා තවත් වාරයකට එම ධුරයට නාමයෝජනා බාරදීමට නියමිතය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
