(නාමල් පතිරගේ)
එළඹෙන අඟහරුවාදා (01) පැවැත්වීමට නියමිත ශ්‍රී ලංකා පාපන්දු සම්මේලනයේ නිලවරණය සඳහා පාපන්දු පරිපාලනය තහනම් කර ඇති අයවෙතින් බලපැම් එල්ලවී ඇතැයි චෝදනා කරමින් සභාපති අපේක්ෂක ජස්වර් උමාර් මහතා අන්තර් ජාතික පාපන්දු සම්මේලනයට, ආසියානු පාපන්දු සමුළුවට හා ක්‍රීඩා අමාත්‍යාංශයට පැමිණිලි ඉදිරිපත් කර තිබේ.
කොළඹදී අද (25) පැවැති විශේෂ මාධ්‍ය හමුවකදී ඔහු පැවැසුවේ නිලවරණයේදී සිය ප්‍රතිවිරුද්ධ පාර්ශ්වයන්ට සහයෝගය දක්වමින් මැදිහත්වීම් කරන, පාපන්දු තහනමට ලක්වූ තැනැත්තකු පිළිබඳව හෙළිදරව්වී තිබෙන බවයි. ඒ පිළිබඳව අන්තර්ජාතික පාපන්දු සම්මේලනය දැනුවත් කිරීමට තමන් කටයුතු කළ ජස්වාර් උමාර් මහතා වැඩිදුරටත් පැවැසීය.
මෙවර පාපන්දු නිලවරණයේදී පාපන්දු ලීග 41 ක් සභාපති අපේක්ෂක වෛද්‍ය මනිල් ප්‍රනාන්දු මහතාගේ නාමයෝජනාවට අනුමැතිය දෙමින් අත්සන් කළද සිය පාර්ශ්වයේ ජයග්‍රහණයට එය කිසිදු බලපෑමක් නොවන බවද ජස්වාර් උමාර් මහතා පවසයි. දැනට ගණන් බලා තිබෙන අන්දමට මුළු ඡන්ද එකතුව වන ඡන්ද 186 න් 115 ක්ම ලබා වැඩි ඡන්ද ගණනකින් නිලවරණය ජය ගැනීමේ හැකියාව කෙරෙහි සිය පාර්ශ්වය ඉහළින්ම විශ්වාසය තබන බවත් මේ වනවිට පාපන්දු සම්මේලනයේ ලේකම්ධුරය ද දරන ජස්වර් උමාර් මහතා වැඩිදුරටත් පැවසීය.
මේ අතර අඟහරුවාදා (01) පැවැත්වීමට සැළසුම් කර තිබෙන පාපන්දු සම්මේලනයේ නිලවරණය එදිනම පවත්වා අවසන් කිරීමට උනන්දුවී සිටින ක්‍රීඩා අමාත්‍යාංශය ඒ සඳහා එදින නියෝජිතයන්ට බාධාවකින් තොරව කොළඹ බණ්ඩාරනායක සම්මන්ත්‍රණ ශාලාවට රැස්වීම සඳහා ගමන් අවසර පත් නිකුත් කිරීමට සුදානම් වනබවද වාර්තාවේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
