නව කොරෝනා ප්‍රභේදයක් වන ඔමික්‍රෝන් හේතුවෙන් මේ වනවිට ලොව පුරා ඇතිවී තිබෙන තර්ජනය පිළිබඳව සාකච්ඡා කිරීමට වැඩි කාලයක් අවශ්‍ය බැවින් ඉන්දීය කණ්ඩායමේ දකුණු අප්‍රිකානු සංචාරයේ ආරම්භය සතියකින් පසුපසට තල්ලු කිරීමට සලකා බලන ලෙස ඉන්දීය ක්‍රිකට් පාලක මණ්ඩලය විසින් දකුණු අප්‍රිකානු ක්‍රිකට් ආයතනයෙන් ඉල්ලා ඇත.
ඉන්දීය පිලේ දකුණු අප්‍රිකානු සංචාරය දෙසැම්බර් 17 සිට ජනවාරි 26 දක්වා කාලය තුළ පැවැත්වේ. එහිදී දකුණු අප්‍රිකාව සහ ඉන්දියාව අතර ටෙස්ට් තරග 3 ක් එක්දින තරග 3 ක් සහ විස්සයි20 තරග 4 ක් පැවැත්වීමට නියමිතය.
නවසීලන්තයට එරෙහිව පැවැත්වෙන 2 වැනි ටෙස්ට් තරගය හෙට (03 වැනිදා) මුම්බායි නුවරදී ආරම්භ වේ. දෙසැම්බර් 8 හෝ 9 ඉන්දීය කණ්ඩායම, දකුණු අප්‍රිකාව බලා පිටත්ව යාමට නියමිතව තිබිණ. නමුත් එය දෙසැම්බර් 15 හෝ 16 දක්වා කල් යනු ඇත.
කොවිඞ් වයිරසයෙන් බලපෑමක් ඇති නොවන්නේ නම් පමණක් ඉන්දීය ක්‍රිකට් පාලක මණ්ඩලය විසින් ක්‍රීඩකයන් දකුණු අප්‍රිකාවේ සංචාරය සඳහා යවනු ඇත.
නව කොරෝනා ප්‍රභේදය පිළිබඳව නොතකා සංචාරය ඉදිරියට ගෙනයාමට ඉන්දීය ක්‍රිකට් පාලක මණ්ඩලය සහ දකුණු අප්‍රිකානු ක්‍රිකට් ආයතනය උනන්දු වෙති. සිව්දින නිලනොවන ටෙස්ට් තරග 3 ක් සඳහා දැනට දකුණු අප්‍රිකාවේ සංචාරයක නිරතව සිටින ඉන්දීය ‘ඒ’ කණ්ඩායම නැවත කැඳවීමට ඉන්දිය ක්‍රිකට් පාලක මණ්ඩලය කටයුතු නොකිරීමද සැලකිය යුතු කරුණකි.
දකුණු අප්‍රිකානු සංචාරයෙන් පසු නැවත ජනවාරි මාසයේ ආපසු පැමිණීමේදී ක්‍රීඩකයන්ට දැඩි නිරෝධායනයකට ලක් කරන ලෙස ඉල්ලා සිටියහොත් කුමක් සිදුවේද යන්න පිළිබඳව ඉන්දීය ක්‍රිකට් පාලක මණ්ඩලය සැලකිලිමත් වේ. ඔමික්‍රෝන් තර්ජනය හේතුවෙන් නෙදර්ලන්තය සහ දකුණු අප්‍රිකාව අතර තරග 3 කින් සමන්විත එක්දින තරගාවලියක් ද කල් දමන ලදි.
කෙසේ වෙතත්, ටෙස්ට් සහ සීමිත ඕවර තරඟාවලි සඳහා ඉන්දීය ක්‍රිකට් ක්‍රීඩකයින්ට සත්කාරකත්වය සැපයීමට බලාපොරොත්තු වන බවත් ඔමික්‍රෝන් තර්ජනය මධ්‍යයේ වුවද ක්‍රීඩකයින්ගේ ආරක්ෂාව සහතික කරන බව දකුණු අප්‍රිකානු රජය පැවසයි.
- 2079
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
