(රොෂාන් ගුණරත්න)
ඒස් කැපිටල් ක්රීඩා සමාජයේ ක‍්‍රීඩකයන් දෙදෙනෙකුට කොරෝනා වයිරසය වැළඳීම හේතුවෙන් කෝල්ට්ස් ක්රීඩා සමාජය සමගින් අද (21 වැනිදා) පැවැත්වීමට නියමිතව තිබූ තරගය ආරම්භ කිරීමටත් පෙරම නතර කරන ලෙස ශ්‍රී ලංකා ක්රිකට් ආයතනය දැනුම්දී තිබේ.
හලාවත මේරියන්ස් ක්රීඩා සමාජය සමගින් ඊයේ පැවැති තරගයෙන් පසුව ක‍්‍රීඩකයකු රෝග ලක්‍ෂණ පෙන්වීම හේතුවෙන් ඇන්ටිජන් පරීක්‍ෂාවක් සිදුකර ඇත. එම පරීක්‍ෂණය ධනාත්මකවී ඇති බව දැනගත් ඒස් කැපිටල් ක්රීඩා සමාජයේ නිලධාරීන් විසින් ඒ බව ශ්‍රී ලංකා ක්රිකට් ආයතනයට දැනුම්දී තිබේ.
ඉන් පසුව සෙසු ක‍්‍රීඩයන්ට සහ පුහුණු කාර්ය මණ්ඩලයටද ඇන්ටිජන් පරීක්‍ෂාව සිදුකර ඇති අතර තවත් ක‍්‍රීඩකයකුගේ වාර්තාව ද ධනාත්මකවී ඇත. ඔවුන් දෙදෙනා ඉවත් කර ඉතිරි තරග ක්රීඩා කරන ලෙස ශ්‍රී ලංකා ක්රිකට් ආයතනය ඒස් කැපිටල් ක්රීඩා සමාජයට දන්වා තිබූ නමුත් අද උදෑසන ඔවුන් තරගය නතර කරන ලෙස දැනුම්දී තිබේ.
ඒස් කැපිටල් ක්රීඩා සමාජයට ඉදිරි දින 3 තුලදී පානදුර, බ්ලූම්ෆීල්ඩ්, එස්.එස්.සී යන කණ්ඩායම් සමගින් තරග කිරිම සඳහා මූලික වටයේ තවත් තරග 3 ක් ඉතිරිව ඇති නමුත් එම තරග අතහැර දැමීමට සිදුවනු ඇති බව දැනගැනීමට ඇත.
මෙහි ඇති වැදගත්ම කරුණ වනුයේ මෙවැනි ආකරයට කණ්ඩායමක ක‍්‍රීඩකයන්ට කොරෝනා වයිරසය වැළදුණහොත් ඉන්පසු ගන්නා ක‍්‍රීයාමාර්ගය පිළිබඳව ශ්‍රී ලංකා ක්රිකට් ආයතනය තීරණයක් ගෙන නොතිබීමයි.
කොරෝනා වයිරසය වැළදුණු ක‍්‍රීඩකයන් පමණක් ඉවත්කර තරගාවලිය ඉදිරියට පවත්වා ගෙන යනවාද, නැතහොත් කණ්ඩායම තරගාවලියෙන් ඉවත් කරනවාද, කණ්ඩායම තරගාවලියෙන් ඉවත් කළහොත් ඉදිරියේදී පැවැත්වීමට නියමිත තරග සඳහා ලබාදෙන ප‍්‍රසාද ලකුණු අනෙක් කණ්ඩායම් වලට ප‍්‍රදානය කරනවාද, නැතහොත් ඔවුන් සහභාගිවූ සියළුම තරගවල ප‍්‍රසාද ලකුණු අහිමිකරනවාද යන්න පිළිබඳව ශ්‍රී ලංකා ක්රිකට් ආයතනය මෙතෙක් තීරණයක් ගෙන නොමැත.
මේ සම්බන්ධයෙන් තීරණයක් ගැනීම කි‍්‍රකට් කමිටුවට බාර කර ඇතැයි වාර්තා වේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
