(නාමල් පතිරගේ)
ලබන අඟහරුවාදා (1 වැනිදා) පස්වරු 1.30 ට කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී පැවැත්වීමට නියමිතව තිබූ ශ්‍රී ලංකා පාපන්දු සම්මේලනයේ නිලවරණය ලබන ජුනි 7 වැනිදා රීඩ් මාවත ක්‍රීඩා සංකීර්ණයේ එළිමහනේදී පැවැත්වීමට අද (28) තීරණය කර තිබේ.
රට තුළ සංචරණ සීමා ලබන ජුනි 7 වැනිදා දක්වා පවත්වාගෙන යාමට රජය තීරණය කිරීමෙන් පසුව ඇතිවී තිබෙන තත්ත්වය සමාලෝචනය කරමින් පාපන්දු නිලවරණය ජුනි 7 වැනිදා දක්වා කල් තැබීමට තීරණය කළ බව ‘ලංකාදීප’ය කළ විමසුමදී ශ්‍රී ලංකා පාපන්දු සම්මේලනයේ සභාපති අනුර ද සිල්වා මහතා පැවසීය. එහිදී පවතින තත්ත්වය හමුවේ එළිමහනේදී නිලවරණය පවත්වා අවසන් කරන ලෙස ක්‍රීඩා ඇමැති නාමල් රාජපක්‍ෂ මහතා නිලවරණ කමිටුවට උපදෙස් ලබාදුන් බව ද වාර්තා වේ.
පාපන්දු නිලවරණය සඳහා නිලධාරීන් හා නියෝජිතයන් 200කට ආසන්න පිරිසක් රැස්වන අතර අඟහරුවාදා (1 වැනිදා) ඔවුන් සඳහා ගමන් අවසර පත් නිකුත් කරමින් එය පවත්වා අවසන් කිරීමට ක්‍රීඩා අමාත්‍යාංශය දැඩි උත්සාහයක් ගත්තේය.
මේ අතර ක්‍රීඩා අධ්‍යක්‍ෂ ජනරාල් අමල් එදිරිසූරිය මහතා ‘ලංකාදීප’යට පැවසුවේ හෙට (29) හා අනිද්දා (30) පැවැත්වීමට සූදානම් කර තිබූ ශ්‍රී ලංකා ටයිකොන්ඩෝ සම්මේලනයේ හා ශ්‍රී ලංකා ඉලක්කයට වෙඩි තැබීමේ සම්මේලනයේ නිලවරණය ද නැවත ජුනි 7 වැනිදා පැවැත්වීමට දැන් තීරණය කර තිබෙන බවයි.
කෙසේ වුවත් ‘සූම්’ තාක්‍ෂණය ඔස්සේ ඡන්ද විමසීම් කරන ජාතික ක්‍රීඩා සංගම් කීපයකම නිලවරණ කලින් ප්‍රකාශයට පත්වූ දිනවලදීම පවත්වා අවසන් කෙරෙන බවත් ක්‍රීඩා අධ්‍යක්‍ෂ ජනරාල් අමල් එදිරිසූරිය මහතා වැඩිදුරටත් පැවසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
