ශ්‍රී ලංකාව සහ බටහිර ඉන්දීය කොදෙව් කණ්ඩායම අතර ගාල්ලේදී පැවැත්වෙන පළමු ටෙස්ට් ක්‍රිකට් තරගය ආරම්භ වීමට දින කිහිපයක් තිබියදී ශ්‍රී ලංකා කණ්ඩායමේ පන්දු රැකීමේ පුහුණුකරුවා වන ඕස්ට්‍රේලියානු ජාතික ෂේන් මැක්ඩමොට් මහතාට කොවිඩ්-19 වයිරසය ආසාදනය වී ඇත. මේ වන විට ඔහු කණ්ඩායම රැදී සිටින හෝටලයෙන් ඉවත්ව නිරෝධානය වෙමින් සිටියි.
කණ්ඩායමේ ක්‍රීඩකයන් සහ පුහුණු කාර්ය මණ්ඩලය සඳහා පැවැති පරීක්ෂණයකින් අනතුරුව මැක්ඩමොට් මහතාට කොවිඩ්-19 වයිරසය ආසාදනය වී ඇති බවට තහවුරු වී තිබේ. එබැවින් ඔහු සමීපව ඇසුරු කළ පුද්ගලයන් ලෙස හඳුනාගෙන ඇති ප්‍රධාන පුහුණුකරු මිකී ආතර් මහතා, පිතිහරඹ පුහුණුකරු ග්‍රාන්ට් ෆ්ලවර් මහතා සහ භෞතචිකිත්සක බ්‍රෙට් හැරප් මහතාද මේ වන වන විට නිරෝධානයට යොමු කර ඇත.
පුහුණු කාර්ය මණ්ඩලයේ සාමාජිකයන් ශ්‍රී ලංකා ක්‍රීඩකයන් සමග පසුගිය දිනවල ගාල්ලේදී පුහුණුවීම්වලට සහභාගි වී ඇතැත්, ඔවුන් අතර සමීප ඇසුරක් පැවැත්වී නොමැති බැවින් කණ්ඩායමේ ක්‍රීඩකයන් නිරෝධනයට ලක් කර නැතැයි ශ්‍රී ලංකා ක්‍රිකට් ආයතනයේ සෞඛ්‍ය කමිටුවේ ප්‍රධානී මහාචාර්ය අර්ජුන ද සිල්වා මහතා පවසයි.
“ක්‍රීඩකයන් ගත්තාම ඔවුන් සහ පුහුණු කාර්ය මණ්ඩලය අතර සෘජු සම්බන්ධතාවක් තිබිලා නැහැ. යම් අයුරකින් හෝ ඇසුරක් තිබුණා කියලා හඳුනාගෙන තියෙන අයව අද (19 වැනිදා) නැවතත් පරීක්ෂණයකට ලක් කරනවා. කොහොමත් තරගාවලිය ආරම්භ වෙන්න කලින් තවත් පරීක්ෂණ වටයක් පවත්වන්න සැලසුම් කරලයි තිබුණේ.” යැයි ඒ මහතා පැවසීය.
ශ්‍රී ලංකා කණ්ඩායමේ සියලුම ක්‍රීඩකයන් සහ පුහුණු කාර්ය මණ්ඩල සාමාජිකයන් ද්විත්ව එන්නත් කරණයකට භාජනය කර ඇති බැවින් මෙම සිදුවීම හරහා තරගාවලිය ආරම්භයට බලපෑමක් ඇති වීමට තිබෙන ඉඩකඩ ඉතාමත් අඩු බවද අර්ජුන ද සිල්වා මහතා වැඩි දුරටත් සඳහන් කළේය.
ශ්‍රී ලංකා ක්‍රිකට් කණ්ඩායමේ පුහුණු කාර්ය මණ්ඩලයේ සාමාජිකයකුට කොවිඩ්-19 වයිරසය ආසාදනය වූ පළමු අවස්ථාව මෙය නොවීය. මෙම වසර මුලදී ශ්‍රී ලංකා කණ්ඩායමේ බටහිර ඉන්දීය කොදෙව් සංචාරයට පෙර ප්‍රධාන පුහුණුකරු මිකී ආතර් මහතාට සහ කණ්ඩායමේ ක්‍රීඩකයන් තිදෙනෙකුට වයිරසය ආසාදනය වූ අතර ඉන්දීය කණ්ඩායමේ ශ්‍රී ලංකා සංචාරයට පෙර පිතිහරඹ පුහුණුකරු ග්‍රාන්ට් ෆ්ලවර් මහතාට සහ දත්ත විශ්‍ලේෂකවරයාටද වයිරසය අසාදනය විය.
ඔව්හු සියලු දෙනාම සංකූලතාවලින් තොරව සුවය ලැබූහ.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
