(නාමල් පතිරගේ)
‘කෝප්’ කමිටුව හමුවට මනිලාල් ප්‍රනාන්දු කැඳවාගෙන යාමට ඇතැමුන්ට පසුගිය දිනවල ලොකු උවමනාවක් තිබුණේ සිය ඡන්ද පදනමට බලපෑමක් කිරීමට බවත් එහෙත් තම පියා වන මනිලාල් ප්‍රනාන්දු මහතා කෝප් කමිටුව හමුවට කැඳවීම් ලැබුණු විගස පෙනී සිටීමට සූදානම් බවත් ලබන අඟහරුවාදා (2) පැවැත්වීමට නියමිත ශ්‍රී ලංකා පාපන්දු සමමේලනයේ නිලවරණයේදී සභාපති ධුරයට තරගවදින සභාපති අපේක්ෂක වෛද්‍ය මනිල් ප්‍රනාන්දු මහතා පැවසීය.
‘ෂැංග්‍රිලා’ හෝටලයේදී මාධ්‍යවේදීන් සීමිත පිරිසකගේ සහභාගිත්වයෙන් පැවති විශේෂ මාධ්‍ය හමුවකදී මනිල් ප්‍රනාන්දු මහතා එසේ පැවසීය.
එහිදී මාධ්‍යවේදීන්ගේ ප්‍රශ්න කිරීම් රැසකට පිළිතුරු දුන් ඔහු සිය ඡන්ද ව්‍යාපාරයට මනිලාල් ප්‍රනාන්දු මහතා කිසිදු මැදිහත්වීමක් නොකරන බවත් සිය නාමයෝජනාව ලීග් 46ක් එකතුව යෝජනා කිරීම තුළින්ම තමන් නිලවරණයේදී ජයග්‍රහණය පිළිබඳව විශ්වාසය තබා තිබෙන බවත් පැවසීය.
“මගේ තාත්තා අද පාපන්දු පරිපාලනයෙන් ඉවත් වුණු අයෙක්. හැබැයි මගේ තාත්තාගේ නාමය මේ රටේ පාපන්දු ක්‍රීඩාවෙන් තවදුරටත් ලෙහෙසියෙන් ගලවන්නත් බෑ. මම ඡන්ද ව්‍යාපාරය කරනකොට හමුවන බොහෝ මිනිසුන් තාත්තා ගැන මගෙන් අහනවා. ඒක මට නවත්වන්න පුළුවන් දෙයක් නෙමෙයි. ඒක බලපෑමක් කියලා කියන්න සමහරු උත්සාහ කරනවා.
මනිලාල් ප්‍රනාන්දු මහතා කරපු ලොකුම වැරැද්ද තමයි මේ රටේ පාපන්දු ක්‍රීඩාවට නුසුදුසු පුද්ගලයන් ගෙන ඒම. රංජිත් රුද්‍රිගු මහතාට සභාපති අපේක්ෂකත්වය පිරිනමන කොට අපේ තාත්තාට මිනිස්සු ගොඩක් දොස් කිව්වා ඒ වැඩේ කරන්න එපා කියලා.
නමුත් තාත්තා ඒක ඇහුවෙ නැත්තේ හැමෝටම සාධාරණයක් කළ යුතු නිසා. නමුත් මම කියනවා තාත්තාගේ ප්‍රතිරූපය විනාශ කරන්න උත්සාහ කළ මේ එක් අයෙක් තමයි රංජිත් රුද්‍රිගු කියන්නෙ.”
මනිල් ප්‍රනාන්දු මහතා මාධ්‍ය හමුවේදී සිය ප්‍රතිපත්ති ප්‍රකාශය මාධ්‍යවේදීන්ට ඉදිරිපත් කර සිටි අතර ඔහු එමගින් අවධාරණය කර ඇත්තේ රටේ ක්‍රීඩාවේ ප්‍රවර්ධනය සඳහා ලැබෙන සියලු දෙස් විදෙස් මූල්‍යාධාර හා පහසුකම් සිය අධීක්ෂණය යටතේ නියාමනය කරන බවයි.
ඔහු එහිදී අවධාරණය කර තිබෙන කරුණු අතර ලැබෙන මූල්‍යාධාරවලින් 30%ක් කාන්තා පාපන්දු ප්‍රවර්ධනයට දායක කර ගැනේ. ඒ අතර ‘ෆිෆා’ හා ඒ.එෆ්.සී. මූල්‍යාධාර ආපසු හරවා නොයැවීම සඳහා ඒ වෙනුවෙන් අඛණ්ඩව ප්‍රවර්ධන වැඩසටහන් දියත් කෙරේ.
මාධ්‍යවේදියකුගේ ප්‍රශ්න කිරීමට මනිල් ප්‍රනාන්දු මහතා තවදුරටත් මෙසේ පිළිතුරු දුන්නේය.
“රංජිත් රුද්‍රිගු මහතා පාපන්දු සම්මේලනයේ වියදමෙන් තේ එකක්වත් බිව්වේ නෑ කියන කතාව ඇත්තද කියන්න මා දන්නෙ නෑ. හැබැයි මම නම් පාපන්දු සම්මේලනයේ වෛද්‍ය කමිටුවේ සභාපතිවරයා හැටියට එහි ගිය අවස්ථවලදී සංග්‍රහ ලෙස ලැබුණු තේ එක බීලා තිබෙනවා.
ඔය රංජිත් රුද්‍රිගු මහතාගේ පාලන සමයේදී පාපන්දු සම්මේලනයේ රුපියල් කෝටි හතරාමාරකට වැඩි මුදලක් අවභාවිත කිරීම ගැන මූල්‍ය කළමනාකරුවකු චෝදනා ලැබුවා. නමුත් රංජිත් රුද්‍රිගු කියන්නේ මූල්‍ය කටයුතු ගැන ඉහළ දැනුමක් තිබෙන ආදායම් බදු උපදේශකවරයෙක්. නමුත් ඔහුට බැරිවුණා මේ වංචාව සොයා ගන්න.
කොහොම හරි මේ කියන වංචාවෙන් පාපන්දු සම්මේලනයට කෝටි ගණනක් අහිමි වුණා. ඒවා කාටහරි ගිහිල්ලා තිබෙනවා නම් සොයාගත යුතුයි. හැබැයි මම එන්නේ වැඩ කරන්න නම් ඉස්සරහ මිසක් පස්ස දිහා බල බලා කාලය ගත කරන්න මට බෑ. ඒ නිසා අතීතයේදී අමිහිරි සිදුවීම් හොය හොයා කාලය නාස්ති කරලා ඉදිරිය අසාර්ථක කර ගන්න මම සූදානම් නෑ.”
මෙහිදී ක්‍රීඩා අමාත්‍යාංශය ගැන ද මනිල් ප්‍රනාන්දු මහතා පිළිතුරු දුන්නේ මාධ්‍යවේදියකුගේ විමසීමකටය.
තරුණයකු හැටියට ක්‍රීඩා ඇමැති නාමල් රාජපක්ෂ මහතා කෙරෙහි සිය ඉහළම විශ්වාසය පවතින බවත් ඒ කෙසේ වුවත් පාපන්දු සම්මේලනය ක්‍රීඩා අමාත්‍යාංශයෙන් යැපෙන ජාතික ක්‍රීඩා සංගමයක් නොවන බව ද ඔහු අවධාරණය කර සිටියේය.
“ක්‍රීඩා අමාත්‍යාංශය ගැන අපට ගැටලු තිබෙන තැනුත් පේනවා. කිසියම් ප්‍රාදේශීය පාපන්දු ලීගයක් පැමිණිල්ලක් ඉදිරිපත් කරනකොට ඒක කෙළින්ම අමාත්‍යාංශයට යොමු කරනවා නම් එතන දෝෂයක් තිබෙනවා.
එවැනි අවස්ථාවක පළමුව සිදුවිය යුත්තේ ඒ පැමිණිල්ල පාපන්දු සම්මේලනයට යොමු කිරීමයි. ඒ කියන ලීගය නඩත්තු කරන්නේ සම්මේලනය නම් පැමිණිල්ල විභාග කිරීමේ පළමු බලය ලැබිය යුත්තේ සම්මේලනයටයි. ඒ නිසා එවැනි අවස්ථාවක ක්‍රීඩා අමාත්‍යාංශයේ මැදිහත්වීම සාධාරණ දැයි කල්පනා කළ යුතුයි.”
සභාපති අපේක්ෂක ජස්වර් උමාර් මහතාගේ ඉදිරිපත් වීම ගැන අදහස් දැක්වූ මනිල් ප්‍රනාන්දු මහතා පැවසුවේ එය ප්‍රජාතන්ත්‍රවාදී අයිතියක් බැවින් ජස්වර් මහතාගේ ඉදිරිපත් වීමට තමාගේ විරුද්ධත්වයක් නැති බවයි.
පාපන්දු ලීග 46ක්ම මා සභාපති අපේක්ෂකත්වයට අනුමත කිරීමෙන්ම මට ජස්වර් මහතාගෙන් නිලවරණයේදී කිසිදු තර්ජනයක් නොමැති බවත් ඔහු එහිදී පැවසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
