(නාමල් පතිරගේ)
ශ්‍රී ලංකා පාපන්දු සම්මේලනය ඉදිරියේදී ‘ශ්‍රී ලංකා පාපන්දු’ (ෆුට්බෝල් ශ්‍රී ලංකා) ලෙස සිය නිල නාමය හා නිල ලාංඡනය වෙනස් කරන බව පාපන්දු සම්මේලනය නිවේදනයක් නිකුත් කරමින් කියයි. පසුගිය මාර්තු 16 වැනිදා පැවැති ශ්‍රී ලංකා පාපන්දු සම්මේලන මහ සභා රැස්වීමේදී ඒ සඳහා අනුමැතිය ලබාගත් බවත් එය නිල වශයෙන් භාවිතයට ගැනීම ඉදිරියේදී ප්‍රකාශයට පත් කරන බවත් පාපන්දු සම්මේලනයේ සභාපති අනුර ද සිල්වා මහතා ‘ලංකාදීප’ය කළ විමසුමකදී පැවසීය.
ඔහු වැඩිදුරටත් පැවසුවේ පාපන්දු සම්මේලනයේ මෙතෙක් භාවිතයට ගැනුණු නිල ලාංඡනය ලියාපදිංචි කර නොතිබූ එකක් වූවත්, නව නිල ලාංඡනය රජයේ ලියාපදිංචි කිරීමට කටයුතු කිරීමෙන් එය අනිසි භාවිතයට ගැනීම නීතියෙන් වැළැක්වෙන බවයි.
1939 දී ‘ලංකා පාපන්දු සංගමය’ ලෙස අරඹා මෙරට පාපන්දු පරිපාලනය මෙහෙයවන ශ්‍රී ලංකා පාපන්දු සම්මේලනයේ වත්මන් නිල නාමය 1979 සිට භාවිතයට ගැනෙන්නකි.
නව ලාංඡනයේ සංකේත හා වර්ණ ගැන්වීම තුළින් පාපන්දු ක්‍රීඩාවේ ශ්‍රී ලංකාවේ භාවිතය හා ඊට හවුල් වී සිටින සියලු පාර්ශ්ව නියෝජනය කරයි.
ශ්‍රී ලංකාවේ වැඩිම ජාත්‍යන්තර මූල්‍යාධාර ලැබෙන ජාතික ක්‍රීඩා සංගමයක් වන ශ්‍රී ලංකා පාපන්දු සම්මේලනයේ වාර්ෂික මූල්‍යාධාර එකතුව රුපියල් මිලියන 270 කට ආසන්න සාමාන්‍ය අගයක් ගනියි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
