Last Update  :  2025-04-04 12:58:00 About Contact
Follow Us -
IMG-LOGO
නිවස්න පිටුව Latest news බේස්බෝල් සංගමයේ මුල් පුටුවට අසංග එයි

බේස්බෝල් සංගමයේ මුල් පුටුවට අසංග එයි

editorial - 2021 නොවැ මස 17 {{hitsCtrl.values.hits}} Views 0 Comment
A A A

(නාමල් පතිරගේ)

ශ්‍රී ලංකා ආධුනික බේස්බෝල් හා සැහැල්ලු පන්දු සංගමයේ නව සභාපතිවරයා ලෙස අසංග සෙනවිරත්න මහතා පත්ව සිටියි. ඒ  මෙතෙක් එම ධුරය දැරූ නිශ්ශංක සේනාධිපති මහතාගේ ඉල්ලා අස්වීම හේතුවෙනි. සෙනෙවිරත්න මහතා එහි විධායක උප සභාපතිවරයකු ලෙස ද කටයුතු කළේය. 

ශ්‍රී ලංකා රග්බි සංගමයේ හිටපු සභාපතිවරයෙකු ද වන සෙනවිරත්න මහතා ජාතික ඔලිම්පික් කමිටුවේ වත්මන් උප සභාපතිවරයෙකි. ක්‍රීඩා ඇමතිවරයා මෑතකදී පත්කළ රග්බි උපදේශක කමිටුවේ සභාපති ධුරය උසුලන්නේද ඒ මහතායි. පෙරේදා රාත්‍රියේ ‘සූම්’ තාක්ෂණය ඔස්සේ පැවැති බේස්බෝල් සංගමයේ විශේෂ මහ සභා රැස්වීමේදී වත්මන් නිල කාලයේ (2020-22) ඉතිරි වසරක කාලයක් සඳහා අසංග සෙනවිරත්න මහතා පත්කර ගැනිණ. 

හිටපු සභාපති නිශ්ශංක සේනාධිපති මහතා සංගමයේ ගතකළ පසුගිය වසරක කාලය තුළදී ශ්‍රී ලංකාවේ බේස්බෝල් ක්‍රීඩාවේ ප්‍රවර්ධනය සඳහා කිසිදු කාර්යයක් සිදු නොවූ බවට චෝදනා එල්ලවිය. එම තත්ත්වය තුළ සේනාධිපති මහතා තනතුරෙන් ඉල්ලා අස්වීමට තීරණය කළේය. 

නව සභාපති අසංග සෙනවිරත්න මහතා ‘ලංකාදීප’යට පැවසුවේ කොවිඩ් වසංගතය හේතුවෙන්ද පසුගිය කාලය පුරා අඩපණව තිබූ දේශීය බේස්බෝල් ක්‍රීඩාව මෙතැන් සිට පණ ගැන්වීම නැවත ආරම්භ කළ බවයි.

‘‘බේස්බෝල් ක්‍රීඩාව අපේ රටේ එල්ලේ ක්‍රීඩාවට යම් සමාන කමක් ගන්නවා. ඇමෙරිකාවේ නමගිය බේස්බෝල් ක්‍රීඩා සමාජ කීපයක්ම අපට උදව් කරන්න දැනටමත් පොරොන්දු වෙලා තිබෙනවා. ඒ නිසා ශ්‍රී ලංකාව තුළ දෙවැනි බේස්බෝල්  ක්‍රීඩාංගණය ඉදිකරන්නන් අපි ඇමරිකාවේ සහයෝගය ලබා ගන්නවා’’ යයි ද ඔහු වැඩිදුරටත් පැවසීය.

2020-21 කාලය තුළදී ශ්‍රී ලංකාවේ එකම බේස්බෝල් තරගාවලියක් හෝ සංවිධානය කිරීමට බේස්බෝල් සම්මේලනයට හැකියාව ලැබී නැත. කෙසේ වුවත් නව සභාපතිවරයාගේ උපදෙස් පරිදි අන්තර් ක්‍රීඩා සමාජ පිළිමලුන් පිටුදැකීමේ බේස්බෝල් තරගාවලිය මේ මස 19 වැනිදා  සිට ඉරිදා (21) දක්වා දියගම මහින්ද රාජපක්ෂ ක්‍රීඩා සංකීර්ණයේදී පැවැත්වීමට කටයුතු යොදා තිබේ.

ශ්‍රී ලංකා බේස්බෝල් සංගමයේ වත්මන් විධායක සභාව සභිකයන් 15 දෙනෙකුගෙන් සමන්විතය. 

ශ්‍රී ලංකාව ලෝක බේස්බෝල් ශ්‍රේණිගත (පිරිමි) රටවල්  85 ක් අතර මේ වනවිට 41වැනි ස්ථානයේ රැඳී සිටියි. බටහිර ආසියානු බේස්බෝල් තරගාවලියේ වත්මන් ශූරයන් වන්නේ ද ශ්‍රී ලංකාවයි.  


අදහස් (0)

බේස්බෝල් සංගමයේ මුල් පුටුවට අසංග එයි

ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.