අබුඩාබිහි ශෙයික් සයිඩ් ක්‍රීඩාංගණයේදී පැවැත්වෙන දහයයි-10 ලීග් තරගාවලියේ දිල්ලි බුල්ස් කණ්ඩායමට එරෙහිව පැවැති තරගයකදී ප්‍රවේගකාරී පිතිහරඹයක නිරත වෙමින් පන්දු 31 කදී හයේ පහර 4 ක් සහ හතරේ පහර 6 ක් සමග නොදැවී ලකුණු 64 ක් රැස්කිරීමට චෙන්නායි බ්‍රේව්ස් කණ්ඩායමේ ආරම්භක පිතිකරු ලෙස කටයුතු කරන භානුක රාජපක්ෂ සමත් විය.
පන්දු 18 කදී සිය අර්ධ ශතකය සම්පූර්ණ කළ භානුක, චෙන්නායි ඉනිමේ පළමු කඩුල්ල වෙනුවෙන් මාර්ක් ඩෙයාල් (29) සමග එක්ව පන්දු 34 කදී ලකුණු 81 ක වේගවත් සම්බන්ධාතාවක්ද ගොඩනැගුවේය. තෙවැනි පිතිකරුවා ලෙස පිටියට පිවිසි නායක දසුන් ශානක මුහුණදුන් පළමු පන්දුවේදීම ලකුණු නොළබා දැවී ගිය අතර රවී බොපාරා පන්දු 11 කදී නොදැවී ලකුණු 19 ක් රැස්කරමින් චෙන්නායි කණ්ඩායමේ ලකුණු සංඛ්‍යාව 120 සීමාවෙන් ඔබ්බට ගෙන ගියේය.
ජයග්‍රහණය සඳහා ලකුණු 125 ක ඉලක්කයක් හඹාගිය දිල්ලි බුල්ස් ක්‍රීඩකයෝ පන්දු 2 ක් ඉතිරිව තිබියදී කඩුලු 5 ක් දැවී එම ඉලක්කය පසුකර ගියහ. එහිදී නායකත්වයේ පිතිහරඹයක නිරත වූ ඩ්වේන් බ්‍රාවෝ පන්දු 17 කදී හයේ පහර 2 ක් සහ හතරේ පහර 6 ක් සමග ලකුණු 43 ක් රැස්කරමින් සිය කණ්ඩායම ජයග්‍රහණය කරා ගෙන ගියේය. ඔයින් මෝගන් පන්දු 12 කින් නොදැවී ලකුණු 26 ක් රැස්කළේ හයේ පහරක් සහ හතරේ පහර 2 ක් සමගිනි.
දසුන් ශානක යැවූ ඕවර 2 දී ලකුණු 30 ක්ද, ධනංජය ලක්ෂාන් යැවූ ඕවර 1.4 දී ලකුණු 28 ක්ද උදුරාගැනීමට දිල්ලි පිතිකරුවෝ සමත් වූයේ ඔවුන්ට එක් කඩුල්ලක් හෝ ලබා නොදෙමිනි. එහිදී මුනාෆ් පටේල් සහ රෝමන් වෝල්ක්නර් කඩුලු 2 බැගින් දවාගැනීමට සමත් වුවද, ඔවුන්ටද සිය කණ්ඩායම පරාජයෙන් ගළවාගැනීමට නොහැකි වූහ.
චෙන්නායි බ්‍රේව්ස් පිල - ඕවර 10 කදී කඩුලු 2 කට 124
(භානුක රාජපක්ෂ නොදැවී 64, මාර්ක් ඩෙයාල් 29, රවී බොපාරා නොදැවී 19)
දිල්ලි බුල්ස් පිල - ඕවර 9.4 කදී කඩුලු 5 කට 128
(රහ්මතුල්ලා ගුර්බාස් 26, මොහොමඩ් රදර්ෆෝඩ් 15, ඔයින් මෝගන් නොදැවී 26, ඩ්වේන් බ්‍රාවෝ 43, මුනාෆ් පටේල් 20/2, රෝමන් වෝල්ක්නර් 25/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
