(නාමල් පතිරගේ)
පාපන්දු ක්‍රීඩාව ශ්‍රී ලංකාවේ අංක එකේ ක්‍රීඩාව කරන බව පැවසීම තුළින්ම සිය ප්‍රතිවාදී සභාපති අපේක්‍ෂක මනිල් ප්‍රනාන්දු මහතාගේ ප්‍රතිපත්ති ප්‍රකාශය ප්‍රායෝගික නොවන බව ශ්‍රී ලංකා පාපන්දු නිලවරණයේ දී සභාපති ධුරයට තරග වදින ජස්වර් උමාර් මහතා පවසයි.
කොළඹ ‘‘ටාජ් සමුද්‍රා’’ හෝටලයේ දී පැවැති විශේෂ මාධ්‍ය හමුවක දී අදහස් දැක්වූ ශ්‍රී ලංකා පාපන්දු සම්මේලනයේ වත්මන් ලේකම්වරයා ද වන ජස්වර් උමාර් මහතා පැවසුවේ රුපියල් බිලියන හයක වාර්ෂික ආදායමක් ලබන ශ්‍රී ලංකාවේ ක්‍රිකට් ක්‍රීඩාව හා සංසන්ධනය කිරීමේ දී රුපියල් මිලියන 270 ක් පමණක් වන ආදායමක් ලබන මෙරට පාපන්දු ක්‍රීඩාව අංක එකට ගෙන එන මනිල් ප්‍රනාන්දු මහතාගේ ප්‍රකාශය කිසිසේත් ප්‍රායෝගික නොවන බවයි.
‘‘මගේ මිත්‍ර සභාපති අපේක්‍ෂක මනිල් ප්‍රනාන්දු මහතාගේ ප්‍රතිපත්ති ප්‍රකාශය මා කියවා බැලුවා. ඒක හුදු ලියවිල්ලක් විතරයි. මේ රටේ පාපන්දු ක්‍රීඩාව අංක එකට ගේන්න ඉස්සර වෙලා ඒ වෙනුවෙන් තව කරන්න දේවල් කොච්චර තිබෙනවාද?“
“ හිතන්න මේ රටේ පාපන්දු ක්‍රීඩකයෙක් ගැන. ඔවුන් වැඩි දෙනෙකු දුප්පතුන්. ඔවුන්ට අංක එකට කරන්න ජීවිතයේ බැඳුණු බොහෝ දේවල් තිබෙනවා. ඒ කිසි දෙයකට අවධානය යොමු කරන්නේ නැතිව මනිල් ප්‍රනාන්දු කියනවා ලංකාවේ පාපන්දු ක්‍රීඩාව අංක එකට ගේනවා කියලා. චේචර ලොකු පොරොන්දුවක් නොදුන් මේ රටේ පාපන්දු සම්මේලනයේ සභාපතිවරුන් බහුතරයක් අසාර්ථක වෙලා ඉන්නකොට මනිල් ප්‍රනාන්දු ගේ මේ පොරොන්දුව කවදාවත් ඉෂ්ඨ කරන්න බැරි බව මේ රටේ පාපන්දු ක්ෂේත්‍රයේ උදවිය දන්නවා’’ යැයි ද ජස්වර් මහතා එහි දී පැවසීය.
මාධ්‍යවේදීන් කළ ප්‍රශ්න කිරීම් ගණනාවකට පිළිතුරු දෙමින් ඔහු මෙසේ ද පැවසීය.
‘‘මනිල් ප්‍රනාන්දු මහතාගේ නාමයෝජනාව ලීග් 41 ක් අත්සන් කිරීම තුළින්ම තමා දැනටමත් නිවරණය ජයගෙන ඇතැයි මනිල් ප්‍රනාන්දු මහතා කියනවා. මගේ මිත්‍රයාගේ තක්සේරුව ගැන මා කනගාටු වෙනවා. මම ඔබලාට ජුනි 7 වැනිදා නිලවරණයේ ප්‍රතිඵලය දැන්ම කියන්නම්. මට ඡන්ද 115 යි. මනිල්ට 71 යි. ඒ නිසා ජුනි 7 වැනිදායින් පස්සේ ශ්‍රී ලංකා පාපන්දු සම්මේලනයේ ක්‍රියාත්මක වන්නේ මගේ ප්‍රතිපත්ති ප්‍රකාශයයි.’’ යයිද ජස්වර් උමාර් මහතා පැවසීය.
පාපන්දු සම්මේලනයේ ගෙවී යන පාලන කාලය පිළිබඳව අදහස් දැක්වූ සමහරු කෝට් ඇඳ ගැනීමට උත්සාහ කළත් එහි දැනෙන යමක් කළේ තමා බව විධායක සභාවම පිළිගන්නා කරුණක් බවයි.
සුපර් ලීග් තරගාවලිය ලංකාවට හඳුන්වා දෙන්න අන්තර් ජාතික පාපන්දු සම්මේලනයට මැදිහත්වීම් කළේ මායි. මලයාසියාවෙන් මෙරට පාපන්දු සම්මේලනයට රුපියල් කෝටියක් වටිනා බස් රථයක් නොමිලේ අරන් දෙන්න මට හැකිවුණා.
අන්තර් ජාතික පාපන්දු විනිසුරුවරයෙක් වගේම ජාත්‍යන්තර පාපන්දු තරග කොමසාරිස්වරයෙකු හැටියටත් අන්තර් ජාතික පාපන්දු සම්මේලනයේ මට තිබෙන සබඳතා ප්‍රයෝජනයට අරන් මේ රට මූල්‍යාධාර රැසක් අරන් දෙන්නත් මා පසුගිය කාලයේ කටයුතු කළා.
සමහර අවස්ථාවල දී අපට පාපන්දු මූලස්ථානයේ සේවකයන්ගේ පඩි ගෙවා ගන්න බැරි වුණු අවස්ථාවන් තිබුණා. එතනදීත් මා මැදිහත් වෙලා අන්තර්ජාතික සම්මේලනයන් විශේෂ මූල්‍යාධාර ශ්‍රී ලංකාවට ලබාගත් අවස්ථාත් තිබෙනවා. සමහරු මේ දේවල්වලට කෝට් ඇඳගන්න උත්සහ කළත් මට ‘‘කෝට්’’ ඇඳගන්න ඕනෙ නෑ.’’
ජස්වර් මහතා මාධ්‍ය හමුවේදී පැවසුවේ ප්‍රතිවාදී අපේක්‍ෂකයාට වඩා තම ප්‍රතිපත්ති මාලාව ක්‍රියාත්මක කිරීමට පහසු ප්‍රායෝගික වැඩසටහන් මාලාවක් බවයි.
මම වැඩසටහන් අතර ඔහු සිය පාලන කාලයේ දී ක්‍රියාත්මක කරන අලුත් තරගාවලි ගණනාවක්ම හඳුන්වා දී තිබේ. ඒ අතර ‘‘සුපර්’ කුසලාන, සිව් වැනි, පස්වැනි, හය වැනි, හත් වැනි පෙළ නවක තරගාවලි ගණනාවක්ම වේ. පාසල් ලීග් (වයස 18 න් පහළ) හා පාසල් ලීග් (15 න් පහළ) සුපර් ලීග්, කාන්තා හා අන්තර් දිස්ත්‍රික් සහ තවත් තරගාවලි කිහිපයක් ද ඔහු සිය ප්‍රතිපත්ති ප්‍රකාශයේ කෙටුම්පත් කර තිබේ.
ඔහු කෙටුම්පත් කර තිබෙන තවත් ප්‍රවර්ධන වැඩසටහනක් වන්නේ පාපන්දු ‘‘මිනි’’ ක්‍රීඩාවයි. ඒ සඳහා වසර පහක් තුළ කුඩා පාපන්දු ක්‍රීඩාංගණ 50 ක් ඉදි කෙරේ.
පාපන්දු ක්‍රීඩාවට ලැදි මිලියන 1.4 ක් වන ක්‍රීඩකයන් පිරිසකට විනාඩි මිලියන 8.7 ක කාලයක් මෙහි ක්‍රීඩා කිරීමට අවස්ථාව හිමිවන මෙම ව්‍යාපෘතිය ඔස්සේ මාසයක් තුළ ක්‍රියාකාරී පැය 244 ක් ලෙස සළකා එය වසරේ මාස 12 න් වැඩිකර බලා එම ගණනය කිරීම් කර තිබේ.
ජස්වර් මහතා මාධ්‍ය හමුවේ දී තවදුරටත් අවධාරණය කර සිටියේ රට තුළ පාපන්දු ක්‍රීඩාව නියාමනය හා සම්බන්ධීකරණය සඳහා ප්‍රාදේශීය පාපන්දු සම්බන්ධීකරණ මධ්‍යස්ථාන කිහිපයක් ද දිවයිනේ ස්ථාන කීපයක දී පිහිටුවන බවය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
