අබුඩාබිහි ශෙයික් සයිඩ් ක්‍රීඩාංගණයේදී පැවැත්වෙන දහයයි-10 ලීග් තරගාවලියේ අබුඩාබි කණ්ඩායමට එරෙහිව පැවැති තරගයකදී පන්දු 18 කින් ලකුණු 30 ක් රැස්කරමින් සහ ලකුණු 12 කට කඩුලු 4 ක් දවාගනිමින් කැපී පෙනෙන දස්කම් දැක්වීමට ඩෙකෑන් ග්ලැඩි‍යේටර්ස් කණ්ඩායම නියෝජනය කරන ශ්‍රී ලංකා තුන් ඉරියව් ක්‍රීඩක වනිඳු හසරංග සමත් විය.

පළමුවෙන් පන්දුවට පහරදුන් ග්ලැඩියේටර්ස් කණ්ඩායම ඕවර 10 අවසානයේ කඩුලු 9 ක් දැවී ලකුණු 97 ක් ලබාගත් අතර එහිදී වේගවත් පිතිහරඹයක නිරතවූ වනිඳු පන්දු 18 කදී හයේ පහරක් සහ හතරේ පහර 4 ක් සමග ලකුණු 30 ක් රැස්කළේය. ග්ලැඩියේටර්ස් ඉනිමේ ලකුණු සංඛ්‍යාව ඉහළ දැමීම සඳහා වනිඳුට අනගි සහායක් දුන් ඔඩේන් ස්මිත් පන්දු 11 කදී ලකුණු 34 ක් රැස්කළේ හයේ පහර 3 ක් සහ හතරේ පහර 3 ක් සමගිනි.

ජයග්‍රහණය සඳහා ලකුණු 98 ක ඉලක්කයක් හඹාගිය අබුඩාබි කණ්ඩායම තියුණු තරගයකින් අනතුරුව අවසන් පන්දුවේදී එම ඉලක්කය පසුකර ගියේය. තරගය ජය ගැනීම සඳහා ක්‍රෙග් ඕවර්ටන් යැවූ අවසන් ඕවරයේදී අබුඩාබි කණ්ඩායමට ලකුණු 14 ක් අවශ්‍ය විය. මුල් පන්දු 5 දී ලකුණු 9 ක් පමණක් ලබාදුන් ඕවර්ටන්ට අබාධායකට ලක්වීම නිසා අවසන් පන්දුව යැවීමට නොහැකි විය.

ඒ අනුව අවසන් පන්දුව යැවීම සඳහා අන්වර් අලී කැඳවූ අතර එම පන්දුවට හයේ පහරක් ගැසූ ඩැනී බ්‍රිග්ස් ග්ලැඩියේටර්ස් කණ්ඩායමේ අතේ තිබූ ජයග්‍රහණය උදුරාගෙන අබුඩාබි කණ්ඩායමට තිළිණ කළේය. එහිදී දක්ෂ පන්දු යැවීමක නිතර වූ වනිඳු සිය ඕවර 2 ලකුණු 12 කට සීමා කරමින් කඩුලු 4 ක් දවාගත්තේ තරගය අවසන් ඕවරය දක්වාම ඇදගෙන යෑමට පාර කපමිනි.

ඩෙකෑන් ග්ලැඩියේටර්ස් පිල - ඕවර 10 කදී කඩුලු 9 කට 97
(වනිඳු හසරංග 30, ඩේවිඩ් වයිස් 12, ‍ඔඩේන් ස්මිත් 34, ෆිදෙල් එඩ්වඩ්ස් 10/2, නවීන් උල්හක් 25/2)

අබුඩාබි පිල - ඕවර 10 කදී කඩුලු 6 කට 99
(ලයෑම් ලිවිංග්ස්ටන් 21, කොලින් ඉන්ග්‍රම් 13, ජෙමී ඔවර්ටන් නොදැවී 33, ඩැනී බ්‍රිග්ස් නොදැවී 19, වනිඳු හසරංග 12/4)

-036