තරග 3 කින් සමන්විත විස්සයි-20 තරගාවලියකට සහ තරග 2 කින් සමන්විත ටෙස්ට් ක්‍රිකට් තරගාවලියකට සහභාගි වීම සඳහා මේ මස අග භාගයේදී ඉන්දීයාවේ සංචාරයක නිරත වීමට සූදානමින් සිටින ශ්‍රී ලංකා කණ්ඩායමට එහිදී දිවා-රාතී‍්‍ර ටෙස්ට් තරගයක් කී‍්‍රඩා කිරීමේ අවස්ථාව උදාවී තිබේ.
ඉන්දීයාව සහ ශ්‍රී ලංකාව අතර පැවැත්වෙන පළමු දිවා-රාතී‍්‍ර ටෙස්ට් තරගය මෙය වේ. මින් පෙර බංග්ලාදේශයට, ඕස්ටේ‍්‍රලියාවට සහ එංගලන්තයට එරෙහිව දිවා-රාතී‍්‍ර ටෙස්ට් තරග 3 කට කී‍්‍රඩා කර ඇති ඉන්දියාව ඉන් තරග 2 ක් ජයගෙන සෙසු තරගය පරාජයට පත්වී තිබේ.
ශ්‍රී ලංකාවද මින් පෙර පාකිස්තානයට, බටහිර ඉන්දීය කොදෙව් පිලට සහ ඕස්ටේ‍්‍රලියාවට එරෙහිව දිවා-රාතී‍්‍ර ටෙස්ට් තරග 3 කට කී‍්‍රඩා කර ඇති අතර ඉන් 2 ක් ජය ලබා සෙසු තරගය පරාජයට පත්ව තිබේ.
ශ්‍රී ලංකාවට එරෙහිව මාර්තු මස 12 වැනිදා බැංගලෝර්හිදී ආරම්භ වීමට නියමිත දෙවැනි ටෙස්ට් තරගය රෝස පැහැති පන්දුවෙන් කී‍්‍රඩා කරන දිවා-රාතී‍්‍ර තරගයක් ලෙස පැවැත්වෙන බව ඉන්දීය කි‍්‍රකට් පාලක මණ්ඩලය ඊයේ (15 වැනිදා) නිල වශයෙන් නිවේදනය කළේය. ඒ අනුව එය කණ්ඩායම් දෙකේම සිවුවැනි දිවා-රාතී‍්‍ර ටෙස්ට් තරගය වනු ඇත.
මෙම ටෙස්ට් තරගය දෙක ටෙස්ට් ලෝක ශූරතාවලියට අයත් තරග වන අතර එහි පළමු වැන්න මාර්තු මස 4 වැනිදා මොහාලිහිදී පැවැත්වීමට නියමිතය. එම ටෙස්ට් තරග විරාට් කෝලිගේ 100 වැනි ටෙස්ට් තරගයද වේ.
ටෙස්ට් තරගාවලිය ආරම්භ වීමට පෙර පෙබරවාරි මස 24, 26 සහ 27 යන දිනවලදී විස්සයි-20 තරග 3 පැවැත්වෙනු ඇත. එම තරග 3 න් පළමුවැන්න ලක්නව්හිදීද, දෙවැනි සහ තෙවැනි තරග ධරම්ශාලාහිදීද පැවැත්වීමට කටයුතු යොදා තිබේ.
විස්සයි-20 තරගාවලියේ කාලසටහන
පෙබරවාරි 24 - පළමු විස්සයි-20 තරගය - ලක්නව්හිදී
පෙබරවාරි 26 - දෙවැනි විස්සයි-20 තරගය - ධරම්ශාලාහිදී
පෙබරවාරි 27 - තෙවැනි විස්සයි-20 තරගය - ධරම්ශාලාහිදී
ටෙස්ට් තරගාවලියේ කාලසටහන
මාර්තු මස 4-8 - පළමු ටෙස්ට් තරගය - මොහාලිහිදී
මාර්තු මස 12-16 - දෙවැනි ටෙස්ට් තරගය - බැංගලෝර්හිදී
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
