(නාමල් පතිරගේ)
චීනයේ ජියැක්ෂින් නුවරදී ඊයේ (30) පැවැති 19 වැනි ආසියානු මැරතන් තරගයේ පිරිමි ඉසව්වට තරග වැදුණු ශ්‍රී ලංකා ක්‍රීඩකයන් වන කුමාර් ෂන්මුගේෂ්වරන් 17 වැනි ස්ථානයත් තලාවරිගේ රත්නපාල 19 වැනි ස්ථානයත් ලැබූහ.
ආසියානු මැරතන් තරගයේ කාන්තා ඉසව්වට සහභාගිවූ ශ්‍රී ලංකා ක්‍රීඩිකා නිමේෂා නිදර්ෂනී 14 වැනි ස්ථානයට පත් වූවාය. කාන්තා ඉසව්වට සහභාගි වූ අනෙක් ශ්‍රී ලංකා ක්‍රීඩිකාව වන වත්සලා හේරත් අතරමගදී තරගයෙන් ඉවත් වූවාය.
පිරිමි ඉසව්වේදී ෂන්මුගේෂ්වරන් පැය 2 විනාඩි 25 තත්පර 48 කාලයක් ගත් අතර එය ඔහුගේ මෙතෙක් ඉසව්වේ හොදම කාලය ලෙසත් වාර්තා විය. තලාවරිගේ රත්නපාල ඊයේ ඉසව්වේ නිමි කාලය පැය 2 විනාඩි 27 තත්පර 07 ක අගයක් ගත්තේය.
මෙවර ආසියානූ ශූරතා මැරතන් (පිරිමි) රන් පදක්කම දිනා ගත්තේ උතුරු කොරියානු ක්‍රීඩක හැන් රිඔන්ග් විසිනි. ඒ පැය 2 විනාඩි 11 තත්පර 18 කටය. චීන ක්‍රීඩිකා 23 හැවිරිදි වූ බින්ග් මෙවර කාන්තා ඉසව්වේ රන් පදක්කම දිනා ගත්තේ පැය 2 විනාඩි 26 තත්පර 01 කටය. එහි රිදී පදක්කම දිනා ගැනීමෙන් උතුරු කොරියාවට මෙවර තරගයේ තවත් ඉහළම ගෞරවයක් හිමි විය.
මෙවර ශ්‍රී ලංකාවෙන් ක්‍රීඩක ක්‍රීඩිකාවන් සිව් දෙනෙකු ආසියානු මැරතන් තරගයට සහභාගි වීමේදී ඊයේ තරග වදිමින් සිටියදී අතරමග ඉවත්වූ ශ්‍රී ලංකා ක්‍රීඩිකා වත්සලා හේරත්ට ශ්‍රී ලංකා මලල ක්‍රීඩා ආයතනයෙන් එල්ල වූ චෝදනාවක් වූයේ ඇය මැරතන් තරග රීති සම්ප්‍රදාය කඩ කරමින් සතියක් ඇතුළත මැරතන් තරග දෙකකට සහභාගි වීමට ගත් උත්සහය තුළ ඇය ආසියානු තරගයේදී වඩාත්ම අසාර්ථක ක්‍රීඩිකාවක බවට පත්වූ බවයි.
මෙවර ආසියානු තරගයට ඇය නිර්දේශ කර ගත් බව පසුගිය ජනවාරි මාසයේදී දැනුම්දී තිබියදීත් දැන දැනම ඇය පසුගිය මාර්තු 23 වැනිදා පැවැති ආරක්ෂක සේවා (හමුදා) අර්ධ මැරතන් (කාන්තා) තරගයට සහභාගි වෙමින් මැරතන් රීතිය උල්ලංඝණය කර තිබෙන බවට එහිදී චෝදනා නැගේ.
කිසියම් ක්‍රීඩකයෙකු හෝ ක්‍රීඩිකාවක් පූර්ණ මැරතන් තරගයකට සහභාගිවීමෙන් පසුව ඊළග පූර්ණ මැරතන් තරගකට සහභාගි වීමට අවම මාස දෙකක කාලයක් ගත කළ යුතු බව සදහන් වේ. අර්ධ මැරතන් තරගයකට ඔහු හෝ ඇය සහභාගිවී තිබේනම් අවම ඊළග අර්ධ මැරතන් තරගයට සහභාගි වීමට අවම සති හතරක් වත් කල් ගත කළ යුතුය.
කෙසේවූවත් මෙම තත්වය උද්ගතවීමේ අවදානමක් පිළිබදව කල් ඇතිව මෙම ක්‍රීඩිකාවගේ පෞද්ගලික පුහුණුකරු දැනුවත් කළත් ඔහු එය නොතකමින් කටයුතු කර ඇතැයිද එහිදී චෝදනා නැගේ.
වත්සලා මාර්තු 23 වැනිදා පැවැති ආරක්ෂක සේවා මැරතන් තරගයේ කාන්තා ඉසව්වෙන් දෙවැනි තැනට පත්වූ ක්‍රීඩිකාවයි. ආසියානු මැරතන් තරගයේදී මෙතෙක් පදක්කමක් දිනා ගත් එකම ශ්‍රී ලාංකිකයා වන්නේ 2000 ජපානයේදී පැවැති තරගයේ පිරිමි ඉසව්වෙන් රිදී පදක්කමක් හිමි කර ගත් සරත් ප්‍රසන්න ගමගේයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
