(නාමල් පතිරගේ)
ෂීසෙල්ස් හමුවේ පෙරේදා (13 වැනිදා) රාත්‍රියේදී පැවැති තරගයෙන් ගෝල 1-0ක පරාජයක් වැළඳ ගැනීමත් සමඟ සත්කාරක ශ්‍රී ලංකාවට කොළඹදී දැන් පැවැත්වෙන ‘අගමැති කුසලාන’ සිවුකොන් පාපන්දු තරගාවලියේ අවසන් මහා තරගයට පිවිසීමට නම් තවත් ‘කඩඉමක්’ ජය ගැනීමට සිදුව තිබේ.
ඒ අනුව, හෙට (16 වැනිදා) රාත්‍රී 9ට බංග්ලාදේශයට එරෙහිව කොළඹ රිඩ් මාවත ක්‍රීඩා සංකීර්ණයේදී පැවැත්වෙන තරගය ජය ගැනීම ශ්‍රී ලංකාවට අනිවාර්යය වේ. එයින් ද ප්‍රශ්නය නිරාකරණය නොවන අතර, හෙට පස්වරු 4ට ෂීසෙල්ස් හා මාලදිවයින අතර පැවැත්වෙන තරගයේ තීරණය ද ඒ සඳහා ශ්‍රී ලංකාවට ඉතා වැදගත්ය.
මෙම තරගය මාලදිවයින ජයගතහොත් තරගාවලියට සහභාගි වී සිටින සිවු කණ්ඩායම්හි ප්‍රසාද ලකුණ ගණන සම වේ. එවිට ප්‍රතිවාදීන්ට එරෙහිව මූලික වටයේ රැස් කර ඇති ගෝල මුළු ගණන අවධානයට යොමු කරමින් එයින් අවසන් මහා තරගයට දෙපිල නිර්දේශ කෙරේ.
එය ද සම වන්නේ නම්, ප්‍රතිවාදීන්ට එරෙහිව අවම ගෝල ගණනක් ලබා දී තිබෙන කණ්ඩායම් දෙක සඳහා අවසන් මහා තරගයේ අවස්ථාව උදා වේ.
ඒ අනුව, මේ දක්වා සත්කාරක ශ්‍රී ලංකාවට එරෙහිව ගෝල හතරක් වාර්තා කර තිබේ. ප්‍රතිවාදීන් ඔවුන්ට එරෙහිව ගෝල පහක් ඒ වන විට ලබා ඇත. මාලදිවයිනේ මෙම තත්ත්වය සැලකිල්ලට ගතහොත් ප්‍රතිවාදීන්ට එරෙහිව ඔවුන් ගෝල පහක් හිමි කරගෙන තිබේ. නමුත් ප්‍රතිවාදීන් මාලදිවයිනට එරෙහිව ගෝල 6ක් ඒ වන විට ලබා තිබේ.
මෙම ගණනය කිරීම් කරන විට බංග්ලාදේශය හා ෂීසෙල්ස් රාජ්‍යය ප්‍රසාද ලකුණු සටහනේ ලකුණු හතරක් බැගින් ලබා සම තත්ත්වයේ පසු වූයේ එක් තරගයක් බැගින් ජය ලබා හා මුහුණ දුන් සෙසු තරගය සම කිරීමෙනි. ඒ අනුව මූලික වටය නිමා කරමින් පැවැත්වෙන තරග දෙක බංග්ලාදේශය හා ෂීසෙල්ස් ජය ගන්නේ නම්, ඔවුන් දෙපිලට එයින් පසුව අවසන් මහා තරගයට ප්‍රවේශ වීමේ සියලු බාධා ඉවත් වනු ඇත.
පෙරේදා රාත්‍රියේ පැවැති තරගයේදී ශ්‍රී ලංකාවට පරාජය කැන්දා දුන් වොරන් මේලි, හිසෙන් පන්දුව දැල තුළට යොමු කරමින් ජයග්‍රාහී ගෝලය වාර්තා කළේ 68 වැනි විනාඩියේදීය.
ක්‍රීඩකයන්ගේ ආදේශ කිරීමේ අවස්ථා පහක් මෙම තරගයේදී ශ්‍රී ලංකා කණ්ඩායම ලබා ගත්තේය. ප්‍රතිවාදී ෂීසෙල්ස් කණ්ඩායම ද ක්‍රීඩකයන්ගේ ආදේශ කිරීමේ අවස්ථා පහක් ලබා තිබෙන අතර, ඔවුන්ගේ ක්‍රීඩකයන් දෙදෙනකු විනිසුරු මගින් දැඩි අවවාද ලබා කහ කාඩ්පත් ලැබීම ද තරගයේ කැපී පෙනුණි.
මෙතෙක් තරගාවලියේ වැඩිම ගෝලලාභියා (4) බවට පත්ව සිටින්නේ මාලදිවයිනට එරෙහිව ගෝල හතරක් විනාඩි 28ක කාලයක් තුළදී රැස් කළ ශ්‍රී ලංකා ක්‍රීඩක අහමඩ් වසීම් රසීක්ය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
