(ශානුක අරවින්ද)
ශ්‍රී ලංකා බැඩ්මින්ටන් සංගමය සංවිධානය ‘හන්ඩ්‍රඩ් ශ්‍රී ලංකා’ ජාත්‍යන්තර අභියෝග බැඩ්මින්ටන් තරගාවලිය මෙම මස 25 වැනිදා සිට මාර්තු මස 2 වැනිදා දක්වා සුගතදාස ගෘහස්ත ක්‍රීඩාංගණයේ පැවැත්වේ.
රටවල් 28 ක් නියෝජනය කරමින් ක්‍රීඩක ක්‍රීඩිකාවෝ 667 දෙනකු සහභාගි වන මෙම තරගාවලිය සඳහා ලෝක බැඩ්මින්ටන් සම්මේලනයේ සහ ආසියානු බැඩ්මින්ටන් සංගමයේ අනුමැතියද හිමිව තිබේ. මෙම තරගාවලිය සඳහා ශ්‍රී ලංකාව නියෝජනය කරමින් ක්‍රීඩක ක්‍රීඩිකාවන් 108 දෙනකු ඉදිරිපත් වීමට නියමිතය.
පසුගිය වසරේදී (2024) ගාල්ල දඩැල්ල ජාත්‍යන්තර ගෘහස්ත ක්‍රීඩා සංකීර්ණයේ පැවැති ලීනිං ශ්‍රී ලංකා ජාත්‍යන්තර අභියෝගතා තරගාවලියේදී රන් පදක්කම් 3 ක්, රිදී පදක්කම් 3 ක් සහ ලෝකඩ පදක්කම් 4 ක් දිනාගත් ඉන්දියාව, මෙම තරගාවලිය සඳහා ක්‍රීඩක ක්‍රීඩිකාවන් 227 දෙනකු සහභාගි කිරීමට සූදානමින් සිටියි.
මැලේසියාවෙන් අයැදුම්පත් 82 ක්, චීන තායිපේ අයැදුම්පත් 52 ක් සහ තායිලන්තයෙන් අයැදුම්පත් 44 ක් ඉදිරිපත් කර ඇති අතර ඉන්දුනීසියාවෙන් තරගකරුවෝ 38 ක් සහ ජපානයෙන් තරගකරුවෝ 19 ක් තරගාවලියට සහභාගි වීමට සූදානමින් සිටිති.
ඊට අමතරව පිලිපීනයෙන් සහ වියට්නාමයෙන් තරගකරුවන් 13 දෙනකු බැගින්ද, ඕස්ටේ්‍රලියාව, බංග්ලාදේශය සහ එක්සත් අරාබි එමීර් රාජ්‍යය නියෝජනය කරමින් තරගකරුවන් 9 දෙනකු බැගින්ද තරගාවලිය සඳහා සිය සහභාගීත්වයන් තහවුරු කර තිබේ.
දකුණු කොරියාව සහ අමෙරිකාව තරගකරුවන් අටදෙනකු බැගින් තරගාවලියට යොමු කිරීමට කටයුතු යොදා ඇති අතර මාලදිවයිනෙන් 6 දෙනෙක් සහ කැනඩාවෙන් 5 දෙනෙක් තරගාවලියට එක්වීමට නියමිතය.
මියන්මාරය සහ සැම්බියාව තරගකරුවන් තිදෙනකු බැගින් තරගාවලියට සහභාගි කරවන බව තහවුරු කර ඇති අතර එංගලන්තයෙන් එක්වීමට නියමිත තරගකරුවන් සංඛ්‍යාව දෙකකි. සයිප්‍රසය, ඩෙන්මාර්කය, ඉරානය, මුරුසි රාජ්‍යය, සෞදි අරාබිය, සිංගප්පූරුව, ස්ලෝවේකියාව, ස්පාඤ්ඤය සහ තුර්කිය යන රටවලින්ද තරගකරුවකු බැගින් ඊට සහභාගි වනු ඇත.
තරග ඉසව් 5 ක් ඇතුළත් මෙම තරගාවලියේ පිරිමි කේවල ඉසව්ව යටතේ තරග කරුවන් 244 ක් තරග වදින අතර කාන්තා කේවල ඉසව්ව යටතේ තරගකාරිණියන් 136 දෙනක් ඉදිරිපත්වී සිටිති. පිරිමි යුගල තරග ඉසව්වට තරග කරුවන් 84 දෙනෙක්ද, කාන්තා යුගල ඉසව්වට තරගකාරිණියන් 74 දෙනෙක්ද සහභාගි වන අතර මිශ්‍ර යුගල ඉසව්ව සඳහා අයැදුම්පත් 75 ක් ලැබී තිබේ.
අමෙරිකානු ඩොලර් 17,500 ක මුදලක් මෙම තරගාවලියේ ත්‍යාග ලෙස බෙදා දීමට නියමිත අතර හන්ඩ්‍රඩ්, ලීනිං, මොබිල්, මැක්ෆොයිල් සහ 3 එම් යන සමාගම් සහ ආයතන තරගාවලියේ අනුග්‍රාහකයන් ලෙස කටයුතු කරයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
