(දමින්ද විජේසූරිය)
දඹුල්ල අවුරා කණ්ඩායම ආරම්භයේදීම අමාරුවේ වැටුණ නමුත් ඕස්ට්‍රේලියානු ජාතිකයන් වන බෙන් මැක්ඩොමට් (නොදැවී 69) සහ ඇලෙක්ස් රොස් (52) දෙදෙනා එක්ව කණ්ඩායම ලකුණු 166 ක් දක්වා ඇදගෙන ගියහ. එයින් දිරිමත් වූ දඹුල්ල පන්දු යවන්නෝ කලම්බු ස්ට්‍රයිකර්ස් පිල ලකුණු 116 කට සීමා කරමින් කොළඹ ආර්. ප්‍රේමදාස ක්‍රීඩාංගණයේදී අද (12 වැනිදා) පැවැති එල්.පී.එල්. තරගයේදී ලකුණු 50 ක ජයක් අත්කර ගත්හ.
මෙම තරගයේ ජයත් සමගින් දඹුල්ල පිල නැවත වරක් ප්‍රසාද ලකුණු පුවරුවේ පෙරමුණ ගත්තේය. දඹුල්ල අවුරා සතු ප්‍රසාද ලකුණු සංඛ්‍යාව 10 කි.
ලකුණු 46 කට කඩුලු 4 ක් බිඳ වැටීමෙන් අසරණ වූ දඹුල්ල අවුරා පිලේ පස්වැනි කඩුල්ල වෙනුවෙන් මැක්ඩොමට් සහ ඇලෙක්ස් රොස් එක්ව, ඕවර 9.5 කදී ලකුණු 102 ක සම්බන්ධතාවක් ගොඩනැංවූහ.
80-90 දශක වලදී ඕස්ට්‍රේලියාව වෙනුවෙන් ක්‍රීඩා කළ අති විශිෂ්ට වේග පන්දු යවන්නකු වූ ක්‍රෙග් මැක්ඩොමට්ගේ පුතණුවන් වන බෙන්ජමින් මැක්ඩොමට්, පන්දු 46 කට මුහුණ දුන්නේය. ඔහු ලබාගත් ලකුණු 69 න් ලකුණු 40 ක් හතරේ සහ හයේ පහර වලිනි. පන්දු 38 කින් ලකුණු 52 ක් ලබාගත් ඇලෙක්ස් රොස් හතරේ පහර 5 කින් සහ හයේ පහර 2 කින් සිය ඉනිම සැරසීය.
මතීෂ පතිරණ පමණක් කඩුලු 2 ක් දවාගත් අතර අනෙක් කඩුලු තුනම නසීම් ෂා, චාමික කරුණාරත්න සහ ජෙෆ්රි වැන්ඩසේ අතර බෙදී ගියේය.
කලම්බු ස්ට්‍රයිකර්ස් පිතිකරුවන් කිසිවකුට ලකුණු 21 සීමාව ඉක්මවා යා නොහැකි විය. බිනුර ප්‍රනාන්දු (18/2) සහ හසන් අලී (16/3) එක්ව කලම්බු ස්ට්‍රයිකර්ස් පිලේ පළමු කඩුලු 5 ම ලකුණු 74 කට බිම දැමූ අතර ඔවුන්ට එතැනින් නැගිටීමක් නොවීය.
දඹුල්ල අවුරා - ඕවර 20 කදී කඩුලු 5 ට 166 යි
(බෙන් මැක්ඩොමට් නොදැවී 69, ධනංජය ද සිල්වා 11, ඇලෙක්ස් රොස් 52, මතීෂ පතිරණ 36/2)
කලම්බු ස්ට්‍රයිකර්ස් - ඕවර 19.4 කදී සියලු දෙනා දැවී 116 යි
(පැතුම් නිස්සංක 12, බාබර් අසාම් 11, නිරෝෂන් දික්වැල්ල 17, නුවනිඳු ප්‍රනාන්දු 21, ඉෆ්තිකාර් අහමඩ් 18, මොහොමඩ් නවාස් 20, බිනුර ප්‍රනාන්දු 18/2, හසන් අලී 16/3, නූර් අහමඩ් 14/2, දුෂාන් හේමන්ත 16/2)
බෙන් මැක්ඩමට් සහ ඇලෙක්ස් රෝස්...
ඇලෙක්ස් රෝස්...
මතීෂ පතිරණ...
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
