ගාලු මෝටර් ක්‍රොස් තරග ඉරිදා

ශ්‍රී ලංකා යතුරුපැදි සංගමය සහ ශ්‍රී ලංකා රේසිං යතුරුපැදිකරුවන්ගේ සංගමය එක්ව සංවිධානය කරන ‘ගාලු මොටෝක්‍රොස්’ මෝටර් රථ සහ යතුරුපැදි තරගය මේ මස 19 වැනිදා ගාල්ල, අක්මීමන, කෙසෙල්ගස්හේන ධාවන පථයේදී පැවැත්වේ.

ඉසව් 16 කින් සමන්විත මෙම තරගාවලිය සඳහා දිවයිනේ ප්‍රධාන පෙළේ මෝටර් රථ රියැදුරන් සහ යතුරුපැදිකරුවන් රැසක් සහභාගි වීමට නියමිතය. එහිදී වයස 16 න් පහළ, 13 න් පහළ සහ 10 න් පහළ ලාබාල තරගකරුවන් සඳහාද යතුරුපැදි තරග පැවැත්වේ.

තරගාවලියේ සෑම ඉසව්වකම පළමු, දෙවැනි සහ තෙවැනි ස්ථාන දිනාගන්නා ක්‍රීඩකයන්ට කුසලාන සමගින් සහතිකපත් පිරිනැමීමට සංවිධායකයෝ සූදානමින් සිටිති.