ටෝකියෝ ඔලිම්පික් උළෙලේ උස පැනීමේ (කාන්තා) ඉසව්වේ රන් පදක්කම දිනා ගැනීමට රැසියානු ඔලිම්පික් කමිටුවේ මාරියා ලැසිට්ස්කේන් සමත් වූවාය. සෙනසුරාදා පැවැති අවසන් තරගයේදී මීටර් 2.04 ක උසක් පනිමින් ඇය එම ඉසව්වේ රන් පදක්කමට හිමිකම් කීවාය.
විසිඅට හැවිරිදි මාරියා, ඔලිම්පික් පදක්කමක් දිනාගත් පළමු අවස්ථාව මෙය වන අතර මීටර් 2.06 ක උසක් පැනීම ඇගේ ඉහළම දක්ෂතාව ලෙස සටහන් වේ.
මින් පෙර ඇය ලෝක මලල ක්‍රීඩා ශූරතාවලි 3 කදී, ලෝක ගෘහස්ත මලල ක්‍රීඩා ශූරතාවලි 2 කදී, යුරෝපීය ශූරතාවලියකදී සහ යුරෝපීය ගෘහස්ත මලල ක්‍රීඩා ශූරතාවලි 2 කදීද උස පැනීමේ ඉසව්වෙන් රන් පදක්කම් දිනා සිටියාය.
මීටර් 2.02 ක දක්ෂතාවක් දැක්වූ ඕස්ට්‍රේලියාවේ නිකොලා මැක්ඩොම්ට් එම ඉසව්වේ රිදී පදක්කම හිමිකරගත් අතර යුක්රේනයේ යරොස්ලාවා මහුච්ක් ලෝකඩ පදක්කමට හිමිකම් කීවේ මීටර් 2.00 ක දක්ෂතාවක් දක්වමිනි.
1987 වසරේදී මීටර් 2.09 ක උසක් පනිමින් එම ඉසව්වේ ලෝක වාර්තාව පිහිටුවීමට බල්ගේරියාවේ ස්ටෙෆ්කා කොස්ටඩිනෝවා සමත් වූ අතර 2004 වසරේදී මීටර් 2.06 ක උසක් පනිමින් එහි ඔලිම්පික් වාර්තාව තමන් සතුකර ගැනීමට රුසියාවේ යෙලීනා ස්ලෙසරෙන්කෝ සමත් වූවාය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
