(නාමල් පතිරගේ ප්‍රංශයේ පැරිස් නුවර සිට..)
මලයාසියානු ක්‍රීඩක සී ජියා ලී සමග ඊයේ (27) තරග වැදීමෙන් පසුව වට 2-0 කින් පරාජයට පත්වූ ශ්‍රී ලංකා බැඩ්මින්ටන් ක්‍රීඩක විරේන් නෙත්තසිංහ පැරිස් ඔලිම්පික් බැඩ්මින්ටන් තරගාවලියේ කේවල (පිරිම්) මූලික වටයේ සිය දෙවැනි තරගයට අගහරුවාදා (30) සහභාගිවීමට නියමිතය. මෙවර පිට පිටම පස් වැනි ඔලිම්පික් උළෙලට සහභාගිවී සිටින ලොව නම් දැරූ බැඩ්මින්ටන් ක්‍රීඩකයෙකු වන 39 හැවිරිදි ස්පාඤ්ඤයේ පැබ්ලෝ ඒබියන්, විරේන්ට පැරිස් ඔලිම්පික් උළෙලේදී මුණ ගැසෙන දෙවැනි ප්‍රතිවාදී ක්‍රීඩකයාය.
එම මුණ ගැසීම හෙට ශ්‍රී ලංකා වේලාවෙන් දහවල් 12 ට (ප්‍රංශ වේලාවෙන් පෙරවරු 8.30) සිදු වේ. විරේන් ඊයේ සී ජියාට පරාජය වූයේ ලකුණු 21/14 හා 21/12 ක් පරිදිය. සී ජියා මෙම තරගයට සහභාගි වන විට ලෝක ශ්‍රේණිගත කිරීම් අනුව හත්වැනි ස්ථානයේ පසු විය. එවිට 21 හැවිරිදි විරාන්ට එහි හිමිව තිබුණේ 67 වැනි ස්ථානයයි.
ඊයේ තරග නිමාවෙන් පසුව විරේන් නෙත්තසිංහ ‘ලංකාදීප’යට පැවැසුවේ අත්දැකීම් පිරිපුන් මැලේසියානු ක්‍රීඩකයාට මුහුණදීමේදී තමන් අතින් අත් වැරදීම් කීපයක්ම සිදුවූ බවය.
“මේ ඔලිම්පික් උළෙලේදී මට ලැබෙන්නේ අත්දැකීම් විතරයි කියලා මා දැන ගෙන හිටියා. විශේෂයෙන්ම මට මුණ ගැසෙන්නෙත් අහසට පොළොව වගේ ප්‍රතිවාදීන් දෙදෙනෙක්. නමුත් තවත් ඔලිම්පික් උළෙලක අවස්ථාවක් මට ලැබුණොත් මා හිතනවා මගේ හැකියාව මීට වැඩිය වෙනස් වෙයි කියලා.” යයිද විරේන් එහිදී වැඩිදුරටත් පැවැසීය.
විරේන් සිය ඉසව්වේ ඉදිරියට යාමට නම් හෙට දෙවැනි වටයේ තරගය ජය ගත යුතුමය.
මේ අතර පැරිස් ඔලිම්පික් තරග බිමට පිවිස සිටින ශ්‍රී ලංකා ක්‍රීඩක ක්‍රීඩිකාවන් අතරින් පිහිනුම් ක්‍රීඩිකා ගංගා සෙනවිරත්න අද (29) මීටර් 100 (කාන්තා - පසුපස ආර) ඉසව්වේ මූලික වටයේ තරගයට සහභාගි වේ. එය ශ්‍රී ලංකා වේලාවෙන් පස්වරු 2.30 ට පැවැත්වේ.
මෙම ශ්‍රී ලංකා ක්‍රිඩිකාව පංගු ක්‍රමයෙන් පැරිස් ඔලිම්පික් සහභාගිත්වය ලබා ගත් අතර මිට පෙර ඇය හංජෝ ආසියානු ක්‍රීඩා උළෙල (2023), බර්මිංහැම් පොදු රාජ්‍ය මණ්ඩලීය ක්‍රීඩා උළෙල (2022), ලෝක ශූරතා ජල ක්‍රීඩා තරගාවලි (2023 පූකෝකා හා 2024 කටාර්) දෙකකටද සභභාගිවී තිබේ.
ඇය කත්මන්දු 2019 සාග් ක්‍රීඩා උළෙලේදී රිදී පදක්කම් තුනක් හා එක් ලෝකඩ පදක්කමක් දිනා ඇත. ඒ හැරෙන්නට සිංගප්පූරු (2023) ජාතික තරගාවලියේදී රිදී පදක්කමක්ද ලැබ තිබේ.
ශ්‍රී ලංකා පිහිනුම් ක්‍රීඩක කයිල් අබේසිංහ හෙට (30) තරග වදින අතර මලල ක්‍රීඩිකා තරුෂි දිල්සරා කරුණාරත්න මීටර් 800 (කාන්තා) ඉසව්වේ මූලික වටයට අගෝස්තු 2 වැනිදා තරග වැදීමට සූදානමින් සිටින්නීය.
ශ්‍රී ලංකා කණ්ඩායමේ ප්‍රධානී චන්දන ලියනගේ මහතා පැවැසුවේ පැරිස් ඔලිම්පික් උළෙලට සහභාගිවී සිටින ශ්‍රී ලංකා කණ්ඩායම් සියළුම ක්‍රීඩක ක්‍රීඩිකාවන් පෙර පුහුණුවීම් වල නිරත වෙමින් සිටින බවත් ඔවුන් හොද සෞඛ්‍ය තත්වයෙන් පැරිස් නුවර පසුවන වන බවත්ය.
කෙසේ වූවත් ශ්‍රී ලංකා කණ්ඩායම් වෛද්‍ය නිලධාරීවරයා වන වෛද්‍ය හිමාන් ද සිල්වා මහතා වීසා ප්‍රමාදයක් හේතුවෙන් ඊයේ වන විටත් පැරිස් නුවරට ළගාවී නොසිටියේය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
