සුනිල සංග්‍රාමය මොරටුවේදී

අම්බලන්ගොඩ ධර්මාශෝක විදුහල සහ දේවානන්ද දෙවිදුහල් අතර 52 වැනි “සුනිල සංග්‍රාම” වාර්ෂික මහා ක්‍රිකට් තරගය මේ මස 30 සහ 31 දෙදින මොරටුව ද සොයිසා ක්‍රීඩාංගණයේදී පැවැත්වේ.

ධර්මාශෝක විදුහල් කණ්ඩායම දිනුක දිල්ෂාන් විසින් මෙහෙයවනු ලබන අතර සොහාන් ලිවේරා දේවානන්ද විද්‍යාලයීය කණ්ඩායමට නායකත්වය ලබා දෙයි.

මෙම මහා ක්‍රිකට් තරගයේ මේ දක්වා පැවැති තරග 51 කින් ගිය වසර ද (2018) ඇතුළත්ව ධර්මාශෝක විදුහල ජයග්‍රහණ 11ක් වාර්තා කර ඇති අතර දේවානන්ද විද්‍යාලය එක ජයක් පමණක් ලබා තිබේ.

දිනුක දිල්ෂාන්ගේ නායකත්වයෙන් යුතුව පළමු කොටසින් මෙවර පාසල් ක්‍රිකට් තරගාවලියට පිවිසි ධර්මාශෝක විද්‍යාලය සහභාගි වූ තරග 16න් තරග තුනක පූර්ණ ජයත්, පළමු ඉනිමේ ජයග්‍රහණ දහයක් වාර්තා කරගෙන ඇති අතර තරගයක් පූර්ණ පරාජයට පත්වී පළමු ඉනිමේ පරාජයන් දෙකක් හිමි කර ගෙන ඇත.

සොහාන් ලිවේරාගේ නායකත්වයෙන් දෙවැනි කොටසින් මෙවර පාසල් ක්‍රිකට් තරගාවලියට පිවිසි දේවානන්ද විද්‍යාලය සහභාගි වූ තරග 16න් තරග තුනක පූර්ණ ජයත්, පළමු ඉනිමේ ජයග්‍රහණ නවයක් හිමිකරගෙන ඇති අතර පූර්ණ පරාජයන් දෙකක් හා පළමු ඉනිමේ පරාජයන් දෙකක් ද හිමි කරගෙන තිබේ.

නායක දිනුක දිල්ෂාන් ධර්මාශෝක විදුහලේ ප්‍රබලම තුන් ඉරියව් ක්‍රීඩකයාය. ඔහු මෙවර තරගාවලියේ පිතිකරුවකු ලෙස ලකුණු 875ක් රැස්කරමින් පන්දු යවන්නෙකු ලෙස කඩුලු 61ක් දවාගෙන තිබේ.

කවිඳු නදිෂාන් (534), ලොහාන් සොයිසා (841), හසිත රාජපක්‍ෂ (463) සහ පෙනා දේශධි (475) මෙවර ධර්මශෝක විදුහල් පිලේ සෙසු ප්‍රබල පිතිකරුවෝ වෙති.

දේවානන්ද විදුහලට නායකත්වය දෙන සොහාන් ලිවේරා කණ්ඩායමේ සිටින විශ්වාසවන්තම පිතිකරුය. මෙවර තරගාවලියේදී දෙවැනි කොටසේ පළමුවෙන්ම ලකුණු 1000 ඉක්ම වූ ක්‍රීඩකයා වූයේ ද ඔහුය. ඔහු රැස්කර ගෙන ඇති ලකුණු සංඛ්‍යාව 1209කි.

ප්‍රවීන් අවිශ්ක කණ්ඩායමේ සිටින තුන් ඉරියව් ක්‍රීඩකයෙකි. ඔහු මෙවර තරගාවලියේදී ලකුණු 325ක් රැස්කර ගෙන ඇති අතර පන්දු යවමින් කඩුලු 42ක්ද ලබාගෙන ඇත.

බිවිදු ජීවන්ත, හේෂාන් මිලක්‍ෂ, චමිදු අනුෂ්ක සහ චාමික පෙරේරා දේවානන්ද විදුහල් පිලේ සෙසු ප්‍රබල ක්‍රීඩකයෝ වෙති.