(නාමල් පතිරගේ)
සභා සම්මත නොවූ වාර්තාවක් නිලවරණ කමිටුවට ඉදිරිපත් කිරීමෙන් ශ්‍රී ලංකා දැල්පන්දු සම්මේලනයේ යෝජිත නිලවරණය පක්ෂග්‍ර්‍රාහි ස්වරූපයක් ගෙන ඇතැයි රාජ්‍ය සේවා දැල්පන්දු සංගමයේ සභාපතිනි හා ශ්‍රී ලංකා දැල්පන්දූ සම්මේලනයේ හිටපු සභාපතිනියක්ද වන ට්‍රික්ෂි නානායක්කාර මහත්මිය චෝදනා කරයි.
කොළඹදී විශේෂ මාධ්‍ය හමුවක් කැඳවමින් ඇය පැවැසුවේ මේ තත්වයට දැල්පන්දු සම්මේලනයේ හිටපු සභාපතිනිය ඇතුළු විධායක සභාව වගකිවයුතු බවයි.මේ තුළින් දැල්පන්දු ක්‍රීඩාවෙන් ප්‍රගුණ කරන විනය ගරුක තේමාව බිද වැටී ඇතැයි පැවැසූ නානායක්කාර මහත්මිය දැල්පන්දු සම්මේලනයේ ව්‍යවස්ථාවේ නැති වගන්තියක් යොදා ගනිමින් මෙම තත්වය නිර්මාණය කර ඇතැයිද වැඩිදුරටත් පැවැසීය.
ශ්‍රී ලංකා දැල්පන්දු සම්මේලනයේ මීළග නිලවරණය (2024 - 26) ජූලි 25 වැනිදා පැවැත්වීමට නියමිතය.ඒ සදහා හිටපු සභාපතිනි ලක්ෂ්මී වික්ටෝරියා හා හිටපු සභාපතිනියක් වන තමාරා ධර්මකීර්ති හේරත් මහත්මිය නාමයෝජනා බාරදී තිබේ.
එහිදී ට්‍රික්ෂි නානායක්කාර මහත්මිය සභාපතිත්වය දරන රාජ්‍ය සේවා සංගමයේ සහාය තමාරා ධර්මකීර්ති හේරත් මහත්මියට ලැබී ඇත.
වාර්ෂික තරගාවලි සදහා අඛණ්ඩව සහභාගි වීමෙන් වඩාත්ම ක්‍රියාකාරි සංගම් ලෙස පිළිගැනෙන වෙෙළද සේවා, කළුතර හා කොළඹ යන දැල්පන්දු අනු සංගම් තුනක් ඇතුළුව සංගම් 10 කගේ පමණ මෙවර නිලවරණයේදී ඡන්ද බලය අහෝසි කර ඇතැයි එහිදී චෝදනා නැගේ.
මෙහිදී මාධ්‍යවේදින් නැගූ ප්‍රශ්න ගණනාවකට පිළිතුරු දෙමින් නානායක්කාර මහත්මිය මෙසේද පැවැසුවාය.
"චෝදනා කරන්නේ කාටද කියලා ඇහුවාම හිටපු සහාපතිනී ලක්ෂ්මී වික්ටෝරියා මහත්මිය අනිවාර්යයෙන්ම ඊට වගකිව යුතුයි.නිලවරණයට ඉදිරිපත් වීමේදී අනුසංගම් ඉදිරිපත් කළ යුතු අනිවාර්ය ලේඛන අතර ඔවුන්ගේ මහ සභා රැස්වීම්හි අත්සන් ලේඛනයක් ගැන දැක්වෙනවා.
නමුත් නිලවරණ කමිටුව දැනුම් දුන් මුල් ලිපියේ ඒ බවක් දක්වා තිබුණේ නෑ.මේක දැල්පන්දු සම්මේලනයේ වයවස්ථාව අමු අමුවේ උල්ලංඝනය කිරීමක්.දැන් අපට ඉතිරි වෙලා තිබෙන්නේ ක්‍රීඩා ඇමැතිවරයාට හා ක්‍රීඩා අධ්‍යක්ෂ ජනරාල්වරයාට පැමිණිලි කිරීම පමණයි.
මේ පිළිබඳව සාධාරණව සිතා බලන්න කියලා අපි මාධ්‍යවේදීන්ගෙන් ඉල්ලා සිටිනවා. මගේ සංගමයට ඡන්ද බලය තිබෙනවා. නමුත් අසාධාරණය වෙනුවෙන් මම එදත් පෙනී හිටියා. අදත් පෙනී සිටිනවා.සාධාරණව කවුරු දිනුවත් ඒක මට ප්‍රශ්නයක් නොවෙයි."
ට්‍රික්ෂි නානායක්කාර මහත්මියගේ මෙම මාධ්‍ය හමුවට සහාය දක්වමින් ශ්‍රී ලංකා දැල්පන්දු කණ්ඩායමේ හිටපු නායිකාවන් වන දමයන්ති ජයතිලක , ෂශිකා සමරසිංහ, ජයන්ති සෝමසේකරම්, ජාතික කණ්ඩායමේ හිටපු ක්‍රීඩිකාවන් වන නර්මදා විජේරත්න , ලක්මිණි ගුණවර්ධන , තිසංගනී කොඩිතුවක්කු , මහේෂිකා ප්‍රියදර්ශනී , නිරෝෂණී සමන්දිකා, දිලීපා සුරංගනී යන මහත්මීහුද මෙම අවස්ථාවට පැමිණ සිටියහ. දමයන්ති ජයතිලක මහත්මිය ජාතික දැල්පන්දු තේරීම් කමිටුවේ හිටපු සභාපතියද වේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
