(නාමල් පතිරගේ)
බහරේන් රාජ්‍යයේ මනමා නගරයේදී ලබන බ්‍රහස්පතින්දා (2) ආරම්භ වන සිව්වැනි ආසියානු පැරා ක්‍රීඩා උළෙලට සහභාගි වන ශ්‍රී ලංකා කණ්ඩායම හෙට (27) දිවයිනෙන් පිටත්ව යයි. දෙසැම්බර් 6 වැනිදා දක්වා එහිදී පැවැත්වෙන ක්‍රීඩා උළෙලට ශ්‍රී ලංකාවෙන් ක්‍රීඩක ක්‍රීඩිකාවන් අට (8) දෙනකුගෙන් සමන්විත කණ්ඩායමක් ඉදිරිපත් වී සිටියි. ඉන් අයෙක් දෘශ්‍යාබාධිත ක්‍රීඩිකයකුට මග පෙන්වන ක්‍රීඩකයෙකි.
ආසියානු කලාපයේ රටවල් 39 කින් බහුතරයක් සිව් වසරකට වරක් පැවැත්වෙන මෙම ක්‍රීඩා උළෙලට ක්‍රීඩක ක්‍රීඩිකාවෝ 800ක් පමණ ඉදිරිපත් කරති.
වයස 20න් පහළ ක්‍රීඩක ක්‍රීඩිකාවන් සහභාගි වන පැරා ආසියානු ක්‍රීඩා උළෙලට නිර්දේශිත ශ්‍රී ලංකා කණ්ඩායමේ ක්‍රීඩක ක්‍රීඩිකාවෝ පාසල් ශිෂ්‍ය ශිෂ්‍යාවෝ වෙති. ඒ හේතුවෙන් අධ්‍යාපන අමාත්‍යාංශයේ නියෝජිතයෙක්ද පරිවාර නිලධාරි මණ්ඩලයට ඇතුළත්ව සිටියි.
මලල ක්‍රීඩා ඇතුළුව ක්‍රීඩා ඉසව් නවයකට පමණක් සීමා වන පැරා ආසියානු ක්‍රීඩා උළෙලට මෙවර සහභාගි වන ශ්‍රී ලංකා කණ්ඩායමට පළමු වතාවට ක්‍රීඩා අමාත්‍යාංශය පූර්ණ අනුග්‍රහය දැක්වයි. නිමාවට පත්වූ ‘ටෝකියෝ පැරාලිම්පික් උළෙලේදී ශ්‍රී ලංකාව ලෝක වාර්තාවක් ද පිහිටුවමින් රන් පදක්කමක් හා ලෝකඩ පදක්කමක් දිනා ගැනීමෙන් ලබාගත් ඉහළ කීර්තිය මෙවර පැරා ආසියානු යොවුන් ක්‍රීඩා උළෙලට සහභාගි වන ශ්‍රී ලංකා කණ්ඩායමේ අනුග්‍රහයටද විශාල පිටුවහලක් වූ බව කණ්ඩායම් ප්‍රධානියා ලෙස කටයුතු කරන ජාතික පැරාලිම්පික් කමිටුවේ උප සභාපති ප්‍රියන්ත පීරිස් මහතා පැවසීය.
වසර 2017 දී ඩුබායි නුවරදී පැවති තෙවනි ක්‍රීඩා උළෙලේදී ශ්‍රී ලංකාව පදක්කම් දිනා නැත. එහෙත් 2013 ක්වාලාලාම්පූර් ක්‍රීඩා උළෙලේදී ශ්‍රී ලංකාව රන් පදක්කම් තුනක් (3) හා රිදී පදක්කම් දෙකක් (2) දිනා ගනිමින් දස්කම් දක්වා තිබේ.
කොළඹ ඇලිතියා ජාත්‍යන්තර පාසලේ සිසුවෙකු වන ජේසන් ජයවර්ධන සංචාරක ශ්‍රී ලංකා කණ්ඩායමේ වඩාත් අවධානය දිනා ගත් ක්‍රීඩකයා බවට පත්ව සිටින්නේ ඔහුගේ අඩු උස හේතුවෙනි. 18 හැවිරිදි ජේසන් ටී - එෆ් 40 හෙවත් සෙන්ටිමීටර 130 ට අඩු පිරිමි කාන්ඩයෙන් කවපෙත්ත විසි කිරීම, යගුලිය විසි කිරීම හා මීටර 100 යන ඉසව් සඳහා තරග වදියි.
පරිවාර නිලධාරීන් හා පුහුණුකරුවන් අට දෙනකුගේ සහය බහරේන් බලා යන සංචාරක ශ්‍රී ලංකා පැරා ක්‍රීඩා කණ්ඩායමට හිමිව තිබේ. ශ්‍රී ලංකා කණ්ඩායම ජෛව බුබුළක ආරක්ෂාව මධ්‍යයේ පසුගිය දිනවල පුහුණුවීම් පවත්වා ගෙන ගියේය.
ශ්‍රී ලංකා කණ්ඩායමේ නායකයා ලෙස නිර්දේශ වී සිටින පිහිනුම් ක්‍රීඩක නවීඩ් රහීම් 2017 පැවැති ක්‍රීඩා උළෙලටද සහභාගි වූ ක්‍රීඩකයෙකි. ඔහු සමාරම්භක උත්සවයේදී ශ්‍රී ලංකා කණ්ඩායමේ ජාතික ධජය රැගෙන යාමේ ගෞරවය ලබනු ඇත.
සිව් වැනි පැරා ආසියානු යොවුන් ක්‍රීඩා උළෙලට සහභාගි වන ශ්‍රී ලංකා කණ්ඩායම:
ජනනි ධනංජනා (ටී - 46 එක් අතක් වැළමිටෙන් පහළින් / ඉහළින් අහිමි හෝ සමාන තත්ත්වයන් කාන්තා මීටර 100 මීටර් 200 දුර පැනීම)
සෆ්රාන් මහම්මදු (ටී 46 එක් අතක් වැළමිටෙන් පහළින් /ඉහළින් අහිමි පිරිමි - දුර පැනීම), ඉසුරු හංසක (ටී 47 එක් අතක් වැළමිටෙන් පහළින් / ඉහළින් අහිමි පිරිමි: මීටර 100 මීටර 200 දුර පැනීම)
ජේසන් ජයවර්ධන (ටී 41 සෙන්ටිමීටර 130ට අඩු - පිරිමි මීටර 100, කවපෙත්ත සහ යගුලිය විසිකිරීමේ ඉසව්)
රවිඳු චිරන්ජය (ටී-11 පූර්ණ දෘෂාබාධිත - මීටර 100, මීටර 200 සහ මීටර 400),
පන්සිළු පසන් (රවිඳු චිරන්ජයට මගපෙන්වන ධාවකයා)
නවීඩ් රහීම් (එස්. 10 මාංශපේෂි ආබාධ/ පාදයේ - පිරිමි මීටර 50 හා මීටර 100 නිදහස් ආර), ගැලීනා බස්නායක (එස්. 10 මාංශපේෂි ආබාධ /පාදයේ කාන්තා - මීටර 50 මීටර 100 හා මීටර 400 නිදහස් ආර)
නිලධාරී මණ්ඩලය
කණ්ඩායම් ප්‍රධානී ප්‍රියන්ත පීරිස්, පිහිනුම් පුහුණුකරු - ජුලියන් බෝලින්, වෛද්‍ය නිලධාරි වෛද්‍ය රවී බස්නායක, ක්‍රීඩිකාවන් භාර නිලධාරිනී - ලසන්තා ශ්‍රියාකාන්ති, අධ්‍යාපන අමාත්‍යාංශයේ නියෝජිත – දුමීර මධුරංග, මලල ක්‍රීඩා පුහුණුකරු- සුරේෂ් නිලන්ද සෙනරත් යන මහත්ම මහත්මීන්.
ඡායාරූප – සිව්වැනි පැරා ආසියානු ක්‍රීඩා උළෙලට සහභාගි වන ශ්‍රී ලංකා කණ්ඩායම
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
