(නාමල් පතිරගේ)
ජාතික තරුණ සේවා සභාව සංවිධානය කරන 33 වැනි ජාතික යොවුන් ක්‍රීඩා උළෙලේ කබඩි තරගමාලාව වර්ජනය කරමින් ඊට විනිසුරුවන් හා තීරකවරුන් සහභාගි කිරීම අත්හිටුවන බව ශ්‍රී ලංකා කබඩි සම්මේලනයේ සභාපති අනුර පතිරණ මහතා පවසයි. මෙම කබඩි තරග මාලාව ලබන සිකුරාදා හා සෙනසුරාදා (19, 20) කාන්තා හා පිරිමි කණ්ඩායම් 52 ක සහභාගිත්වයෙන් යාපනය ස්කාන්ත්වෝදය විදුහල් පිටියේදී පැවැත්වීමට නියමිතය.
ගාල්ල දිස්ත්‍රික්කයේ අන්තර් ප්‍රාදේශීය ලේකම් කොට්ඨාස යොවුන් ක්‍රීඩා කබඩි තරගාවලියේදී විනය ක්‍රියාමාර්ග හමුවේ තහනමට ලක් කළ විනිසුරුවන් දෙදෙනකු මෙම තරගාවලියට සහභාගි කරගැනීමට විරෝධය පළ කරමින් කබඩි සම්මේලනය මෙම තීරණයට පැමිණ ඇත.
මෙම විනිසුරුවන් දෙදෙනා විනිශ්චයට හවුල් කරගත් එකී ප්‍රාදේශීය කබඩි තරගාවලිය නැවත නිවැරැදි පිළිවෙළකට පැවැත්වීම හැරෙන්නට මේ සම්බන්ධයෙන් කබඩි සම්මේලනයට එකඟ විය හැකි වෙනත් විකල්පයක් නැතැයි ද අනුර පතිරණ මහතා වැඩිදුරටත් පැවැසීය.
මේ අතර, තරුණ සේවා සභාවේ සභාපති දමිත වික්‍රමසිංහ මහතාගෙන් කළ විමසුමකදී පැවැසුවේ, කුමන තත්ත්වයක් මැද වුව ද මෙම තරගාවලිය යොදාගත් දින දෙකේදීම පවත්වා අවසන් කිරීමට කටයුතු කරන බවයි. ඒ සඳහා කබඩි සම්මේලනය සමග මේ වන විට පවත්වන සාකච්ඡා ධනාත්මක මට්ටමක පවතින බවත් ඔහු එහිදී වැඩිදුරටත් පැවැසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
