(නාමල් පතිරගේ)
අද (27 වැනිදා) පස්වරු 4.00 ට පැවැත්වෙන ජාතික ඔලිම්පික් කමිටුවේ වාර්ෂික මහ සභා රැස්වීම සඳහා ශ්‍රී ලංකා ජල ක්‍රීඩා සංගමය නියෝජනය කරමින් සභාපතිවරුන් දෙදෙනකු සහභාගි වන බව වාර්තා වේ.
එහිදී එහි වත්මන් සභාපති නේතෘෘ නානායක්කාර මහතා මෙන්ම අන්තර්ජාතික ජල ක්‍රීඩා සංගමය තවදුරටත් ශ්‍රී ලංකා ජල ක්‍රීඩා පරිපාලන ඒකකයේ ප්‍රධානියා ලෙස පිළිගන්නා බව පැවසෙන මහින්ද ලියනගේ මහතා ද අද පැවැත්වෙන ජාතික ඔලිම්පික් කමිටුවේ මහ සභා රැස්වීම නියෝජනය කරති.
ජල ක්‍රීඩා සංගම් ආරංචි මාර්ග සඳහන් කරන අන්දමට ඒ සඳහා ජාතික ඔලිම්පික් කමිටුව නිල වශයෙන් ආරාධනා කර ඇත්තේ මහින්ද ලියනගේ මහතාටය. කෙසේ වෙතත් නේතෘෘ නානායක්කාර මහතා ජාතික ඔලිම්පික් කමිටුවට අවධාරණය කර ඇත්තේ ක්‍රීඩා අමාත්‍යාංශය පිළිගත් නිලවරණ දෙකකදීම ජල ක්‍රීඩා සංගමයේ සභාපති ධුරයට පත්වූ තමාට ජාතික ඔලිම්පික් කමිටුවේ මහ සභා රැස්වීම නියෝජනය කිරීමේ නීත්‍යානුකූල හිමිකම ලැබිය යුතු බවයි. ඔහුගේ එම මතය පිළිගත් ජාතික ඔලිම්පික් කමිටුව ඔහුටද අද පැවැත්වෙන මහ සභා රැස්වීම ජල ක්‍රීඩා සංගමය වෙනුවෙන් නියෝජනය කිරීමේ අවස්ථාව සලසාදී තිබේ.
මහින්ද ලියනගේ මහතා නේතෘෘ නානායක්කාර මහතාගේ සභාපතිත්වයෙන් යුත් ජල ක්‍රීඩා සංගමයේ විධායක සභාවේද සාමාජිකයෙකි.
අද පැවැත්වෙන මෙම මහ සභා රැස්වීම සඳහා ජාතික ක්‍රීඩා සංගම් 32ක නියෝජිතයෝ 96 දෙනෙක් සහභාගි වෙති. ඒ එක් සංගමයකින් නියෝජිතයන් තිදෙනකු බැගිනි. ඒ අනුව ජල ක්‍රීඩා සංගමය වෙනුවෙන් මහ සභා රැස්වීම නියෝජනය කරන සෙසු නියෝජිතයා වන්නේ සුමුදු ලියනගේ මහත්මියයි.
ටොරින්ටන් පෙදෙසේ ඔලිම්පික් කමිටු ශ්‍රවණාගාරයේදී මහ සභා රැස්වීම පැවැත්වේ. ඒ සඳහා ජාතික ක්‍රීඩා සංගමයකින් නියෝජිතයන් තිදෙනකු සහභාගි වීමේදී එක් අයෙකුට පමණක් ශ්‍රවනාගාරයේ අසුන් ගැනීමට ඉඩ ලැබේ. සෙසු නියෝජිතයන් දෙදෙනා සූම් තාක්ෂණය ඔස්සේ රැස්වීම හා සම්බන්ධ වෙති.
මේ අතර ශ්‍රී ලංකා පාපැදි සම්මේලනයේ පාර්ශ්ව දෙකක් දේශීය පාපැදි පරිපාලනයට අයිතිය කියාපාන තත්ත්වයක් තුළ අද මහ සභා රැස්වීමට ඔලිම්පික් කමිටුවෙන් ආරාධනා ලබා ඇත්තේ අන්තර් ජාතික පාපැදි සම්මේලනය විසින් පිළිගනු ලබන අන්තර් ජාතික පාපැදි විනිසුරු එන්. කරුණාරත්න මහතාය. කෙසේ වුවත් පසුගිය අප්‍රේල් 6 වැනිදා පැවැති නිලවරණයෙන් තේරී පත්වූ එච්. එල්. ක්‍රිෂාන්ත මහතා ශ්‍රී ලංකා පාපැදි සම්මේලනයේ වත්මන් සභාපතිවරයා ලෙස ක්‍රීඩා අමාත්‍යාංශය පිළිගනියි.
අද පැවැත්වෙන ඔලිම්පික් කමිටු මහ සභා රැස්වීමේ ප්‍රධාන අරමුණක් වන්නේ ගිණුම් වාර්තා අනුමත කර ගැනීමය. ජාතික ඔලිම්පික් කමිටුවේ නිලවරණය ලබන වසරට යෙදී තිබේ. එහිදී ජාතික ක්‍රීඩා සංගම් 32කට හැරෙන්නට ජාතික ඔලිම්පික් කමිටුවේ ක්‍රියාත්මක ක්‍රීඩකයන්ගේ කමිටුවට ද ඡන්ද බලය හිමිව තිබේ. ක්‍රීඩකයන්ගේ කමිටුවට ඡන්ද දෙකක් නිලවරණයේදී හිමිවේ. එහි සභාපති ධුරය දරන්නේ ප්‍රවීණ බැඩ්මින්ටන් ක්‍රීඩක නිලූක කරුණාරත්නය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
