(නාමල් පතිරගේ)
ශ්‍රී ලංකා දැල්පන්දු සම්මේලනය සඳහා නව විධායක සභාවක් තෝරා ගන්නා එහි නිලවරණය (2021-21) අද (15) පෙරවරු 10ට රීඩ් මාවත ක්‍රීඩා අමාත්‍යාංශ ශ්‍රවණාගාරයේදී පැවැත්වේ.
දැල්පන්දු සම්මේලනයේ පත්වන නව විධායක සභාව සභිකයන් පස් දෙනකුට පමණක් සීමාවන අතර නිල කාලය ද එක් වසරකට සීමා වේ.
ප්‍රධාන දෙපාර්ශ්වයක් අතර මෙවර තරගයක් පැවැතියත් අපේක්‍ෂිකාවන් පස් දෙනකු සභාපති ධුරයට නාමයෝජනා බාරදී තිබේ. ඒ අනුව පාර්ලිමේන්තු මන්ත්‍රීනි කෝකිලා ගුණවර්ධන හා සබරගමුව පළාත් සභාවේ ලේකම් රංජනී ජයකොඩි යන මහත්මීන් සභාපති ධුරයට තරග වදින ප්‍රධාන දෙපාර්ශ්වයන් අතර මෙවර විධායක සභාවේ තනතුරු සඳහා උණුසුම් සටනක් ඇති වී තිබේ.
කෙසේ වුවත් හයිසින්ත් විජේසිංහ, පද්මා ගුණවර්ධන හා ශීතා පතිරණවසම් යන මහත්මීන් ද මෙවර සභාපති ධුරයට නාමයෝජනා බාරදී ඇත්තේ ප්‍රධාන දෙපාර්ශ්වයට සහයෝගය පළ කරමිනි. මෙම අපේක්‍ෂිකාවන් දැල්පන්දු පුහුණුකරුවන් වන බවටත් එමෙන්ම දැල්පන්දු ක්ෂේත්‍රයේ වෙනත් චෝදනා ලැබූවන් බවටත් ඉදිරිපත් වූ විරෝධතා නිලවරණ කමිටුව ඉවත දමා තිබේ.
ප්‍රධාන අපේක්‍ෂිකාවන් වන රංජනී ජයකොඩි මහත්මියගේ ක්‍රීඩා සුදුසුකම් පිළිබඳවත් විරෝධතාවයක් එල්ල වුවත් එයත් නිලවරණ කමිටුවෙන් ප්‍රතික්ෂේප වී තිබේ.
මේ අතර ශ්‍රේෂ්ඨාධිකරණ විශ්‍රාමලත් විනිසුරු විමල් නම්බුවසම් මහතාගේ සභාපතීත්වයෙන් යුත් සිවු පුද්ගල නිලවරණ කමිටුව විසින් මෙවර නිලවරණයෙන් දිස්ත්‍රික් හා අනු සංගම් නවයක් ඉවත් කිරීමෙන් ඡන්ද බලය අනු හා දිස්ත්‍රික් සංගම් 24කට පමණක් සීමා වී තිබේ. ඒ අතර කැපී පෙනෙන්නේ ක්‍රියාකාරී අනු සංගමයක් ලෙස දැල්පන්දු ක්ෂේත්‍රයේ ඉහළින් පිළිගැනීමට ලක්වුණු කටුනායක නිදහස් වෙළෙඳ කලාප ක්‍රීඩා සංගමය ද මෙවර ක්‍රියාකාරී සංගම් නාමලේඛනයෙන් ඉවත් කිරීමය. දැල්පන්දු සම්මේලනයේ හිටපු සභාපතිනියක් ද වන යසා රාමචන්ද්‍ර මහත්මිය මෙහි දීර්ඝ කාලයක් තිස්සේ සභාපති ධුරය උසුළයි.
ශ්‍රී ලංකා දැල්පන්දු සම්මේලනයේ (2021-21) අද (15) පැවැත්වෙන නිලවරණය සඳහා ඉදිරිපත් වූ නාමයෝජනා
සභාපති ධුරයට:- කෝකිලා ගුණවර්ධන (ගම්පහ), රංජනී ජයකොඩි (මාතලේ), හයිසින්ත් විජේසිංහ (කෑගල්ල), පද්මා ගුණවර්ධන (කොළඹ) හා ශීතා පතිරණවසම් (බදුල්ල) යන මහත්මීහු
ප්‍රධාන ලේකම් ධුරයට:- චම්පා ගුණවර්ධන (කළුතර) හා කුමුදුණී ගෝමස් (බස්නාහිර) යන මහත්මීහු
භාණ්ඩාගාරික ධුරයට:- නීතිඥ පද්මිණි හොරණගේ (කොළඹ) හා සංජීවනී වනසිංහ (වෙළෙඳ සේවා) යන මහත්මීන්
උපලේකම් ධුරයට:- සුභානි උඩවත්ත (කොළඹ) හා එස්. අනීතා (යාපනය)
උප භාණ්ඩාගාරික ධුරයට:- ඉන්දීවරී මධුෂිකා (ජනසතු සේවා) හා වී.ඩී.ටී. සුමිතා (රාජ්‍ය සේවා) යන මහත්මීන්
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
