(ශානුක අරවින්ද සහ තිලකරත්න දිසානයක)
ලෝක බැඞ්මින්ටන් සම්මේලනය 10 වැනි වරටත් සංවිධානය කරන ලෝක ප‍්‍රවීණයන්ගේ බැඞ්මින්ටන් ශූරතාවලියට සහභාගි වන ශ්‍රී ලංකා කණ්ඩායම පෙරේදා (24 වැනිදා) දිවයිනෙන් පිටත්ව ගියේය. රටවල් 49 ක ප‍්‍රවීණ කී‍්‍රඩක කී‍්‍රඩිකාවන් 1247 දෙනෙක් සහභාගිවන මෙම තරගාවලිය මේ මස 28 වැනිදා සිට දෙසැම්බර් මස 4 වැනිදා දක්වා ස්පාඤ්ඤයේ හුයෙල්වා නුවරදී පැවැත්වේ.
ශී‍්‍ර ලංකාවේ හිටපු ජාතික බැඩ්මින්ටන් ශූරයන් මෙන්ම ශූරියන් වන දුමින්ද ජයකොඩි, නිරෝෂන් විජේකෝන් සහ චන්දි‍්‍රකා ද සිල්වා වැන්නන් මෙන්ම පාර්ලිමේන්තු මන්තී‍්‍රවරයකු වන සහන් ප‍්‍රදීප් විතානද මෙම තරගවලියට එක්ව සිටිති.
දමින්ද ද සිල්වා, දිනුෂ්ක නිලූෂාන්, මංජුල පෙරේරා, සීවලී වික‍්‍රමසිංහ, උපේන්ද්‍ර ජයවර්ධන, දුමින්ද ජයකොඩි, මහින්දසිරි ජයවීර, නිෂාන්ත ජයමාන්න, සුබාෂ් ජානක, සුගත් අසංග, කමල් ගම්ලත්, ක්ලැරන්ස් හෝමර්, සහන් ප‍්‍රදීප් විතාන, අරුණ ක‍්‍රිෂාන්ත, නිරෝෂන් විජේකෝන්, රොහාන් ප‍්‍රනාන්දු, රොහාන් ද සිල්වා, සහ සුනිල් ජයසිරි තරගාවලියට සහභාගි වන ශ්‍රී ලංකා ක‍්‍රීඩකයෝ වෙති.
ගයන්ති නදීෂා, චන්ද්‍රිකා ද සිල්වා, ලක්ෂ්මි පුංචිහේවා, වාසනා සමරතුංග සහ ඉනෙස් ටෝසර් යන කී‍්‍රඩිකාවෝද මෙම තරගාවලියේදී ශ්‍රී ලංකාව නියෝජනය කරති.
මෙම තරගාවලියේදී වයස 35 න් ඉහළ, 40 න් ඉහළ, 45 න් ඉහළ, 50 න් ඉහළ, 55 න් ඉහළ, 60 න් ඉහළ, 65 න් ඉහළ, 70 න් ඉහළ සහ 75 න් ඉහළ යන වයස් කාණ්ඩ යටතේ පිරිමි කේවල, කාන්තා කේවල, පිරිමි යුගල, කාන්තා යුගල සහ මිශ‍්‍ර යුගල යන තරග ඉසව් පැවැත්වේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
