(නාමල් පතිරගේ)
ශ්‍රී ලංකාවේ සේවය සඳහා කැඳ වූ ඉන්දීය කබඩි විශේෂඥ පුහුණුකරු කේ. බාස්කරන් මහතාගේ සේවය එළඹෙන 2022 ආසියානු ක්‍රීඩා උළෙල තෙක් ලබා ගැනීමට සැළසුම් කර තිබේ. ඒ අනුව ඔහු වසරකට ආසන්න කාලයක් ශ්‍රී ලංකාවේ සේවය කරන බව ශ්‍රී ලංකා කබඩි සම්මේලනයේ සභාපති අනුර පතිරණ මහතා පැවැසීය.
දැනට ස්ථාපිත කර තිබෙන ජාතික කාන්තා හා පිරිමි කබඩි පුහුණු සංචිත දෙකම බාරව ප්‍රධාන පුහුණුකරුවා ලෙස බාස්කරන් මහතා කටයුතු කරයි. ඔහු ඉන්දීය ජාතික කබඩි (පිරිමි) කණ්ඩායම මෙහෙයවීම හැරෙන්නට මීට පෙර තායිලන්තය, මලයාසියාව යන රටවල ජාතික කබඩි පුහුණුකරු ලෙසත් කටයුතු කර තිබේ.
වසර 2016 පැවැති ලෝක කුසලාන කබඩි තරගාවලියේදී ඉන්දීය කණ්ඩායමේ ප්‍රධාන පුහුණුකරු ලෙසත් වසර 2014 වෘත්තීය කබඩි ලීග් තරගාවලිය ජයගත් ජායිනූර් ෆින්ක් පැන්තර් කණ්ඩායමේ ප්‍රධාන පුහුණුකරු ලෙසත් ඔහු කටයුතු කර තිබේ.
බාස්කරන් මහතා ක්‍රීඩකයෙකු ලෙසත් ඉන්දීය ජාතික කබඩි (පිරිමි) කණ්ඩායමේ කැපී පෙනෙන මෙහෙවරක් කළ අයෙකි. 1995 මදුරාසි සාග් ක්‍රීඩා උළෙලේ දී (පිරිමි) රන් පදක්කම දිනාගත් ඉන්දීය කබඩි කණ්ඩායමේ නායකයාත් ඔහුය. 1994 ජපානයේ පැවැති ආසියානු ක්‍රීඩා උළෙලේ දී ඉන්දියාව (පිරිමි) රන් පදක්කම කබඩි ක්‍රීඩා ඉසව්වෙන් දිනා ගන්නා විට ඔහු ඉන්දීය කණ්ඩායමේ ක්‍රීඩකයෙකි.
ශ්‍රී ලංකාවේ ගත කරන කාලය තුළ දී ජාතික ක්‍රීඩා විද්‍යායතනය මෙහෙයවන උසස් ක්‍රීඩා පුහුණුකරු පාඨමාලා කීපයක දේශකවරයකු ලෙසත් බාස්කරන් මහතා කටයුතු කිරීමට නියමිතය. ඒ හැරෙන්නට කබඩි පුහුණු වැඩමුළු කීපයක් ද දිවයිනේ ප්‍රදේශ කීපයකට ගොස් මෙහෙයවීමට ඔහු සූදානමින් සිටියි.
කොරෝනා වයිරසය ආසාදිතයන් කීප දෙනකු හමුවීම හේතුවෙන් මේ වනවිට තාවකාලිකව විසුරුවා හැර තිබෙන ජාතික කබඩි කාන්තා හා පිරිමි සංචිතයන්හි නේවාසික පුහුණුවීම් යළි ආරම්භ කිරීමට ශ්‍රී ලංකා කබඩි සම්මේලනය සූදානමින් සිටියි.
මෙම තත්ත්වය යටතේ බාස්කරන් මහතා ද මේ දිනවල ක්‍රීඩා අමාත්‍යාංශ නේවාසිකාගාරයේ නිරෝධායනය වෙමින් කල් ගෙවයි. බාස්කරන් මහතාගේ පුහුණුවීම් යටතේ ශ්‍රී ලංකාව පදක්කමක් දිනා ගැනීම අපේක්ෂා කරන 19 වැනි ආසියානු ක්‍රීඩා උළෙල 2022 සැප්තැම්බර් 10 සිට 25 වැනිදා දක්වා චීනයේ හැන්ග්ෂු නුවරදී පැවැත්වේ.
මේ වනවිට දේශීය කබඩි ක්‍රීඩාවේ ප්‍රවර්ධන කටයුතු සඳහා ක්‍රීඩා අමාත්‍යාංශය කබඩි සම්මේලනයට රුපියල් කෝටි හතර හමාරකට ආසන්න මුදලක් පිරිනමා තිබේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
