(නාමල් පතිරගේ)
සභාපති අපේක්ෂිකා පාර්ලිමේන්තු මන්ත්‍රීනි කෝකිලා ගුණවර්ධන මහත්මිය නිලවරණය වර්ජනය කරමින් නැගිට යද්දී ශ්‍රී ලංකා දැල්පන්දු සම්මේලනයේ නව සභාපතිනිය ලෙස රංජනී ජයකොඩි මහත්මිය තේරී පත් වූවාය.
රංජනී ජයකොඩි මහත්මිය සබරගමුව පළාත් සභාවේ වත්මන් ප්‍රධාන ලේකම්වරියයි. ක්‍රීඩා අමාත්‍යාංශයේ හිටපු අධ්‍යක්ෂ ජනරාල් ධුරයේ ද කටයුතු කර තිබේ.
දැල්පන්දු සම්මේලනයේ නිලවරණයේ විශේෂ සිදුවීම වූයේ ප්‍රතිවාදී අපේක්ෂිකා, පාර්ලිමේන්තු මන්ත්‍රීනි කෝකිලා ගුණවර්ධන මහත්මිය හා ඇයට සහයෝගය ලබාදුන් දිස්ත්‍රික් හා අනුසංගම් නියෝජිතවරියන් පිරිසක් ද නිලවරණයෙන් ඉවත්ව යාමයි. ඒ අනුව දිස්ත්‍රික් අනුසංගම් 17ක නියෝජිතයන් සහභාගිත්වයෙන් නිලවරණය පැවැත්වුණි.
මෙම සිදුවීමට හේතු වී ඇත්තේ, කෝකිලා ගුණවර්ධන මහත්මිය නියෝජනය කරන පාර්ශ්වය මෙවර නිලවරණයෙන් දිස්ත්‍රික් සංගම් නවයක් ඉවත් කිරීමට එරෙහිව ක්‍රීඩා අමාත්‍යාංශයට ගොනු කළ අභියාචනය විභාග කිරීමකින් තොරව නිලවරණය කැඳවීමට ගත් බව කියන තීරණයයි. ඒ අනුව, කෝකිලා ගුණවර්ධන මහත්මිය නිලවරණයෙන් නැගිට ගියේ, ඉදිරියේදී නීතිමය පියවර ගන්නා බව ප්‍රකාශ කරමිනි.
නිලවරණ කමිටුවේ සාමාජික පාලිත ජයතිලක මහතාගෙන් කළ විමසුමකදී පැවැසුවේ, ඊයේ පැවැති නිලවරණයේදී කිසිදු පාර්ශ්වයක් නාමයෝජනා ඉල්ලා අස් කරගැනීමක් සිදු නොකළ බැවින්, යොදාගත් පරිදි ධුර සඳහා ඡන්ද විමසුමක් සිදු කළ බවයි. ඒ අනුව ඡන්ද 16 ක් ලැබූ රංජනී ජයකොඩි මහත්මිය දැල්පන්දු සම්මේලනයේ සභාපතිනිය ලෙස තේරී පත් වූවාය.
කෝකිලා ගුණවර්ධන මහත්මිය මතු කළ විරෝධතාව ගැන නිලවරණ කමිටුවේ සාමාජික පාලිත ජයතිලක මහතා වැඩිදුරටත් පැවැසුවේ, අධිකරණ නියෝගයකින් හැරෙන්නට නිලවරණය කල් දැමීමට හෝ අත්හිටුවීමට තම කමිටුවට බලයක් නැති බවයි.
රාජ්‍ය සේවා හා මාතලේ දිස්ත්‍රික් යන දැල්පන්දු ක්‍රීඩා සංගම්හි සභාපතිත්වය උසුලමින් මෙවර නිලවරණයට ඉදිරිපත් වූ රංජනී ජයකොඩි මහත්මිය පැවැසුවේ, දැල්පන්දු සම්මේලනයේ විධායක සභාව පස් දෙනකුට පමණක් සීමා වන බැවින්, එහි ඉදිරි කටයුතු පහසු කරගැනීම සඳහා ඊයේම අනුකමිටු ගණනාවක් පත් කරගැනීමටකටයුතු කළ බවයි.
“දැන් පාර්ශ්ව වැඩක් නෑ. රටේ දැල්පන්දු ක්‍රීඩාවට මගේ වසරක කාලය තුළදී උපරිම වැඩ කොටසක් කරන්න මම බලාපොරොත්තු වෙනවා” යැයි ද ඇය වැඩිදුරටත් පැවැසුවාය.
ඊයේ පැවැති නිලවරණයට දිස්ත්‍රික් හා අනුසංගම් 24ක නියෝජිතවරියෝ කැඳවීම් ලබා තිබුණි. විශ්වවිද්‍යාල දැල්පන්දු සංගමය නිලවරණයේදී ජන්දය දීමෙන් වැළකී සිටියේය.
ශ්‍රී ලංකා දැල්පන්දු සම්මේලනයේ නව විධායක සභාව
සභාපති - රංජනී ජයකොඩි මහත්මිය
ලේකම් - කුමුදුනී ගෝමස් මහත්මිය
භාණ්ඩාගාරික - සංජිවනී වනසිංහ මහත්මිය
උපලේකම් - එස්. අමිතා මහත්මිය
උප භාණ්ඩාගාරික - වී.ඩී.ටී. සුමිත්‍රා මහත්මිය
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
