(ශානුක අරවින්ද)
ශ්‍රී ලංකා රග්බි සංගමය සංවිධානය කරන 2024-25 අන්තර් සමාජ පළමු පෙළ ලීග් රග්බි තරගාවලියේ මූලික වටය හෙට (13 වැනිදා) ආරම්භ වේ. තරගාවලියේ ආරම්භය සනිටුහන් කරමින් ගුවන් හමුදාව සහ සී.එච්. සහ එෆ්.සී. ක්‍රීඩා සමාජය අද පස්වරු 4.00 ට රත්මලාන ගුවන් හමුදා ක්‍රීඩාංගණයේදී තරග බිමිට පිවිසීමට නියමිතය.
ක්‍රීඩා සමාජ 9 ක් තරග වදින මෙම තරගාවලියේ මූලික වටය සති 9 ක් පුරා පැවැත්වෙන අතර සෑම සතියකම සිකුරාදා, සෙනසුරාදා සහ ඉරිදා යන දිනවලදී තරග 4 ක් පැවැත්වීමට නියමිතය. ඒ අනුව මූලික වටයේදී පැවැත්වීමට නියමිත මුළු තරග සංඛ්‍යාව 36 ක් වන අතර සෑම සතියකදීම එක් කණ්ඩායමකට විවේකයක් හිමිවනු ඇත.
මූලික වටය අවසානයේ ලකුණු සටහනේ පළමු ස්ථාන 4 ට පත්වන කණ්ඩායම් දෙවැනි වටයේදී කුසලාන ශූරතාව සඳහා තරග වැදීමට අවස්ථාව උදාකරගනු ඇත. ලකුණු සටහනේ අවසන් ස්ථාන 5 ට පත්වන කණ්ඩායම්වලට දෙවැනි වටයේදී පළඟ ශූරතාව වෙනුවෙන් තරග වැදීමට සිදුවනු ඇත.
තරගාවලියේ මූලික වටය පෙබරවාරි මස 9 වැනිදායින් නිමාවට පත්වන අතර දෙවැනි වටය පෙබරවාරි මස 14 වැනිදා ආරම්භ වීමට නියමිතය. දෙවැනි වටය සති 5 කින් සමන්විත වන අතර එහිදී කුසලාන ශූරතාව සඳහා තරග වදින සෑම කණ්ඩායමක්ම තරග 3 කට බැගින්ද, පළඟ ශූරතාව සඳහා තරග වදින සෑම කණ්ඩායමක්ම තරග 4 කට බැගින්ද සහභාගි වනු ඇත.
කොළඹ හැව්ලොක් ක්‍රීඩා සමාජ ක්‍රීඩාංගණයේදී සහ සී.ආර්. ඇන්ඩ් එෆ්.සී. ක්‍රීඩාංගණයේදී පැවැත්වෙන තරග පස්වරු 6.30 සිට විදුලි ආලෝකය මධ්‍යයේ පැවැත්වෙන අතර සෙසු සියලුම තරග පස්වරු 4.00 ට ආරම්භ කිරීමට සංවිධායකයන් කටයුතු යොදා තිබේ.
මූලික වටයේ පළමු සතියේ තරග
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
