(ශානුක අරවින්ද)
ශ්‍රී ලංකා රග්බි සංගමය සංවිධානය කරන අන්තර් සමාජ පළමු පෙළ රග්බි ලීගයේ හත්වැනි සතිය යටතේ සී.එච්. ඇන්ඩ් එෆ්.සී. ක්‍රීඩා සමාජය සහ හැව්ලොක්ස් ක්‍රීඩා සමාජය අතර සෙනසුරාදා (25 වැනිදා) පැවැති තරගයෙන් ලකුණු 27-21 ක ජයක් වාර්තා කිරීමට හැව්ලොක්ස් ක්‍රීඩා සමාජය සමත් විය.
හැව්ලොක්ස් කණ්ඩායම මෙම තරගාවලියේදී ලැබූ හයවැනි ජය මෙන්ම සී.එච්. කණ්ඩායම මෙම තරගාවලියේදී ලැබූ පස්වැනි පරාජයද මෙය විය. එහිදී උත්සාහක දිනුම් 4 කට වැඩියෙන් වාර්තා කිරීම හේතුවෙන් හැව්ලොක්ස් කණ්ඩායමටද, ලකුණු 7 කට අඩු පරතරයකික් පරාජය වීම හේතුවෙන් සී.එච්. කණ්ඩායමටද ප්‍රසාද ලකුණ බැගින් හිමිවිය.
කොළඹ, ටොරින්ටන් පෙදෙස ක්‍රීඩා අමාත්‍යංශ ක්‍රීඩාංගණයේදී පැවැති මෙම තරගයේ පළමු අර්ධය නිමාවට පත්වන විට ලකුණු 17-14 ක් ලෙස පෙරමුණ ගත් හැව්ලොක්ස් ක්‍රීඩකයෝ, දෙවැනි අර්ධයේදී සිය ලකුණු මල්ලට තවත් ලකුණු 10 ක් එක්කර ගත්හ. සී.එච්. කණ්ඩායමට දෙවැනි අර්ධයේදී ලබාගත හැකි වූයේ ලකුණු 7 ක් පමණි.
පළමු අර්ධයේදී ගෝල දිනුම් 2 ක් සහ දඬුවම් පහරක් සමගින් ලකුණු ලබාගත් හැව්ලොක්ස් ක්‍රීඩකයන් දෙවැනි අර්ධයේදී ලකුණු රැස්කළේ උත්සාහක දිනුම් 2 ක් මගිනි. සී.එච්. ක්‍රීඩකයෝ පළමු අර්ධයේදී ගෝල දිනුම් 2 ක් මගින්ද, දෙවැනි අර්ධයේදී තවත් ගෝල දිනුමක් මගින්ද ලකුණු ලබාගත්හ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
