ජනාධිපති කුසලාන තරග හෙට ඇරඹෙයි

ශ්‍රී ලංකා පාසල් රග්බි පාපන්දු සංගමයේ මෙහෙයවීම යටතේ පවත්වනු ලබන ‘ජනාධිපති කුසලාන’ රග්බි තරගාවලියේ අර්ධ අවසන් පූර්ව වටයේ තරග හෙට (16 වැනිදා) ආරම්භ වේ. ලීග් තරගාවලියක් අවසානයේ පාසල් රග්බි ක්ෂේත්‍රයේ පැවැත්වෙන ඉහළම තරගාවලිය ලෙස ජනාධිපති කුසලාන තරගාවලිය පෙන්වා දිය හැකිය.

මෙවර ජනාධිපති කුසලාන තරගාවලිය සඳහා ලීග් තරගාවලියේදී ඉහළම දක්ෂතා දැක්වූ කණ්ඩායම් 8ක් මේ වන විට තෝරගෙන අවසන්ය. මීට සහභාගී වන කණ්ඩායම් 8 ක්‍රම දෙකක් ඔස්සේ තෝරාගෙන ඇත. ලීග් තරගාවලියේ කුසලාන කොටසේ පැවැති තරගවලදී ඉහළම දක්ෂතා දැක්වූ කණ්ඩායම් 6 ක් සහ පළඟ කොටසේ ඉහළම දක්ෂතා දැක්වූ කණ්ඩායම් 2 ක් මෙවර ජනාධිපති කුසලානය සඳහා සහභාගී වෙති.

ශාන්ත ජෝශප්, ශාන්ත පීතර, ඉසිපතන, කිංග්ස්වුඞ්, ත්‍රිත්ව, වෙස්ලි, ශාන්ත අන්තෝනි සහ මලියදේව යන විදුහල් මෙවර ජනාධිපති කුසලාන සඳහා තරග වදිනු ලැබේ.

බඳුන සහ පළිහ කොටසේ ඉහළම දක්ෂතා දැක්වූ කණ්ඩායම් වන තර්ස්ටන්, ශාන්ත බෙනඩික්, මහානාම, ආනන්ද, පාදුක්ක සිරි පියරතන, මහනුවර ශ්‍රී සුමංගල හා නාලන්දා යන විදුහල්, අගමැති කුසලානය සඳහා තරග වදිති.

දෙවන වටයේ කුසලාන සහ පළඟ කොටසේ ඉහළ දස්කම් දැක්වූ පාසල් වන මොරටුව, මාතලේ ශාන්ත තෝමස්, නුගවෙල, තල්දුව සහ පානදුර සුමංගල යන විදුහල් මෙම තරගාවලියේ සභාපති කුසලානය සඳහා තරග වැදීමට නියමිතය.

ශ්‍රී ලංකා පාසල් රග්බි පාපන්දු සංගමය මේ වනවිට තරගාවලි 33 ක් පවත්වා ඇති අතර එයින් තරගාවලි 10 කම ශූරතාවය දිනා ගැනීමට කොළඹ ඉසිපතන විදුහල සමත්ව ඇත. ශාන්ත පීතර හා ශාන්ත තෝමස් විදුහල් අවස්ථා 5 බැගින් ශූරතා දිනාගනිද්දී, අවස්ථා 4 කදී කිංග්ස්වුඞ් විදුහල ශූරයන් බවට පත් වී ඇත. ත්‍රිත්ව හා රාජකීය විදුහල් අවස්ථා 3කදී ජනාධිපති ශූරතාවය දිනා ඇත. තර්ස්ටන්, වෙස්ලි හා ශාන්ත ජෝශප් විදුහල් එක් අවස්ථාක් බැගින් මෙම ශූරතාවයට හිමිකම් කීය.

වසර 26 ක් පුරා මෙම තරගාවලිය සඳහා පූර්ණ දායකත්වය දක්වන නෙස්ලේ ලංකා සමාගම පසුගිය වසරේ ජනාධිපති කුසලාන අවසන් තරගය රාත්‍රී විදුලි ආලෝක මධ්‍යයේ කොළඹ තුරඟ තරග පිටියේදී පවත්වන ලදී.
මෙවර අවසන් මහා තරගය මේ මස 30 වැනිදා ප.ව 6.00 තුරඟ තරග පිටියේදී පැවැත්වීමට සියලු කටයුතු සංවිධානය කර ඇත.

අර්ධ අවසන් පූර්ව වටයේ තරග කාල සටහන