(ශානුක අරවින්ද)
කොළඹ වෙස්ලි විදුහල සහ කොටහේන ශාන්ත බෙනඩික් විදුහල අතර කොළඹ පී. සරවනමුත්තු ක්‍රීඩාංගණයේදී පැවැති පස්වැනි ‘කාට්මන් කුසලාන’ වාර්ෂික මහ ක්‍රිකට් තරගය ජය පැරදුමකින් තොරව නිමාවට පත් විය.
තරගය නිමාවට පත්වන විට සිය දෙවැනි ඉනිම වෙනුවෙන් පන්දුවට පහර දෙමින් සිටි වෙස්ලි විදුහල කඩුලු 7 ක් දැවී ලකුණු 255 ක් ලබා සිටියේය. එහිදී නායක අනුග පැහැසර (82), ලිතුම් සෙනුජ (63) සහ දිනෙත් සිගේරා (63) අර්ධ ශතක ලබාගැනීමට සමත් වූහ.
පළමුවෙන් පන්දුවට පහරදුන් වෙස්ලි විදුහල කඩුලු 6 ක් දැවී ලකුණු 208 ක් ලබා සිටියදී සිය ඉනිම අත්හිටුවා ශාන්ත බෙනඩික් විදුහල් කණ්ඩායමට පන්දුවට පහරදීම සඳහා ආරාධනා කර සිටියේය. ඊට පිළිතුරු වශයෙන් බෙනඩික් ක්‍රීඩකයෝ සියලු දෙනා දැවී ලකුණු 235 ක් ලබාගත්හ.
වෙස්ලි විදුහල් පළමු ඉනිමේදී අගනා පිතිහරඹයක නිරත වූ රෂ්මික අමරරත්න හතරේ පහර 8 ක් සමග ලකුණු 98 ක් ලබා සිටියදී ශාරුජන් ශන්මුගනාදන්ගේ දක්ෂ පන්දු යොමුකිරීම හමුවේ ශතක පෙනි පෙනී දුවද්දී දැවීයෑමකට හසුවෙමින් පිටියෙන් ඉවත්ව ගියේය.
බෙනඩික් ඉනිමේදී නායක ශාරුජන් ශන්මුගනාතන් (71) සහ මෙවන් දිසානායක (50) අර්ධ ශතක ලබාගත් අතර දිනුජ සමරරත්න සහ රෂ්මික අමරරත්න කඩුලු 3 බැගින් දවාගැනීමට සමත් වූහ. එහිදී ඔවුන්ට අනගි සහායක් දුන් ශිරම් ජීවහන් කඩුලු 2 ක් බිඳහෙළීය.
වෙස්ලි පළමු ඉනිම - ඕවර 65 කදී කඩුලු 6 ක් දැවී 208
(රෂ්මික අමරරත්න 98, දිනුජ සමරරත්න 34, ශාරුජන් ශන්මුගනාතන් 38/2)
ශාන්ත බෙනඩික් පළමු ඉනිම - ඕවර 60.1 කදී සියලු දෙනා දැවී 235
(ටෙහාන් බිටර් 36, ශාරුජන් ශන්මුගනාතන් 71, මෙවන් දිසානායක 50, මානික්‍ය දේෂප්‍රිය 25, දිනුජ සමරරත්න 41/3, රෂ්මික අමරරත්න 43/3, ශිරම් ජීවහන් 66/2)
වෙස්ලි දෙවැනි ඉනිම - ඕවර 64 කදී කඩුලු 7 කට 255
(අනුග පැහැසර 82, ලිතුම් සෙනුජ 63, දිනෙත් සිගේරා 63)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
